1 ቆሮ 13
13
ኪን ካን
1ኣሳ ኖ̈ናባርኬ ኪታ̇ንቻን ኖ̈ናባራ ሶ̈ሊዝ ኤራ ታ̈ብ ዶኤጌይናሬ ታ̈ኒ ኣስ ካባስኮ ቴ ሜላ̇ ጊርቂ̇ዝ ሉ̈ሊፌኒ ዎይ ቅቃፌ̈ኔ። 2ካ̈ያ ካ̈ዪዝ ኪልሲ ታ̈ብ ዶኤጌይናሬ፥ ኣሳብ ኣ̈ቺ̇ንቲኖ ባዝ ዎይ ቴ ኤሪዝ ባዝ ማ̈ቄጌይናሬ፥ ኤሪቲ ጌይዛ ዎይ ታ̈ብ ዶኤጌይናሬ፥ ፔቲ̇ ኢንዳ ኢዝ ቤሲ̇ን ጋልዳፖ ዲንራ ሜላ ቤስ̇ ኣ̈ዝ ኣማ̇ና ታ̈ብ ዶኤጌዪናር ካን ታ̈ብ ባዪ ማ̈ቄ̇ጌዪን ዪ ዎይ ሜላ̇ ዓሪዬ። 3ታ̈ብ ዎ ባዝ ዎይ ዎርባያንቦ ፋጌጌይናር፥ ሜላ ኣቲን ታማ ጋርታ ሚቻ̇ምፔን ቴ ታ̈ና ኣ̈ር ኢሜ̇ጌይናር ካን ታ̈ብ ባዪ ማ̈ቄ̇ጌዪን ታ̈ና ኣባካር ማ̈ዳ̇ባሴ።
4ካን ጋርዢሺሬ፤ ካን ኮሽ̇ ባዝ ኦ̈ሬ፤ ካን ቃና̇ኢባሴ፤ ካን ዎ ኣሲ ኬርፊባሴ፤ ካን ዎ ኣሲ ኦቲርቂ̇ባ̈ሴ። 5ካን ኮሺ̇ባ̈ሶ ባዝ ኦ̈ባ̈ሴ፤ ዎይ ባዝ ታ̈ብ ሙታ̇ ማቆ ጋ̈ባሴ፤ ኤሊ̇ባር ሼኒቲባ̈ሴ፤ ጉልማ ኤባ̈ሴ፤ 6ካን ኪን ባዝባራ ኡፋይቲ̇̈ርዶኬ ኢ̈ታ ባዝባር ኡፋይቲ̇ባ̈ሴ። 7ካን ዎይ ባዝ ዳንዳኢ̈ሬ፤ ዎይ ጋላስ ኣማ̇ኒሬ፤ ዎይ ጋላስ ታስፋባር ና̈ጊ̈ሬ፤ ሜታ ጋርታ̇ር ዎይ ሚ̈ጛር ኤቂ̈̇ሬ። 8ካ̈ያ ካዪዝ ኪልሲ ኣቲ̇̈ሬ፤ ኦራ ኖ̈ናባር ሶ̈ላዝ ኪልሲንዳ ኣታ̇̈ሬ፤ ኤሪቲር ማ̈ቂ̇ን ኣቲ̇̈ሬ፤ ካን ኣባካር ጌይን ዪ ኣቲ̇ባሴ። 9ኤራ ጋርታፖ ኑ ኤራዚንዳ ዎይንድ ጊዳካ̇ዬ። ኑ ካ̈ያ ካ̈ዪ̈ርዶራር ዎይን ካዪ ዳንዳኢባ̈ሴ። 10ኩም ማ̈ቂ̇ኖ ኤሪን ዬዬጌይን ኩም ማ̈ቃካ̇ዮን ኣታ̇̈ሬ።
11ቴ ሚን ናእዶ̈ራ ናኢፌ̈ን ሶ̈ላ̈ሬ፤ ናኢፌ̈ን ቆፓ̇̈ሬ፤ ናኢ ኣቂሊፌ̈ን ኦ̈ሬ፤ ዎቲናካር ታ̈ኒ ቡ̈ዳ ኤሪኖፖ̇ ዎሃ ናኢ ኣቂሊፌ̈ን ኦ̈ዚን ኣሺ̇ኔ። 12ዓት ኑ̈ኒ ዲል̇ ጌይኖ ማስቶ̈ታ ጋርታ ኑ ኑ̈ና ቤቃ̇ዚንዲፌ̈ን ቤቂ̈̇ሬ። ዎቲናካሬ ጊዳክ ዪና̇ ኢዝባራ ፋላ̇ጋል ቤቂ̇̈ሬ፤ ቴ ዓት ኤራዚንዳ ዶኪ̇ን ሙታ፤ ዎቲናካር ጊዳን ጾ̈ሲ ታ̈ና ኤሪኖንዲፌ̈ን ማ̈ቂ̇ኖ ኩም ኤራ ታ̈ብ ዶኢ̈ሬ። 13ዪዚ ኣማ̇ና፣ ካን፣ ታስፋ ዪን ዓይዛን ሚ̈ጛር ዶኢ̈ሬ ዎቲናካሬ ዪን ጋርታፖ̇ ሺዚንዳ ካን።
Currently Selected:
1 ቆሮ 13: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
