Ruma 13

Faningi Tam ngay Funan Ste Swa Daga

1Fagayu tam faningi tua tam ngay funan ste swa daga. Aroro we funun at mabalyanan nu dway siginans Dius. Dius wan at nafili fagayu tagfangguna sit mesa fakamulun. 2Nu katanya, nusnga sinu takamabo tam ngay funan, kanya kamabo Dius at ngay nafili. Ay kanya ban gfaurianan nusnga sinu takamabo. 3Fagayu tagfakamulun at masine di e fakalimuun sa sangay funan, nusnga sinu way tagfakamulun at mauri takalimu. O kaylat o laman di o e fakalimuun sa tam ngay funan? Fakamuluni at masine ay kanya gfauseganan emu. 4Aroro tam ngay funan ste swa daga Dius at ngay fagsuguan laman sam fagmasineun. Dewa katanya, nu gfakamulun wayo at mauri, alimui tua, aroro anud kanya e fagmabalyananun, ay Dius yangay at fagsuguan laman gfaurianan tagfakamulun at mauri. 5Nu katanya, masine nu gfaning tua tam fia tam ngay fun ste swa daga. Tam fagfakamulunun takatanya, di tam lang gsaruy Dius at fandotaman nu bunway aroro nasaful tua tam te, katanya tua at matuyan.

6Katanya yangay at masuad ay fagfonun sa tam ngay funan sik famayad. Aroro tam ngay funan ste swa daga nu gugatan tua gfakamulun at fanambagun, kanya Dius at fagsuguan. 7Galay am at sadi foni nusnga seyu ay fagfonun. Ay foni tua famayad sa ay funan, ay suyui nusnga sinu tam fagsuyuun, ay fauseganani sas nusnga sinu tam fagfausegananun.

Edkesugani

8Lag am e bedan sas nusnga sinu. Ay bedan ang yakman edkesugani. Aroro nusnga sinu takesug tua at iba gfaning Muisis at Faugali. 9Ngay suguan te, lag gfanugtug, ay lag namatugtug, ay lag gfabul, ay lag gfangkamul, ay lag gfangalabian, ay fagayu nusnge wain fag suguan ansadi sa sik suguan te, “Esugi am iba kaksvn nu kesug o emu.”#13:9 Lebitiku 19:18. 10Sik taw nu saful tua kesug, di gfakamulun at mauri sat iba. Aroro fakesugun wan famafasludan Muisis at Faugali.

11Katanyai tua ay fakamulun, aroro nasaful wam te, buknga wan nu mafuloan am, aroro tam fakalangfean amunakbang yap ebi gina tam bagu gafanud sas Isus. 12Gakatabuun wan yabi, ay at mayamag gakadasugun wan. Nu katanya, gubun watam fagayu at madulum fag fakamulun, ay gsulun watam tam famalabag laman mafawayan tua kata gina mamenit. 13Ugalii tua at masine aroro si tua tam sad mayamag, ay di tam si ya sad madulum. Ay saruyi takatatuy fagayu: fakamasaweun nu guseganan, fagfanlanguanun, fagfanugtugun, ay at mapla fag fakamulun, fagawayanun, ay fagfangalabianun. 14Suluni tam Fun Isus at nafon antam fag ugali, ay lag am gfaning ya ay bilug at fakaylatun.

Currently Selected:

Ruma 13: OCCT

Highlight

Copy