Uswe 13
13
At Fagnangagbilugun yay fag ngay Talun
1Uswe nu mafufuama wan, Yawi nalong sa anya te, “Mafufuama wo ay ngayu yay ay fagnangagbilugun fag ngay talun. 2Kayu ya tuy ngay talun ay fagnangagbilugun ban: Filistia ay Gesur at ngay talun, 3ay sik afud talun Kanaan, siginans Liskung Sikur sis talun Igiptu at fakamenitan, sas wala fag alvngvdan Ekrun, kataip wan Filistia at furuan fag lima: Gasa, Asdud, Askelun, Gat ay Ekrun; ay ngay taw Abim at talun 4sas siun fag alvngvdan; ngay taw Kanaan at talun siginans Meara, ebi ngay taw Sidun at talun, anggan sas Afek, ay ngay taw Amur at talun; 5ay anggan ngay taw Gebal at talun, ay fagdaul Lebanun sas fakamenitan baliwa, siginans Baal-Gad sis fun Buksul Ermun, sitsigons Lebu-Kamat; 6ay anggan yangay ngay buksul siginans Lebanun anggan sas Misrefut-Maim, ngay taw Sidun at talun.
“Ay gina ban am gfawayan, gaiyan au ngay tagbanwan sanya fag ngay talun. Ay afudi fia kanya fag ngay talun sa sangay taw Israel laman at fagagbilugun ban, kata ku suguan sa emu. 7Afudi sas siamk kasugfunanan ay sa sik wabilug Manase at kasugfunanan.”
8Muisis, Yawi at fagsuguan, nafon wan sas Rubin ay Gad at kasugfunanan, ay sik wabilug Manase at kasugfunanan, at afud sis Urdan at fakamenitan. 9Kanya fagayu at talun siginans Aruer sas tigyangan Liskung Arnun (kataip sanya fag datag at furuan sis wabilug) anggan datag Medeba sitsigons Dibun, 10ay sas fun Sikun, ngay taw Amur at fun at furuan fagayu, (ebi Sikun gfunan sis furuan Kesbun), sitsigons ngay taw Amun at fatuan talun. 11Ay kataip yangay Gilyad ay ngay furuan taw Gesur at fagbanwanan ay ngay Maaka ay fagdaul Buksul Ermun, ay fagdaul Basan sitsigons Saleka. 12Kanya fag ngay talun fun Ug tagsis Basan at fagagbilugun. Kanya ebi gfunan sas Astarut ay Edrei, Ug at sadi at kinsawad fag ngay taw Refa. Muisis nababo anya ay naago at talun. 13Dewa katanya, ngay taw Israel wa nafaiyan ngay taw Gesur ay ngay taw Maaka, nu katanya, kanya fagayu gfagamutan yay ngay taw Israel gbanwan dasug katsi.
14Muisis wa nafae afud daga sas Lebi at kasugfunanan laman at fagagbilugun. At fagagbilugun ngay fanggalangun wan laman sas Yawi, kata Yawi at suguan sas Muisis.
15Katatuy Muisis at nafon fag talun sas Rubin at kasugfunanan, nafud sat ngay kalongan: 16kafag talun siginans Aruer sas tigyangan Liskung Arnun (kataip furuan sis wabilug datag) ay fagdaul datag Medeba, 17ay antaip yangay Kesbun ay fagayu furuan sanya fag datag: Dibun, Bamut-Baal, Bet-Baal-Meun, 18Yaas, Kedemut, Mefaat, 19Kiryataim, Sibma, Seret Saar tagsis buksul sis wabilug datag, 20Bet-Peur, ay buksul Pisga, Bet-Esimut, 21ay fagayu furuan sis datag, fun Sikun, ngay taw Amur at fun, at fagagbilugun ebi. (Ebi fun Sikun gfunan sis furuan Kesbun.) Ebi Muisis nababo fun Sikun, anggan ngay taw Midyan at ngay fun: Ibi, Rekem, Sur, Kur, ay Reba. Kanya fagayu gfagadgalangan fun Sikun ay gbanwan sit talun. 22Ngay taw Israel nafabul yangay Balaam, Beur at baguama, sik taw tagfangabalo. 23Liskung Urdan, Rubin fag kasugfunanan at fatuan daga. Kafag ngay furuan at nafon sas Rubin at kasugfunanan ay nafud sat ngay kalongan. 24Tuy Muisis at nafon fag talun sas Gad at kasugfunanan, ay nafud sat ngay kalongan: 25Aser ay fagayu furuan ayu daul tagsis Gilyad, ay sik wabilug taw Amun at talun sitsigons Aruer munakbang sis Raba. 26Magamut yangay ngay talun siginans Kesbun sitsigons Ramat Mispa ay Betumin, ay siginans Makanaim sitsigons talun Lu-Debar. 27At fagagbilugun yangay datag Urdan ay Bet-Aram, Bet-Nimra, Sukut, Safun, fun Sikun, furuan Kesbun at fun at fagagbilugun ebi, ay sas Liskung Urdan at fakayabian sitsigons tigyangan Lino Galilea.#13:27 Lino Galilea: sas Ebreu, Kineret. 28Ay nafon sas Gad at kasugfunanan ay nafud sat ngay kalongan kanya fag ngay furuan ayu daul ay furuan ayu sirut.
29Tuy Muisis at fon fag daga sas Manase fag wabilug kasugfunanan, ay at nafud sat ngay kalongan. 30Siginans Makanaim ay fagdaul talun Basan, fun Ug at fagfagtainanan ay Yair fag unumk safuluk furuan sirut sis Basan, 31sik wabilug Gilyad, ay Astarut ay Edrei, tagsis Basan fag ngay furuan fun Ug at fagfagtainanan. Kanya fag talun at nafon sas Makir, Manase at baguama at kasugfunanan sik wabilug kalongan.
32Katatuy Muisis nu gafud daga gina sis datag Muab sis Eriku at fakamenitan sis dife Urdan. 33Muisis wa nafae afud daga sas Lebi at kasugfunanan laman at fagagbilugun, aroro at fagnangagbilugun ban Yawi wan Israel at Dius, kata at nafatuyanan sa anya fagayu.
Currently Selected:
Uswe 13: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
