Lebitiku 26
26
Famonun sas Fagayu at Mafaning
Deu 7:11-24, 28:1-14
1“Lag am kawat tibak fagsegan kata ngay tawtawan, ngay famamatang fag ngay gang, ay mannga sik gang takata sik taw laman fagnansegan, aroro au wan ay Dius Yawi.
2“Faningi ku ngay suguan ayu sa baliwas Famiangalay fag Menit ay famafanudi tua ku bale. Au Yawi.
3“Ay nu gfaning tua ban am fagayu ku ngay suguan ay ku ngay faugali, 4gfaarak ktua ban gugat galay abagat laman ngayu tua ay gutluan, ay ngayu yangay ngay fun kayu at ngay rawvg. 5Nu katanya, gruyus tua ban am gugat ngay rawvg yakmay andasug fanggutluan wat ubas, ay anggan ban andasug sat fadogan fag fananuman. Ay kabavn ban ngayu tua ay fakonun, ay manabayan tua ban am si ay talun.
6“Gfae fagmanabayanun kban sa ay talun, nu katanya, manabayan tua ban nu gtiug am. Gfayayu kban tagfangagat fag ngay mela si ay talun, ay wa ban e namawayan ayu. 7Am way ban at namawayan ay ngay fawayan ay gbabo tua ban am. 8At lima ban si ayu gbabo way sik sandank fawayan, ay sik sandan ban, gbabo sik safuluk libuk fawayan. 9Gdiri kban ay gfayu ayu laman ban umfasludan ku fatuyanan sa ayu. 10Ay fakonun ay gutluan yay egbanwa, ay e fagbulun yayam siginan ay fagsuadan laman gfaungbus am ay gutluan. 11Gbanwan kban gasfuan ayu ay kwa ban gfabayan ayu. 12Gufud kban gugat ayu, ay au ban ay Dius, ay kabavn ban gtuyan au te, am wan ku ngay taw. 13Au wan ay Dius Yawi, at nafalfas ayu siginans talun Igiptu, laman diam gafagsuguanan ya sa sangay taw Igiptu. Nafalfas kwan ayu, nu katanya, wam e fakaplaun ya.
Faurianan sa sangay Taw Takamabo
Deu 28:15-68
14-15“Dewa katanya, nu dway ban am gdungugan angku, ay gfaning ku ngay suguan ay ku ngay faugali, wam nafaning tam nasadian. 16Nu katanya, katatuy ban ku fakamulun sa ayu: Sat maksvn fag fakalimuun umlipsik am, aroro gfadasug kban sa ayu fakasaitun at yud ya kafia, ay sik ragnat tagfadulum ay mata ay tagfamomuy ay bilug. Gtanum ban am, dewa katanya, wa ban am e gutluan, aroro ay ngay fawayan ban namawayan ayu ay gbul fagayu ay gutluan. 17Gfabayan kban ay fawayan nu gbabo ayu, ay kanya ban fagayu gagbilug ayu. Ay at kaksvnan ban nu kalimu am gtadtaruyan ban am glagyu, dewa yud e gfafalo ayu. 18Ay nu dway ban am gugat gdungugan angku, namaurianan kban ayu fitu ginan. 19Namalyam kban ay fakamatungudunun siginan nu gfadasug au sa ay talun sik fan-gong, nu katanya, umgong ban ay ngay gamasun. 20Wa ban e fanambagun ay ngay nainlufuyan, aroro wa ban e rawvg ay ngay tanuman, ay wa yangay ban e rawvg ay natanum fag fun kayu.
21“Ay nu gfataglayun way ban nu kamatungudunun am, ay way ban am gdungugan angku, gfamut kyay ban fitu ginan ku faurianan ayu. 22Namadasug kban sa ayu tagsis talun fag ngay mangilafang ay gfabul ban ay ngay sisian anggan ay ngay fagbaugun. Nu katanya, wa ban am ngayu ya, ay wa yangay ban ngayu ya taglao sa ay ngay dalan.
23“Ay nu dyay ban am gdungugan ay gfaning angku, 24au wan ay fawayan ay namaurianan au ayu fitu ginan. 25Gfadasug kban sa ayu ay ngay fawayan laman namaidapan ayu aroro wam nafaning tam nasadian. Dewa ban am nasuksuan sa ay furuan, gfaurianan kyay ban fia ayu, ay gafabulunan ban am namababaun sa ay ngay fawayan. 26Wa ban kasakan ya ay fakonun, nu katanya, sadi wayk fagdafugan safuluk mangena at fagfatamaan tinapay, ay kafag tinapay nangafudan yayam. Gfangon oma ban am dewa katanya wam kapsug.
27“Ay nu dyay ban am gdungugan ay gfaning angku, 28kadotama kban ay namawayan ayu, ay namaurianan kban ayu fitu ginan. 29Gfae fanlunus kban si ay talun ay gafabulunan ban am kon ay sadili sisian. 30Nanrasras kwan ay ngay fagnansegan ay ay fagirugan famaebebanglu fag fanggalangun tagsi sangay buksul. Gukas kban ay ngay bilug sa ay ngay tungud fagsegan at yud gleleg, ay gaiyan kban ayu. 31Nanrasras kban ay ngay furuan ay ay ngay fagnansegan. Ay kwa ban kaylat ya ay fanggalangun at anus at mabebanglu. 32Nanrasras kban ay ngay talun ay ay ngay fawayan ban at nangagbilug ayu, kadulo. 33Umke awayan ban maksvn si ayu laman grasras ay furuan, ay namasaruayan kban ayu sa sangay talun. 34-35Gina ban ay ngay fawayan nataban ayu sat ngay talun, ay gina ban yud e gbanwan ya si ay talun, ay talun ban manabayan wan, aroro kaduge am gbanwan sanya wam batang gfaragangan dewa sis famiangalay fag banwa. Ay katsi long gina am si ay fagatabananan, ay talun gragangan tua.
36-37“Ay am ban at sawad at natabanan sa ay ngay fawayan at ngay talun, gfadasug kban sa ayu at maksvn fag fanlimu. Ay kalimu ban am dewa ban sik don way tagreres gina gtagmara, ay deyud ban e gfafalo ayu glagyu am kata nu e namabul ayu. Ay kaduge am glagyu, gdaddalusungan am, nu katanya, wa ban am mafawayan ay ngay fawayan. 38Ay kabul ban am si ay ngay fawayan at talun. 39Ay at sawad ban si ayu gsadsadian kabul aroro sa ay ngay asalanan ay sa ay ngay mangaguyang at ngay asalanan.
40-41“Aroro nafamabo am angku, nafawayan au ayu, ay nafataban sa ay ngay fawayan. Dewa katanya, nu gfoyung tua ban am ay ngay asalanan ay ay ngay mangaguyang at ngay asalanan, ay nu ddi ban am kamatungudun ya, ay nu nagwantan tua ban am ngay faurianan aroro sa ay ngay asalanan, 42gfafasludan kban ku nasadian sa ay ngay mangaguyang: Abrayam, Isak ay Akub, ay gfafoli kban ayu sa ay talun. 43Dewa katanya, nangaiyan kyay ban ayu siginan ay talun, aroro nafamabo am ku ngay faugali ay ku ngay suguan. Laman ban ay talun gragangan yay kaduge am yud sanya. 44Dewa katanya, dewa kban namaurianan ayu, kwa ban gfataglayun gaiyan ayu dewa am gbanwan si ay ngay fawayan at talun. Kwa ban gfamin ayu aroro namafasludan kban tam nasadian. Au wan ay Dius Yawi. 45Gfafasludan kban ku nasadian sa ay ngay mangaguyang, ku nafalfas siginans talun Igiptu, laman gfasaful au sas fagayu talun at taw te, au wan at Dius. Nafakamulun au takatanya sa ay ngay mangaguyang laman gfasaful au sa anya fagayu te, au wan at Dius. Au Yawi.”
46Katanya Yawi at ngay fagaloan at ngay faugali ay at ngay foyungan, Muisis at nalong sa sangay taw Israel sis Buksul Sinay.
Currently Selected:
Lebitiku 26: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
