Esra 4
4
E Nasalag nu Kawat Yawi at Bale
1Taw Uda ay taw Benamin at ngay fawayan nu nasaful te, at kinfoli siginan at fagatabananan gdog wan nangawat Yawi at bale, 2kanya fagayu nasas Serubabel ay sa sangay tagfangguna ngay talananan, ay nalong te, “Ggubuk ami ayu kawat Yawi at bale, aroro gseg yangay ami ay Dius kata ay fakamulun. Ngaduge wan nu gfon ami em fanggalangun sa anya, siginan yay Esarkadun nu gfunan talun Asirya, ay kanya yay at nataban emi stae.”
3Dewa katanya, Serubabel, Eswa, ay ngay tagfangguna ngay talananan nabalus te, “Sirus, Persya at fun nasugu emi te, ‘Fadogi yap awati Yawi at bale.’ Dewa katanya, wam masine ggubuk emi kawat sik bale laman sa em Dius, ami yakman lang takawat laman sas Yawi, Israel at Dius.”
4Nu katanya, kanya fagayu nafalimu ay nafamomuy te, sia tua at dan gbanwan sanya fag daga laman wa mafataglayun nu kawat Yawi at bale. 5Ay kanya fagayu nafon famayad sas Persya at ngay tagfangguna laman gsalag ngay taw Uda at algan. Kanya fagayu gfataglayun at fakamulun takatanya gina Sirus gfunan sis talun Persya yakmay Daryu at fun sanya fag talun.
Nu Gsalag nu Kawat Yawi at Bale gina Artaserses Gfunan
6Gina Akasuerus gfasigad gfunan, ngay taw Erusalem ay tiba yak taw Uda at ngay fawayan nariruk sik ngay fanlonganan sabaliwa anya fagayu. 7Ay gina Artaserses Persya at fun, Bislam, Mitredat, Tabeel, ay tiba ya nariruk yangay sa anya sas Aram fag fangaringang.
8-11Ay Rekum fag fun sirut si sik afud talun ay Simsay fag tagriruk, nariruk yangay sas fun Artaserses laman gsalag ngay taw Israel. Katatuy at rirukan:
Em fun Artaserses, ami am ngay fagsuguan iste fag afud talun Eufrates ay em ngay faudgufudan fag ngay funan ay fag ngay tagfangguna, ay ngay taw sis Tripulis, Persya, Irik, Babilunya ay anggan ngay taw Elam tagbanwan sis furuan Susa, ay Usnapar, Asirya at fun at mabalyanan ay takadungug at nataban fag ngay taw.
12Em fun, kaylat ami gfasaful sa emu te, ngay taw Udyu gdog yay kawat furuan Erusalem. Ay tagbanwan sanya at mauri way ay takamabo. Kanya fagayu andasug sanya siginan am fagagbilugun fag talun. Kanya fagayu nafasine wan alad ay anggan fagfatungkudan turuk. 13Em fun, kanya ban fagayu nu nafadog way nawat ay nafasine kafag furuan at ngay alad, wa ban gfon ya at ngay famonun ay wa ban gfon ya sa emu famayad ay tiba yak fagbayadun ay kalay waban am ramraman.
14Em fun, aroro am fagsuguan yangay ami, wami kaylat nu e fakaplaun o. 15Namarvbvy ban o am ngay mangaguyang at ngay rirukan, nu katanya, sumaful o te, siginan ebi ngay taw tagbanwan sis furuan Erusalem kamabo ngay fun, ay kanya wan at faginfauriananun. Kanya fag furuan anrasras wan aroro gfauri way tibak fun ay tibak furuan. 16Em fun, gfasaful ami sa emu te, nu nafadog way ban nawat tuy fag furuan ay nafasine at ngay alad wa ban o e fagagbilugun ya sis fakayabian baliwa Liskung Eufrates.
17Ay fun Artaserses nabalus anya fagayu te,
Griruk au sa ayu, Rekum fag fun sirut, ay Simsay fag tagriruk ay sas fagayu tagbanwan sis Samarya ay anggan sa tibak talun sis Liskung Eufrates at fakayabian baliwa. Ginsaful au ayu te, o manabayan tuam?
18Ay nafadasug sa angku fag rirukan e nafalin sa em fangaringang ay natap sa angku. 19Nafarvbvy au ngay rirukan, ay natuyan au te, anud glugo wan Erusalem nu gfabadbaboan at ngay fun. Kanya fag furuan kamabo way siginan ebi. 20Nasaful kyangay siginan kafag ngay rirukan te, tibak fun gagbilug furuan Erusalem ay get famayad ay tiba yak fagbayadun sat mabalyanan fag ngay fun tagfunan sas fagdaul afud talun tagsis Eufrates at fakayabian.
21Katsi, sugui te, faragangi kanya fag ngay taw nu gfadog kawat at furuan yakmay kban gsugu. 22Fakamuluni wa vtv takatanya laman ku fagfagtainanan di gafaurianan.
23Ay nu natap wan fun Artaserses at rirukan sas Rekum ay sas Simsay ay anggan sat ngay ufud, kanya fagayu nalao wan sas Erusalem ay nafabulun ngay taw Udyu te, faragangi wan nu kawat at furuan.
24Nu katanya, nafaragang yay nu kawat Dius at bale sis Erusalem sitsigons faduak banwa Daryu nu gfunan sis talun Persya.
Currently Selected:
Esra 4: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
