Ruma 12
12
Tagafanud at Ugali
1Nu katanya, ku ngay faduksay, aroro Dius kafanyu antam, maksvn nu get au sa ayu te, foni ay bilug sas Dius sik tagleleg fag fanggalangun, mafalganan ay tagfauseganan anya. Katatuy at matuyan nu gseg am Dius. 2Lag am gfaning fagdaul daga at ugali, nu bunway asamani way ay tubusi ay amatanganan laman sumaful am Dius at fakaylatun, at masuad at masine ay tagfauseganan fia anya, ay at matuyan fia.
3Aroro Dius nafon tua sa angku tiba tungud fag fagmasineun, glong au sa ayu fagayu te, lag am gamatangan te, gtungud tuam ay iba, nu dway matuyan, nu bunway amatangani fia ay kayaunanan at matuyan, kata ay fagafanudun Dius at nafon sas galay ayu at sadi. 4Tam bilug ngayu at afud, ay wa gsud at fakamulun. 5Katanya yangay, itam dewa tam ngayu, sadi way tam bilug ansadi tam sa tam Fun Isus. Ay galay tam at sadi masadi tua tam sa tam iba. 6Dius at fon fag fagmakatuun sas galay antam at sadi saman way. At nafon nu sik tagfoyung at longan, foyungi kata tam fagafanudun. 7Ay nu sik taggubuk, gubuki wa fia. Ay nu sik tagfoyung, famoyungi wa fia. 8Ay nu sik tagfaksvn tibak taw at amatanganan, faksvni wa fia. Ay nu sik takamon, famoni sas fagdaul tam fagmakatuun. Ay nu sik funan, ugatani fia funani. Ay nu sik takafanyu, afanyui fia useganani.
9Matuyani tua nu kedkesugan am. Aurii at mauri, ay esugi at masine. 10Edkesugani kata nu sik duksayan am. Ay masuyui tua sas galay am at sadi. 11Dangay mamomuy nu bunway maseganamai tua nu gfaning am tam Fun sas fagdaul ay amatanganan. 12Useganani aroro e fagsegun tuam. Ay agwantani tua ay fagidapun. Ay kabavn darangini. 13Gubuki tua Dius at ngay taw at ke fagayudanun. Kabavn mafalganani nu gfasakbo am ay betaw at yud e fagtaglayunan. 14Darangini te, Dius gfon at masine sa sangay tagfakamulun sa ayu at mauri. Darangini ay lag am glong te, “Dius faurii anya!” 15Useganani gasfuan ngay taguseganan, ay waywayi gasfuan ngay tagwayway. 16Ugalii tua manabayan sas galay am at sadi. Lag am kamatungudun nu bunway fasudsunani yangay dewa tagafalingunan fag ngay taw. Lag am gamatangan te, amamatanganan tuam ay iba.
17Lag am gfasud at mauri dewa e nafakamulun sa ayu at mauri. Ugatani tua ugalii tagfauseganan sas fagayu taw. 18Manabayani tua sas fagayu taw kafanud ay fagmakatuun. 19Ku ngay fakesugun, lag am gfasud tagfauri ayu, nu bunway fabayani wan Dius at namasud. Aroro katatuy at Rirukan te,
“Tam Fun nalong te, ‘Au waban tagfasud, ay au waban tagfafoli.’ ”#12:19 Deuterunumyu 32:35.
20Abat ngate am gfasud,
“Ay fawayan nu kalunus way, fafangoni,
ay nu kadanum way, fainumi.
Nu katanya tua ay fakamulun, gfaplan am anya.”#12:20 Fangatulun 25:21,22.
21Dangay am gababawan at mauri, nu bunway baboi tua at mauri siginan nu gfakamulun am at masine.
Currently Selected:
Ruma 12: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
