Tap 27
27
Selufead at ngay Baguina
1Selufead e ngay baguina: Makla, Nua, Ugla, Milka ay Tirsa. Selufead, Kefer at baguina ay Gilyad at fufu. Gilyad, Makir at baguama ay Manase at fufu. Manase, Use at baguama. 2Ay kafag ngay baguina nalao sas Yawi at sakbawan bale ay anlindug sas Muisis, ay sas Elyasar, ay sa sangay tagfangguna ay sas fagayu at maful at daga salubangan. Kafag ngay baguina nalong te, 3“Em mama anbul sis talun at yud e taw ay wa nke baguama. Kanya doma nanangalo Kura gina kamabo Yawi, at faginbulun siginan way at sadili asalanan. 4Ay wain? O nunda ban em mama at ngayan kalyam wan siginan Israel at kasugfunanan aroro kanya wa nke baguama? Foni yangay emi sik afud daga kata nu gfon am sa em kaiban.”
5Nu katanya, Muisis nalong sas Yawi kafag ngay baguina at fagetun. 6Yawi nalong sas Muisis te, 7“Matuyan Selufead at ngay baguina at nalong. Masine nu gfon am sa anya fagayu sik afud daga magamut sit mama at ngay kaiban. Foni sa kafag ngay baguina at mama at afud fag daga.
8“Ay longi sa sangay taw Israel te, ‘Sik taw nu nbul wa nke baguama, foni sat baguina at afud fag daga. 9Ay sik taw at yud anke baguina, foni at afud daga sat faduksay fag ngay mangama. 10Ay nu dway e faduksay mangama, foni at afud daga sat ngay sai sat mama baliwa. 11Ay nu dway e sai sat mama baliwa, foni sat munakbang fag kalongan, ay kanya ban at nangagbilug kafag daga. Ay ngay taw Israel masine nu gfaning takatanya laman sik faugali, kata ku suguan sa emu.’ ”
Nafili Uswe Fantubus Muisis
Deu 31:1-8
12Sanya ginan, Yawi nalong yangay sas Muisis te, “Undaudi sas buksul Abarim ay banawani ku nafon sa sangay taw Israel fag talun. 13Ay nu nabanawan wo kafag talun, kabul wo kata am kaka Arun. 14Aroro gina ngay taw Israel nafamabo angku sis bubun tagsis Sin fag talun at yud e taw, am fag duksay wam nafaning ku suguan ayu laman namasure am ku kamasinean sa sangay taw.” (Kanya fag bubun nafangayan te, Meriba, sis Kades sis Sin fag talun at yud e taw.) 15Muisis nalong sas Yawi te, 16“Yawi, siginan way emu fagayu taw at leleg, ay nu masine sa emu, filii sik taw tagfangguna anya fagayu, 17ay kanya yangay ban tagfangguna nu namawayan, laman am ngay taw di kata at yud e galaga fag ngay tupa.”
18Nu katanya, Yawi nalong sas Muisis te, “Fauroi Uswe, Nun at baguama, aroro si anya Dius at Falad, ay folii am daluap sat alfuyu. 19Ay falindugi anya sas tagfon fanggalangun Elyasar ay sat fagayu taw at maful at daga salubangan, ay foyungi sa anya fagayu te, kanya wan am nafili laman fantubus emu. 20Foni sa anya tiba am fagmabalyananun laman fagayu taw Israel gfaning anya. 21Ay kanya sumaful ku algan siginans Elyasar gina gagbilug Urim#27:21 Urim: sik fanginsaful Dius at algan. laman ginsaful sa ku daga salubangan. Siginan Elyasar at longan Uswe ay ngay taw Israel namawayan ay guli tua.”
22Muisis nafakamulun Yawi at suguan sa anya. Kanya nafauro Uswe ay nafalindug sis Elyasar fag tagfon fanggalangun ay si sangay taw Israel at daga salubangan. 23Ay kata Yawi at suguan sa anya, Muisis nafasas Uswe at tungud alfuyu at daluap ay nafoyung te, Uswe wan tagtubus anya.
Currently Selected:
Tap 27: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
