1 ቆሮ 14
14
ኦራ ኖ̈ናባር ሶ̈ሊኬ ካ̈ያ ካ̈ዪዝ ኪልስ
1ዪዚ ዪንቲ̇ ካን ጎይ ዬብቴ። ማ ጌ̈ሻ ኣያ̇ና ዪንታ̇̇ብ ኢማ̇ዝ ኪልሲን ሚ̈ጛር ኮዪብቴ̇፤ ዎይ ኪልሳን ጋርታ̇ፖ ሺሻሪ ካ̈ያ ካ̈ዪዝ ኪልሲን ጾ̈ሲ̇ ዪንታ̇ብ ኢማ̇ምፔ̈ኒ ሚ̈ጛር ጌሺብቴ̇። 2ኦራ ኖ̈ናባር ሶ̈ሊዛ̈ዲ ጾ̈ሳ̇̇̈ቦ ሙታ̇ ሶ̈ሊ̈ርዶኬ ኣሳብ ሶ̈ሊባ̈ሴ፤ ኣሳብ ጌ̈ማ ማ̈ቂ̇ኖ ባዚ ጌ̈ሻ ኣያ̇ናባር ማ̈ቃ̇ሪ ሶ̈ሊዛኮታ̇ቦ ኢ ሶ̈ሊኖን ኤሪዝ ኣሲ ባዬ። 3ዎቲናካር ካ̈ያ ካ̈ዪዛን ሜላ ኣሳን ሚ̈ን ኤሳ̇ንዳቦ፥ ሚ̈ንንዳብኬ ዞራንዳቦ ኣሳብ ሶ̈ሊ̈ሬ። 4ኦራ ኖ̈ናባር ሶ̈ሊዝ ኣሲ ፌ̈ና ሙ̈ታ ሚ̈ንሬ፤ ዎቲናካር ካ̈ያ ካ̈ዪዝ ኣሲ ኣማ̇ኒዝ ኣሳን ዎይ ሚ̈ንሬ። 5ዪንቲ̇ ዎይን ኦራ ኖ̈ናባር ሶ̈ሊ̈ርኮ ቴ ዶሳ̈ርዶኒ፥ ዪኒ̇ፖ ዪንቲ̇ ካ̈ያ ካ̈ዪርኮ ቴ ሺ ዶሳ̈ሬ። ዎሳ ኬን ሚ̈ጛምፔ̈ኒ ኦራ ኖ̈ናባር ሶ̈ሊኖዲ ፌ ሶ̈ሊኖን ቢርቺባ̈ስኮ ኦራ ኖ̈ናባር ሶ̈ሊዛ̈ፖ ካ̈ያ ካ̈ዪዝ ኣሲ ሺ̈ሬ።
6ዪዚ ቴ ኢሺንታ̇ን! ቴ ዪንታ̇̇ክ ዬ̈ርዶራ ኦራ ኖ̈ናባራ ሶ̈ላ ሙታ̇ ዬዬጌዪን ዪንታ̇ ኣ ማዳ̇̈ራ? ዪኒፖ̇ ሺ ታ̈ኒ ጾ̈ሳ̇ ሚስጢሪን ጌ̈ሚቲኖን ኤርሳዚንዶ፣ ኤራ፣ ካ̈ያኬ ዎይ ቲሚርታ̇ ኤካ̇ር ዬይኖኮ ዪንታ̇̇ብ ኮሼ̇።
7ዚምቢ̇ ሼምፓ ባዮ̇ ባዝዶኒ ኣሲ ኮሺንቺ̇ ፉጋካ̇ይ ኣቴ̇ጌይንዶ ካ̈ኢዝ ና̈ሳ ካልዲባባ ዎይ ባ̈ጪ ዎይ ኣ̈ክ ዋሶ ዪ̈ን ጋርታ̇ፖ̇ ዎኖ̇ ካ̈ኢ ሙታ̇ ዎኮ ኣሲ ኣባር ኤሪ̈ራ? 8ሞይዛ ፉጋዚን ኣሳ ዋይታ ኣካይ ኣቴ̇ጌዪን ኦ̈ኖ ዬ̈ፊብ ጊ̈ጊንቲ̇ዛዲ? 9ዪና̇ ኢዝፌ̈ኒ ዪንቲ̇ ዪንታ̇ ኖ̈ናባር ሶ̈ሊንቲ̇̈ርዶሪ ኣሳ ዋይታ ኣ̈ር ሶ̈ላካ̇ይ ኣቴ̇ጌይን ዪንቲ̇ ሶ̈ሊንታዚን ኦ ኤራንዳ ዳንዳኢራ? ዪንቲ̇ ሜላ̇ ኣይጊ ጋልዳ ሶ̈ሊንቲ̇ዛ ማ̈ቃ̇̈ሬ። 10ኣላሚን ጋልዳ ዎይሊን ኖ̈ና ዎ። ዪን ጋርታፖ ኢዝቦ ቢርሺቺ̇ ባዮ̇ ኖ̈ና ባ̈ዬ። 11ዪዚ ፔቲ̇ ኣሲ ኢ ሶ̈ላዝ ኖ̈ኒን ኢዝ ቢርሺቺ̇ን ቴ ኤራባስፌ̈ንኮ፤ ናሳ ሶ̈ሊዛ̈ቦ ታ̈ኒ ዛቃ̇ ማ̈ቃ̇̈ሬ፥ ኢያሬ ታ̈ብ ዛቃ̇ ማ̈ቂ̈̇ሬ። 12ዪንታ̇̇ሬ ጌ̈ሻ̇ ኣያ̇ና ኢማ̇ዝ ኪልሲን ኤካ̇ንዳብ ሚ̈ጛር ኮዪዝ ኣስ ማ̈ቂ̇ኖኮታ̇ቦ፤ ዪንቲ̇ ዎይፖ̇ ሺ ኣማ̇ኒኖ ኣሳን ሚ̈ንንዳብ ዳንዳኣዝ ኪልሲን ዪንታ̇̇ብ ዎይላንፔ̈ኒ ኮዪብቴ̇።
13ዪ̈ኮታ̇ቦ ኦራ ኖ̈ናባር ሶ̈ሊዝ ኣሲ ሶ̈ሊኖን ቢርቻ̇ንዳብ ዳንዳኣምፔን ዎ̈ሳ̇ጋቤ። 14ታ̈ኒ ኦራ ኖ̈ናባር ዎሳ̇ምባራ ቴ ዚምጋር ዎ̈ሳ̇ርዶኬ ታ ኣብዝ ጋ̈ርኮ ታ̈ብ ኤሪንታባሴ። 15ዪዚ ታ ኣብዝ ዎታንዳብ ኮሻ̇̈ራ? ታ̈ኒ ቴ ዎ̈ሳ̇ዚን ታ̈ብ ኤሪንታ̇ካ̇ይዶናር ዎሳ̇̈ሬ፤ ማ ታ ጋ̈ዚን ታ̈ብ ኤሪንቲን ዎሳ̇̈ሬ፤ ቴ ዬጻ̇ዚን ታ̈ብ ኤሪንታ̇ካ̇ይዶናር ዬጻ̇̈ሬ ማ ቴ ጋ̈ዚን ታ̈ብ ኤሪንቲ̇ን ዬጻ̇̈ሬ። 16ዪዚ ዪ̈ፌ̈ን ማ̈ቃካ̇ይ ኣቴ̇ጌይን ኔ ኔ ኦራ ኖ̈ኒንባር ጾ̈ሳ̇ ጋላታ̈ርዶራ ኔ ጋ̈ዚን ኤሪባ̈ሶ ዛቃ̇ ኣሲ ኔ ጋላታ ዎሲምቦ “ኣሚንኤ” ጋ̈ንዳ̇ብ ዎዛርታ̇ር ዳንዳኢ̈ራ? 17ኔ̈ኒ ኮሺ̇ንቻ̇ ዎ̈ሳ̇ ጋላቲኖ ማ̈ቃ̇ንዳብ ዳንዳኣ̈ሬ ዎቲናካሬ ኔ ዎ̈ሳ̇ ጋላቲኖንዳ ና̈ሳ ሜላ ማ̈ዳ̇ባሴ።
18ቴ ዪንቲ̇ ዎይንፖ̇ ሺ ኦራ ኖ̈ናባር ሶ̈ሊዛኮታ̇ቦ ጾ̈ሳ̇ ጋላታ̈ሬ። 19ዎቲናካሬ ዎ̈ሳ ኬ̈ ጋርታ ዎ ሜላ ኣሳን ታማ̈ርሳንዳቦ ታጳ ሙኩላ ቃ̈ላ ኦራ ኖ̈ናባር ሶ̈ላናፖ̇ ኢሺ̇ን ቃ̈ላ ዎይቦ ኤሪንቲ̇ዝ ኖ̈ናባር ቴ ኤራር ሶ̈ላ̈ርኮ ዶሳ̈ሬ። 20ቴ ኢሺንታ̇ን! ኢ̈ት ባዛቦ ኣቂሊ ናኢፌ̈ን ማ̈ቂ̇ብትዶኬ ዪንቲ̇ ቆፒ̇ርዶሪ ኣቂሊ ናኢፌ̈ን ማ̈ቃፒ̇ቴ፤ ዪንታ̇ ቆፊንባራ ቡ̈ዳ ኤሪኖ ኣስ ማ̈ቂ̇ብቴ።
21ዪ̈ዳሬ
“ኤሪንቲ̇ባ̈ሶ ኖ̈ና ሶ̈ሊዝ ኣሳን ጎይባርኬ
ኣሳ ጋዶ̇ ኣስ ኖ̈ናባራ ዓ ዎርዣቦ ቴ ሶ̈ላንዳ።
ዪፌ̈ን ማ̈ቂ̇ናካሬ ኢንቲ̇ ታ̈ኮን ሲስኪ̇ባ̈ሴ ጌይሬ ጎዳ ጾ̈ሳ̇̇̈ዲ”
ጋ̈ሪ ሂጋ̇ ማጻ̈ፋ ጋልዳ ጻ̈ፊንቲ̇ኔ።
22ዪዚ ኦራ ኖ̈ናባር ሶ̈ላዚንዳ ኣማ̇ኒባሶ ኣሳንቦ ማላ̇ ማ̈ቃ̇ምፔ̈ንዶኬ ኣማ̇ኒዝ ኣሳንቦ ጊዳካ̇ዬ፤ ዎቲናካር ካ̈ያ ካ̈ያዚንዳ ኣማ̇ኒዝ ኣሳንቦዶኬ ኣማ̇ኒባ̈ሶ ኣሳንቦ ጊዳካ̇ዬ።
23ዪዚ ኣማ̇ኒዝ ኣሳን ፔቲ̇ ቤስ̇ ሺ̈ቂኖን ጋርታ̇ ኢንቲ̇ ዎይ̈ን ኦራ ኖ̈ናባር ሶ̈ላምባ̇ራ ባዝ ዪን ኤሪባሶ ኣሳን ዎይ ኣማ̇ኒባሶ ኣሳን ዪ ቤሳ̇ ጋርታ ዬዪ ጌላሪ “ዓን ኣሳን ዣ̈ሽቲ̇ኔ” ጋ̈ባሳ? 24ዎቲናካሬ ዎይን ካ̈ያ ካ̈ዪርኮ ኣማ̇ኒባሶ ኣሲ ዎይ ባዝ ዪን ኤሪባ̈ሶ ኣሲ ኢና ጌላሪ ካ̈ያ ሶ̈ላዚን ሲስካ̇ሪ ኢ ናጋሪን ኢ̈ብ ኤሪንታ̈̇ሬ፤ ኢ ሲስኪ̇ኖ ቃ̈ሊን ኢ ጋልዳ ፊርዳ̈̈ሬ። 25ኢ ቡ̈ዲን ጋርታ ጌ̈ሚቲኖ ባዚ ኢብ ቤንታ̇ሬ፤ ዪዚ ዪኒ̇ባራ “ኪን ጾ̈ሳ̇ዲ ዪንታ̇ ጊዳ ዎ!” ጋ̈ሪ ጾ̈ሳ̇ቦ ጎይኒ̈ሬ።
ዎ̈ሳብ ሺ̈ቃምባ̇ር ዎ ዎጋ
26ቴ ኢሺንታን! ዪዚ ኣብዝ ዎታ̇ንዳ ኮሺ̇̈ራ? ዪንቲ̇ ዎሳ̇ንዳብ ሺ̈ቃምባ̇ራ ዪንታ̇ ጋርታ̇ፖ ፔታ̇ና̈ቦ ማዝሙራ ዬጺ̇̈ዝ፤ ሜላ̈ቦ ኣስ ታማ̈ርሲ̈ዝ፤ ፔታ̇ና̈ቦ ኣሳብ ጌ̈ሚቲኖ ባዝ ፋላ̇ ጋልዳ ኬሲ̇ዝ፤ ፔታ̇ና̈ቦ ኦራ ኖ̈ናባር ሶ̈ሊዝ፤ ማ ሜላ̈ቦ ኦራ ኖ̈ናባር ሶ̈ሊኖን ቢሊ̇ዝ ኪልሲ ዎ፤ ዪዚ ዪን ዎይ ኪልሳን ኣማ̇ኒኖ ኣሳን ሚ̈ንር ኤሲ̇ዝ ባዝ ማ̈ቃ̇ንዳብ ኮሺ̈̇ሬ። 27ኦራ ኖ̈ናባር ሶ̈ሊዝ ኣሲ ዎኮ ናምኢ ዎይ ዎይሊዴ ጌይን ዓይዚ̇ ኣስ ማ̈ቃ̇ሪ ዎልኣ ታራባር ሶ̈ላጋ̈ቤ። ኢንቲ̇ ሶ̈ላዚንዶ ሜላ ኣሲ ቢርቻ̇ጋቤ። 28ቢርቺ̇ዝ ኣሲ ባዪኮ ኦራ ኖ̈ናባር ሶ̈ሊዝ ኣሳን ኣሳ ጋርታ ዚምዶኣጋቤ፤ ዚምዶኣሪ ፌ̈ብኬ ጾ̈ሳ̇ብ ሙታ̇ ሶ̈ላጋቤ 29ካ̈ያ ካ̈ዪዝ ኣሳን ና̈ምኢ ዎይ ዓይዚ̇ ማ̈ቃ̇ሪ ሶ̈ላጋ̈ቤ፤ ሜላን ሶ̈ሊንቲኖን ሲስካ̇ሪ ኮሺንቺ̇ ማሊ̇ ቤቃ̇ጋቤ። 30ሺ̈ቃሪ ዶኢኖ ኣሳን ጋርታፖ̇ ፔቲ̇ ኣሲ ሳጻ ኢ̈ብ ቤንቴጌይን ቲ̈ን ሶ̈ሊሙታ̇ ዎ ና̈ሳ̈ዲ ዚም ዶኣጋ̈ቤ። 31ዎይ̈ን ታማ̈ራንፔ̈ንኬ ሚጛምፔ̈ን ዎይን ታራባር ታራባር ጾ̈ሳ̇̇ ኪቲ̇ን ሶ̈ላንዳብ ዳንዳኢ̈ሬ። 32ናባን ጾ̈ሳ̇̈ ጋልዳፖ̇ ሲስኪ̇ኖንዶ ኮዬጌይን ዓት ዓንዳ ኢና ሶ̈ላንዳቦ ሜላ ኣሲ ሶ̈ሊሙታ̇ ዎኮ ኢ ውርሳምባር ሶ̈ላንዳ ጋ̈ሪ ና̈ጋንዳብ ዳንዳኢ̈ሬ። 33ጾ̈ሳ̇̇̈ዲ ሳ̈ሪቲ ጾ̈ስዶኬ ዉይሳ ዶሲዝ ጾ̈ስ ጊዳካ̇ዬ።
ዎይ ዎ̈ሳ ኬ̈ን ጋርታ ዎታዚንዲፌ̈ኒ፥ 34ኣማ̇ኒዝ ኣሳን ዎ̈ሳብ ሺቂኖ ኬ̈ልባራ ማጫ̇ን ዚምዶኦጋቤ። ሂጊ̇ን ኪ̈ታ̇ዚንዲፌ̈ኒ ኪ̈ቲ̇ንታምፔ̈ንዶኬ ሶ̈ላምፔን ኢንታ̇ብ ፋቃ̇ዳካ̇ዬ። 35ማጫ̇ን ፔቲ̇ ፔቲ̇ ባዝ ኤራንዳብ ኮዬጌዪን ፌ ኣስኒንታ̇ን ፌ ኣ̈ል ኦይጫ̇ጋቤ፤ ኣባ ጌይን ማጮ̇ ኣሲ ዎ̈ሳብ ሺ̈ቂኖ ቤስ̇ ጋርታ ሶ̈ላዚንዳ ዬ̈ሊ̇̇̈ሬ።
36ጾ̈ሳ̇ ቃ̈ላ ዪንታ̇ ጋልዳፖ ኬስኪ̇ና? ዎይ ጾ̈ሳ̇ ቃ̈ሊን ዬሊ̇ኖንዳ ዪንታ̇̇ክ ሙታ̇? 37ኦ̈ናካሬ ፌ̈ና ናቢ ጌይዝ ኣሲ ዎይ ጌ̈ሻ ኣያ̇ና ኢሚ̇ኖ ኪልሲ ታ̈ብ ዎ ጌይዝ ኣሲ ዎኮ፤ ዓና̇ ቴ ዪንታ̇̇ብ ጻ̈ፊኖንዳ ጎዳ ኪ̈ታ ማ̈ቂ̇ኖን ኤራጋ̈ቤ። 38ዪኖ̇ ሲስካ̇ብዳ ጌይዝ ኣሲ ኢ̈ኮንዳር ሲስኪ̇ዝ ኣሲ ባዬ̇።
39ዪ̈ኮታ̇ቦ ቴ ኢሺንታ̇ን ካ̈ያ ካ̈ያንዳቦ ኮሺንቻ̇ር ኮዪብቴ፤ ኦራ ኖ̈ናባር ሶ̈ላዚን ካያፒ̇ቴ። 40ዎቲናካሬ ዎይ ባዚ ዎጋባር ማ̈ቆ̇ጋ̈ቤ።
Currently Selected:
1 ቆሮ 14: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
