Ub 24
24
Ub Ginto sabaliwa Dius nu Gfaurianan
1Wain Dius at fagyudun gfalganan sik menit laman namaurianan at mauri fag ngay taw? Wain ngay taw tagtoglag anya fagyudun glag nu gfaurianan fag menit?
2At mauri fag ngay taw gfangago at ngay iba at daga siginan nu gfalin at fantaba. Kanya fagayu gfangkamul at ngay iba at fagbaugun ay namagamut sat ngay fagbaugun.
3Kanya fagayu nafangkamul at yud e fagtainan ya at asnu, ay gbul sik fagbubayun at baka at famaguna famayad at bedan.
4Kanya fagayu gfaidapan ngay taw at yud e kwa, nu katanya, kanya fagayu gsuksuan gugat.
5Kanya fagayu nanrvbvy at fakonun sas talun at yud e taw, kata sik ngay asnu tagsisad talun, aroro kanya fagayu we fagnamulan ya fakonun laman sat ngay sisian.
6Ay kanya fagayu kamuyutan naglangfean fag ngay raug sa sangay gamasun, anggan sa sangay taw mauri at tanuman wat ubas.
7Ay nu nyabi wan kanya fagayu gina gtiug karios, aroro we lanbung ya ay we umut.
8Kanya fagayu gintimusan way lang sisad arak ay kedkenbungan sisad luib, aroro we fagsarirungan ya.
9At mauri fag taw gago ngay fagbubayun at ngay sisian, ay gago ngay tagidapan fag ngay mangena at ngay sisian laman famangsi at ngay bedan.
10At yud e kwa glo we lanbung ay ginlunusan gbuba at ngay futusan fare, ay kaksvn nya kalunus yay.
11Ay kanya fagayu gintvs oma gugat ulibu ay ubas at rawvg, dewa katanya, kadanum yay gugat.
12Ay sis furuan daul ngay taw tagakabulun gfandeng, ay at natayukan fag ngay taw guro get gubuk. Dewa katanya, Dius wa ggubuk.
13E ngay taw kauri yamag, ay wa kaylat glao sat mayamag.
14Takamabul fag taw, mayabas nu kafulo, ay namabul tagidapan ay tagayudan fag ngay taw, ay nu nyabi wan, kanya nanfangkamul.
15Ngay tagfanugtug gfanya nu kayabi laman we glag anya. Kanya gtaup at kamatan laman we gtoglag anya.
16Gina mayabi ngay tagfangkamul nansakbo sa sangay bale, ay galay menit, gsuksuan way aroro wa gananad sad yamag.
17Kanya fagayu nangayan dulum te, Mayamag, aroro kabavn kanya fagayu at fakaylatun sa ways fagmadulumun.
18At mauri fag taw masakit nu kalyam kata way sik bura sis tungud mamam. Dius nafauri wan kanya fag ngay taw at fagagbilugun fag ngay daga, nu katanya, we malao ya sanya dewa sat tanuman ubas.
19Nu setain at marios fag mamam nu kalyam aroro siginan at masugba fag baksak, katanya yangay ban tagasalanan fag ngay taw kalyam ste ginan sdaga.
20Kanya fagayu nalyam wan, ay dewa at mina wa gamatang ya anya fagayu. Ay ngay ulud ban nangon wan anya fagayu, ay umkamin kata sik fun kayu at mafuanan.
21Aroro kanya fagayu gfalingun tagaranas fag ngay mangena ay anggan ngay fagbubayun.
22Siginans Dius at fagmabalyananun, gfaurianan wan at mabalyanan fag ngay taw, kanya fag ngay taw dewa mabitsug, wa gtuyan at leleg.
23Dius kaylat way kanya fagayu nu gbanwan manabayan, ay aroro mangaro gulit way at ngay fakamulun.
24Sik kadugayun sirut Dius gfabayan kanya fag ngay taw nu gbabo, dewa katanya, kanya fagayu masakit way kalyam kata sik barugwak takalangke, ay kata sik nagbiluganan fare.
25Ku longan nu dway kasakan, sinu ro at mafatuyan te, kamuag kway, ay sinu at malong te, gsalan kway?
Currently Selected:
Ub 24: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
