Lebitiku 27
27
Nu Gbangsi Nusnga setaw fag Fanggalangun laman sas Yawi
1Yawi nasugu Muisis 2laman nanlong sa sangay taw Israel te,
“Nu nafon wan sik taw sas Yawi laman sik fanggalangun nu gfafasludan sik fatuyanan, masine yay gfon nusnge wain laman gbul kanya fag taw 3-7at famayad nu sik salapi, kafag salapi at kayuan kata ngay tagfon fanggalangun nu gfabudbungguan salapi:
siginan sik magdanun sitsigons ufatk banwa,
nu sik mangama: limak sanbung salapi,
nu sik mangena: tuluk sanbung salapi;
siginan limak banwa sitsigons labi siamk banwa,
nu sik mangama: duak safuluk sanbung salapi,
nu sik mangena: safuluk sanbung salapi;
siginans duak safuluk banwa sitsigons limak safulu e siamk banwa,
nu sik mangama: limak safuluk sanbung salapi,
nu sik mangena: tuluk safuluk sanbung salapi;
siginans unumk safuluk banwa sat tungud baliwa,
nu sik mangama: labi limak sanbung salapi,
nu sik mangena: safuluk sanbung salapi.
8“Ay at ke fatuyanan fag taw nu sik yud way e kwa ay kanya way makatu gfon nu seyu at nalong fag famayad, kanya gtaban sa sangay tagfon fanggalangun at nafatigwanan fag taw laman sas Yawi, ay ngay tagfon fanggalangun wan taglong famayad kata at ke fatuyanan at fagmakatuun.
9“Ay at nafatuyanan nu sik fagbaugun at masine laman at fanggalangun sas Yawi, Yawi wan tagagbilug. 10Kafag taw wa masine ya gfabangsi dewa at famangsi amasine yap tua. Ay nu nafabangsi way, at fanggalangun anggan at famangsi fag fagbaugun, Yawi wan tagagbilug. 11Ay sik fanggalangun fag fagbaugun nu e fakasaitun ay way masine laman sik fanggalangun sas Yawi, kanya gbuba at fanggalangun fag fagbaugun sa sangay tagfon fanggalangun. 12Ay tagfon fanggalangun glingaman kafag fagbaugun te, o masine ay duan, ay kanya fag tagfon fanggalangun glong nu seyu kanya fag fagbaugun nu kabayad. 13Ay at ke fanggalangun nu kaylat way gbayad at fanggalangun, kanya gfamut at famayad duak safuluk afud.
14“Ay sik taw at fanggalangun sas Yawi nu sik bale, tagfon fanggalangun nanlingaman yay kafag bale te, o mogat yay ay mannga duan ya, ay kanya fag tagfon fanggalangun glong nu sefanud kanya fag fanggalangun nu kabayad. 15Ay tagbilug nu kaylat way gbayad at fanggalangun fag bale, kanya gfamut at famayad duak safuluk afud.
16“Ay sik taw at fanggalangun sas Yawi nu at daga wan at fagtainan at nafon anya, tagfon fanggalangun glong kafag daga at famayad nu seyu nu gbvtang; nu sik saku kafag daga nu gbvtang, at famayad duak safuluk sanbung salapi. 17Ay kanya nu gfon at daga laman at fanggalangun nu nlangfe gina gfalfas ay gfafoli fag banwa, kayu yangay kanya nu kabayad. 18Dewa katanya, kanya nu gfon at fanggalangun fag daga nu nlangfe way gina gfalfas ay gfafoli fag banwa, tagfon fanggalangun gfoyung at famayad yud kayu ebi ginan, nu seyu way lang kbanwa at sawad, yakmay andasug sat fadogan gina gfalfas ay gfafoli fag banwa. 19Ay tagbilug daga nu kaylat way gbayad at fanggalangun fag daga, kanya gbayad at daga ay gfamut yay duak safuluk afud. Ay gfafoli wan sa anya at daga. 20Dewa katanya, kanya nu nafabayad way sa tibak taw at daga ay ginanya kanya yay nabayad, kanya ban wa mabul ya at daga. 21Ay nu ndasug wan nu gfalfas ay nu gfafoli fag banwa, Yawi gagbilug wan kafag daga, ay at ke daga wa mabul ya. Ay kanya ban ngay tagfon fanggalangun wan at daga.
22“Ay sik fanggalangun nu sik nabayad way fag daga, 23tagfon fanggalangun glong kanya fag daga nu kabayad, nu seyu yak banwa yakmay andasug gina gfalfas ay gfafoli fag banwa. Kanya fag taw masine nu gbayad. Ay Yawi wan tagagbilug at famayad. 24Ay nu ndasug wan gina gfalfas ay gfafoli fag banwa gfafoli wan kanya fag daga sa tagagbilug.
25“Famayad ngay fanggalangun laman sas Yawi, kabyat ngay salapi tagsi sangay tagfon fanggalangun at famabudbungguan.
26“Yawi wan tagagbilug fagayu fagbaugun at riangan taguna, dewa baka ay tupa, kanya bunwa sik fanggalangun ya, aroro sia wan tagagbilug. 27Dewa katanya, at fagbaugun nu dway masine laman sik fanggalangun. Kanya gbayad wan at fanggalangun, ay gfamut yay duak safuluk afud. Dewa katanya, at ke fanggalangun nu dway kaylat gbayad, ngay tagfon fanggalangun gfabayad wan kanya fag fanggalangun nu seyu at nalong nu kabayad.
28“Fagayu fagagbilugun laman sas Yawi, wa masine ya gfabayad ay wa yangay masine ya gbayad, kanya dewa sik taw, sik fagbaugun, ay sik daga at fagtainan at nafon anya, aroro kanya fagayu Yawi wan tagagbilug. 29Ay nu sik taw at fanggalangun sas Yawi, lag gbayad anya. Fabuli wan.
30“Yawi wan tagagbilug fagayu gutluan taguna. 31Ay sik taw nu kaylat way gbayad at fanggalangun fag gutluan taguna, kanya masine nu gbayad nu seyu kanya fag fanggalangun nu kabayad, ay kanya gfamut yay duak safuluk afud. 32Ay nu natap am ay ngay baka, ngay tupa ay anggan ay kambing, foni wan at fasafuluk afud laman sas Yawi. 33Lag gfili ay lag gfabangsi ya. Nu nafabangsi wayam, anggan at famabangsi fag fagbaugun, Yawi wan tagagbilug.”
34Kanya Yawi at ngay suguan at nalong sas Muisis sis Buksul Sinay laman sa sangay taw Israel.
Currently Selected:
Lebitiku 27: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
