Uswe 14
14
Nu Gafud Talun tagsis Urdan at Fakayabian
1Katatuy nu gafud Kanaan fag talun sa sangay taw Israel. At nafud, Elyasar fag tagfon fanggalangun, ay Uswe, Nun at baguama, ay taw Israel at ngay tagfangguna. 2Kata Yawi at longan sas Muisis, kanya fagayu nafud kafag talun sa kafag siam ay sik wabilug kasugfunanan laman at fagagbilugun, siginan nu gfafidfilian. 3-4Muisis nafon wan sas dua ay sik wabilug kasugfunanan talun tagsis Urdan at fakamenitan. (Use at kasugfunanan ankafud dua, Manase ay Efraim.) Wa nafae afud talun sas Lebi at kasugfunanan, dewa katanya, kanya nafon sa anya sik ngay furuan laman at fagbanwanan ay sik daga laman at fagfafangonan at ngay fagbaugun. 5Katanya nu gafud kafag daga kata Yawi at suguan sas Muisis.
Nafon sas Kaleb Furuan Kebrun
6Sik menit, sik ngay taw siginans Uda fag kasugfunanan nalo sas Uswe sis Gilgal. At sadi Kaleb, Efune at baguama, siginans Kenis fag gaban. Kanya nalong sas Uswe te, “O gamatang yay o Yawi at nalong sat fagsuguan Muisis sabaliwa anta gina tam sis Kades-Barnea? 7Ku banwa ufatk safulu gina Muisis gsugu angku siginans Kades-Barnea laman nanginsaful ste fag talun, ay nalong au sa anya at matuyan, fagayu ku nalag. 8Dewa katanya, ku ngay ufud nafalimu way tam ngay taw. Ay au nafaning ktua Yawi. 9Nu katanya, ginanya fag menit, Muisis nafatuyanan sa angku te, ‘Aroro matuyan nu gfaning o Yawi, sawa ban fia emu ay sam ngay kasugfunanan am fagsanyaan fag talun.’
10“Kata Yawi at fatuyanan, kanya nadiri tua ku leleg kaduge ufatk safulu e limak banwa siginan nu glong katanya sas Muisis, gina ngay taw Israel glulian sis talun at yud e taw. Dasug katsi gleleg kyay, katsi ku banwa waluk safulu e lima, 11dewa katanya, ku fagmabitsugun kata yay gugat ebi gina Muisis gsugu angku. Dasug katsi makatu kyay fia gfawayan. 12Katsi foni wan sa angku, Yawi at nafatuyanan ebi sa angku fag talun ke ngay buksul. Ay nasaful o te, ngay taw Anak gbanwan sanya sit ngay furuan ayu daul at mogat at ke ngay alad. Dewa katanya, siginan Yawi at fanggubukun, mafaiyan au kanya fag ngay taw siginan at talun kata at fatuyanan sa angku.”
13Uswe nafauseganan Kaleb siginan nu gfon anya furuan Kebrun laman at fagagbilugun. 14Dasug katsi, kanya gagbilug furuan Kebrun aroro Kaleb matuyan tua nu gfaning Yawi, Israel at Dius. 15Ay ebi, Kebrun at ngayan te, Kiryat-Arba, laman sik famamatang te, sas Anak at ngay kasugfunanan, Arba wan takadungug.
Ay anragang wan nu gawayan si sangay taw Israel at talun.
Currently Selected:
Uswe 14: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
