Uswe 18
18
Nu Gafud Tibak Talun
1Ngay taw Israel nu naago wan kafag ngay talun, kanya fagayu anful sis Silu, ay nawat Yawi at bale. 2Fitu yak kasugfunanan at yud yay e talun. 3Nu katanya, Uswe nalong sa sangay taw Israel te, “Ginain ya ban nu nangagbilug am at sawad fag talun, Yawi, ay ngay mangaguyang at Dius, at nafon ayu? 4Sas galay sik kasugfunanan filii tuluk taw ay nansugu au anya fagayu laman nanginsaful at sawad fag talun. Sanya ginan, kanya fagayu kafoli sa angku gbuba sik fagaloan at nawat tagfoyung te, katanya ban nu gafud kanya fag talun. 5Afudi sas fitu kanya fag talun, dewa katanya, Uda at kasugfunanan namanwan way sis siun fag alvngvdan ay Use at kasugfunanan si way baliwas wala fag alvngvdan. 6Nu nariruk wam kafag fagaloan nu gafud sas fituk talun, bubai sa angku, ay gfafidfilian kwa vtv sas Yawi tam Dius at daga salubangan, nu inda ban fag afud talun ku fon sas galay sik kasugfunanan. 7Dewa katanya, ngay taw Lebi we afud at talun, aroro kanya fagayu at fakamulun sik tagfon fanggalangun. Gad, Rubin ay Manase fag wabilug kasugfunanan e kwa wan ngay afud talun sas fakamenitan baliwa Liskung Urdan, aroro sanya fag talun Muisis, Yawi at fagsuguan, nafon wan sa kafag ngay kasugfunanan.”
8At nafili fag ngay taw nu galoun wan, Uswe nalong sa anya fagayu te, “Nanlag am fagdaul talun ay awati sik fagaloan. Sanya ginan, afolii ste sa angku sas Silu laman gfafidfilian kwa vtv sis Yawi at daga salubangan te, inda ban kanya fag ngay kasugfunanan at mesa afud talun.”
9Nu katanya, kanya fag ngay taw nalao wan laman nanginsaful kanya fag talun. Ay kanya fagayu nawat sik fagaloan, laman gafud sas fitu tagsanya fag ngay furuan. Sanya ginan, kanya fagayu anfoli wan sas Uswe sas Silu. 10Ay nu ntabu gfafidfilian sis Yawi at daga salubangan, Uswe nafae talun ngay taw Israel at kasugfunanan at yud yay e talun.
Benamin at Kasugfunanan at Nagbilug fag Talun
11Taguna fag afud anfon sas Benamin at kasugfunanan. Kanya fag talun sis Uda ay Use at wabilug. 12Ay kafag talun at fatuan sas wala fag alvngvdan baliwa, gfasigad siginans Urdan ay gtaglayun sas wala fag alvngvdan furuan Eriku fag buksul. Sanya ginan, gtagbung sas fakayabian baliwa ngay buksul sitsigons Bet-Aben fag talun at yud e taw. 13Sanya ginan, gtaglayun sas Lus (at ngayan yangay te, Betel), at siun fag alvngvdan. Ay sanya ginan gtagbung sas Atarut-Adar, sas buksul tagsis siun fag alvngvdan Tangababa fag Bet-Kurun. 14Sanya ginan, sas fakayabian fag buksul tagsalubang sas Bet-Kurun gtaglayun sas fasiunan fag alvngvdan baliwa. At fatuan sas Kiryat-Baal (at ngayan yangay te, Kiryat-Earim), sik furuan daul Uda at fagagbilugun. Kanya at fatuan sas fakayabian baliwa.
15At fatuan sabaliwas fasiunan fag alvngvdan siginans Kiryat-Earim, ay gtaglayun sa sangay bulbug Neftua sas fakayabian baliwa. 16Ay gtagbung sas fun buksul tagsis aturunan datag Ben-Inum. Kanya fag datag sis wala fag alvngvdan datag Refaim. Sanya ginan, gtaglayun sas datag Inum, sas siun fag alvngvdan baliwa ngay taw Ebus at furuan ay gtaglayun yay sas En-Rugel. 17Ay kabaraud sas wala fag alvngvdan tagsas talun En-Semes ay sas Gelilut sis aturunan dalan Adumim. Sanya ginan, gtagbung sas Buan at fagagbilugun fag Gang. (Buan, Rubin at baguama.) 18Ay gtaglayun sas wala fag alvngvdan buksul tagsalubang datag Urdan#18:18 datag Urdan: sas Ebreu, Araba. ay datag Bet-Arba. 19Sanya ginan, gtaglayun sas wala fag alvngvdan Bet-Ugla fag buksul, ay at fugungan sas Liskung Urdan at fungfung, sit fakataban Dagat at Mabulan.#18:19 Dagat at Mabulan: sas Ebreu, Dagat at Mayat. Ay kanya at fugungan Liskung Urdan sas alvngvdan. Kanya at fatuan sas siun fag alvngvdan baliwa. 20Ay at fatuan sas fakamenitan, Liskung Urdan.
Sanya wan Benamin at ngay kasugfunanan at fatuan talun.
Benamin at Kasugfunanan at Nagbilug fag ngay Furuan ayu Daul
21Kayu tuy ngay furuan ayu daul at nafon sas Benamin at kasugfunanan ay at nafud sat ngay kalongan: Eriku, Bet-Ugla, Emek-Kesis, 22Bet-Araba, Semaraim, Betel, 23Abim, Para, Ufra, 24Kefar-Amuni, Ufni, ay Geba. Benamin fag kasugfunanan nagbilug kanya fag labi duak furuan daul ay anggan sanya fag ngay furuan ayu sirut. 25Ay nagbilug yangay Gibyun, Rama, Beerut, 26Mispa, Kefira, Musa, 27Rekem, Irpeel, Tarala, 28Sela, Aelef, Ebus, (at ngayan katsi te, Erusalem), Gibya, ay Kiryat-Earim. Ay nagbilug kafag wan labi ufatk furuan ayu daul anggan sanya fag ngay furuan ayu sirut.
Kayunya Benamin at kasugfunanan at nagbilug fag talun ay at nafud sat ngay kalongan.
Currently Selected:
Uswe 18: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
