रोमि 3

परमेस्वरना दारमिकता अनि विस्वास्यता

1अदाम आन्ता ते यहुदि आयानाता बाताल फायदा या कतना कियानाता बाताल किमत मन्ता? 2इंगो, सबोय प्रकारते पकाय फायदा मन्ता! बाक्याकि सबोयता मुने परमेस्वरना उपदेशतुन ओरे लोकुरकुन सोपे कितुर। 3हुचुलोर लोकुरक विस्वास केवोर ते वने बाताल ओरा विस्वासघाति आयानाते परमेस्वरना सच्चायि बेकार ठहरे मायार? बसकेय आयो। 4ओना बारेते

“बोन निमा आपुना पोल्लोते परमेस्वरना मुने येताना योग्य ठहरे मायाना अनि निया न्याय कियान बेरा निमा विजयि आयकि#भज ५१:४”

इन्जोर पवित्र पुस्तकतिगा कोटता लेहका परमेस्वर विस्वास योग्य मन्तोर। मति सबोय लोकुरक खोटाल वळकवालोर मन्तोरक। 5माक खराब बुतो कियाकोम असके परमेस्वरना दारमिकदातुन सोबाय तोहकाट ते माक बाताल इन्काट? इन्जोर (मानेयना रितिते नना पुच्चेमायिका), “बाताल आपुना गलतिता कारण माकुन होंग किस दन्ड हिन्तोर ओर अन्यायि मन्तोर बहे?” 6बसकेय आयो! बाक्याकि परमेस्वर बोदे पोल्लोतुन खरोयते केवोर आयनुर ते ओर दुनियाता न्याय बदाम कियानुर? 7परमेस्वरना खरोयि नावा खोटालता कारण ओन महिमा साटि पकाय तोहतु ते पजा बाक्या पापि लेहका नाकुन दन्डता योग्य ठहरे किन्तोर? 8अनि “भलायि दिसि इन्जोर खराब बुतो कियाकाट” माक इदाम इन्तोरोम इन्जोर नावा बारते हुचुलोर लोकुरक नावागा दोष लावे किन्तोरक। इन्जोर ओर लोकुरक परमेस्वरना दन्ड पुटाना योग्य मन्तोर।

दुनियाता सबोय लोकुरक पापि मन्तोरक

9इन्जोर माक यहुदिलोकुरक बाताल यहुदि आयोर लोकुराताल सोबाय मन्तोरोम? बसकेय आयो! बाक्याकि माक यहुदि अनि यहुदि आयोर येर इवुरास लोकुरक पापता अदिकारते मन्तोरक इन्जोर माक मुनेटाले दोष लावे कितोरोम। 10पवित्र पुस्तकतिगा इदाम कोटता मन्ता:

“बोरे परमेस्वरना मुने येताना योग्य हिलेर वरोर वने हिलेर;

11खरोय बाताल मन्ता इन्जोर बोरे समजेमायोर,

परमेस्वरतुन पळकवाल वने बोरे हिलेर#३:११ परमेस्वरतुन पळकवाल बोरेहिलेर इदेना अर्थ इदाम मन्ता: परमेस्वरना इच्चातुन पालन केवालोरक बोरे हिलेर या परमेस्वरतुन आरादना केवालोरक बोरे हिलेरक या परमेस्वरना मदत साटि पळकवालोरक बोरे हिलेर।।

12सबोय लोकुरक परमेस्वरताल लेसकतोरक

सबोय लोकुरक बेकार आतोरक

बोरे भला केवाल हिलेरक,

वरोर वने हिलेरक#भज १४:१-३; ५३:१-३।”

13“अनि ओरा वळकनाता द्वारा दुसरो लोकुरा हायानाता कारण आन्ता,

अनि ओरे आपुना पोल्लोते दोखा किन्तोरक,

ओरा पोल्लोंग तरासता जेहेर लेहका मन्तांग#भज ५:९; १४०:३।”

14“ओरा टोडिताल सराप अनि दुसरोना बारेते खराब खराब पोल्लोंग वळकिन्तोरक#भज १०:७।”

15“ओर लोकुरक दरोज दुसरोन हव्काना साटि तयार मन्तोरक;

16ओरक बगाय दान्तोरक अगा दुसरोना नाश अनि तकलिप हिन्तोरक,

17ओर लोकुरक शान्तिते मन्दाना पुनोरक#यश ५९:७-८।”

18“ओर लोकुरकुन परमेस्वरना बाताले वरे हिले#भज ३६:१”

इन्जोर पवित्र पुस्तकतिगा कोटता मन्ता।

19मूसाना नियमतिगा बाताल इतोर ओद सबोय ओद नियमता अदिकारते मन्तोर लोकुरक साटि वेहान्ता इन्जोर माक पुन्तोरोम। अदामे सबोय लोकुरा टोडितुन बन्द किस सबोय दुनिया परमेस्वरना दन्डता योग्य ठहरे मायान साटिय इदाम इन्तोर। 20इन्जोर मूसाना नियमता बुतोता कारण बोरे मानेय परमेस्वरना मुने येताना योग्य आय परोर मति मूसाना नियमता द्वारा आपुना पापता बारेते बराबर समजेमायनुर#भज १४३:२; गला २:१६।

निमाट येसु मसिना पोरोयता विस्वासते परमेस्वरना मुने येताना योग्य ठहरे मान्तोरिट

21मति इदेक मूसाना बिना नियमते परमेस्वरना दारमिकता दिसान्ता। अदेना गवाहि मूसाना नियम अनि परमेस्वरना पोल्लो वेहवालोरक हिन्तोरक। 22सबोय विस्वासि लोकुरक साटि येसु मसिनिगा विस्वासता द्वारा परमेस्वरना दारमिकता बिना भेदभावते दिसता#गला २:१६। 23बाक्याकि सबोय लोकुरक पाप किसुन परमेस्वरना महिमाता योग्य मनोर आतुरक, 24मति परमेस्वरना दयाते येसु मसिना द्वारा पापता बन्दनताल लेहचिस फुकोटते पुटता उन्दि बकसिस लेहका माकुन परमेस्वरना मुने येताना योग्य ठहरे किन्तोर। 25परमेस्वर मावा पापता गुना निहान साटि येसु मसिन दुनियातिगा लोहतुर। ओर मावा पापताल पिसहान साटि नतुर हिस बलिदान आतुर। अनि ओर मावा साटि नतुर हिस बलिदान आतुर इन्जोर माक विस्वास कियाकाट ते ओर मावा पापतुन मापि किस परमेस्वरना मुने येतानाता योग्य बनेकिन्तोर। अनि आपुना स्वभावते ओर लोकुरक मुने किता पापतुन दन्ड हेवाय तासिस पापि लोकुरकुन मापि किस परमेस्वर आपुना दारमिकता तोहान्तोर, 26येसु मसिनिगा बोर विस्वास किन्तोरक ओरकुन वने आपुना मुने येताना योग्य बनेमायान साटि इद काळते परमेस्वर आपुना धर्मिकता तोहाना साटि इदाम कितुर।

27इन्जोर परमेस्वरना मुने येताना योग्य आयान साटि नना बाताले बुतो कितान इन्जोर हजोरपण कियाना सन्दि मन्ता बहे? हिले! इदाम हजोरपण कियानाता बेरा मारतु। बोद नियम पालन कियाना कारणते मन्ता बहे? आयो, मति केवल येसु मसिनिगा विस्वासता कारणते मन्ता। 28इन्जोर बोरायि मानेय मूसाना नियमता बुतोता अनुसार आयो मति विस्वासता द्वाराय परमेस्वरना मुने येताना योग्य बनेमाय परान्तोरक इन्जोर पका मन्ता। 29परमेस्वर बाताल केवल यहुदि लोकुराय परमेस्वर मन्तोर बहे? बाताल यहुदि आयोर लोकुरा वने परमेस्वर आयोर बहे? इंगो, ओर यहुदि आयोर लोकुरा वने परमेस्वर मन्तोर। 30बाक्याकि परमेस्वर वरोरे मन्तोर, ओरे विस्वासता द्वारा कतना आतोरा अनि कतना आयोर लोकुरकुन वने ओदे विस्वासता कारण आपुना मुने येताना योग्य ठहरे कियानुर#व्यव ६:४; गला ३:२०। 31इन्जोर माक येसुना पोरोयता विस्वासते मूसाना नियमतुन बेकार ठहरे किन्तोरोम? बसकेय आयो! बाक्याकि येसु मसिना विस्वासता द्वारा नियमता सबोय पोल्लोतुन पुरा किन्ता।

Currently Selected:

रोमि 3: fmu

Highlight

Copy

Compare