Esra 3
3
Nu Kawat at Bagu fag Fagirugan Fanggalangun
1Ay gina sis fafituk magdanun ngay taw Israel nu gbanwan sit ngay furuan, kanya fagayu anful sas Erusalem. 2Sanya ginan, kanya fagayu nadog yay nawat sik fagirugan fanggalangun laman sas Israel at Dius kata at marirukan fag Faugali Dius at nafon sat fagsuguan Muisis. At nawat kafag fagirugan, Eswa, Usadak at baguama ay ngay tagfon fanggalangun, ay Serubabel, Sealtiel at baguama ay anggan at ngay kalongan. 3Ay kanya fagayu dewa kalimu ngay taw at dan gbanwan sanya fag talun, nafawat tua kafag fagirugan siyay gugat ebi at fakawatan. Nu katanya, galay balabag ay fafun kanya fagayu girug at ngay fanggalangun sas Yawi.
4Kanya fagayu kaful yangay laman sas fagmafulun sabaliwa nu Kawat ngay Fayag kata at marirukan fag suguan sis Muisis at fafil. Ay kanya fagayu nafon at fagirugun fag ngay fanggalangun, kayu menit ginanya fag fagmafulun. 5Ay saman ya at fagirugun fag ngay fanggalangun at nafon sbalabag ay sfafun, kanya fagayu gfon yangay ngay fanggalangun galay fagmafulun sabaliwa Magdanun nu Bagu Kasure, ay sa tiba yak fagmafulun sa nu gseg Yawi. Ay kanya fagayu gfon yangay at ngay fanggalangun at yud fabulunan sas Yawi. 6Gina taguna fag menit sis fafituk magdanun ginanya fag banwa, ngay taw Israel gfasigad wan nu gfon at fagirugun fag ngay fanggalangun, dewa yud nafasigad kawat ngay fagtungkudan turuk.
Nu Gdog Kawat Yawi at Bale
7Ngay taw Israel nafon salapi at famayad sa sangay tagfasine gang ay sa sangay takawat bale. Ay nafon yangay ngay fakonun, fanginum, ay bantika laman at fon sa sangay taw Sidun ay sa sangay taw Tiru, laman at famayad ngay kayu sidru tagsiginans Lebanun. Ay nafasakay kafag ngay kayu sa sangay sakayan lino ay nafadasug sas Upa. Ay Sirus, Persya at fun, naylat.
8Ay gina sis faduak magdanun sis faduak banwa siginan ngay taw Israel nu kafoli sas Erusalem, kanya fagayu nafasigad nu kawat Dius at bale. Ay fagayu at kinfoli sas Erusalem siginan at fagatabananan ggudgubukan gfakamulun, ay gfakamulun yangay sanya Serubabel, Sealtiel at baguama, ay Eswa, Usadak at baguama, ay ngay tagfon fanggalangun. Ay kanya fagayu nafili ngay taw Lebi tagduak safulu at banwa sat tungud baliwa laman gfangguna gina gfakamulun. 9Ay Eswa talamean ay at ngay kalongan, ay Kadmiel talamean, nagubuk yangay nu gfangguna ngay takawat Dius at bale. Kanya fagayu Uda at ngay kasugfunanan. Ay Kenadad fag taw Lebi at ngay kalongan nagubuk yangay anya fagayu.
10Ay ngay tagfakamulun nu ntabu wan nu kawat Yawi at bale at fagtungkudan turuk, ngay tagfon fanggalangun nafalganan laman nanguyup at ngay budyung. Ay kanya fag ngay tagfon fanggalangun nasulun at ngay lanbung. Ay Asaf at ngay kasugfunanan fag ngay taw Lebi nafalganan yangay laman namawang ngay fagfadkalinganun laman gfauseganan Yawi, kata fun Dabid at foyungan sa sangay taw Israel. 11Sanya ginan, kanya fagayu gseg ay gfauseganan Yawi, ay galubad te, “Yawi matuyan aroro nu kesug ngay taw Israel di e fakatabuan.” Ay fagayu taw maksvn nu guro gfauseganan Yawi, aroro antabu wan nu kawat Yawi at bale at fagfatungkudan turuk. 12Ay sanya yangay at mafagtainan fag ngay tagfon fanggalangun, anggan ngay taw Lebi, ay tagfangguna ngay talanan at nalag Yawi at bale taguna. Tiba maksvn nu gwayway kabalu, ay tiba guseganan guro nu nalag Yawi at bale at fagfatungkudan turuk nu ntabu. 13Wa kasaful ya ngay taw at ngay uro ay nu gwayway, ay dewa ngayayu kadungug way.
Currently Selected:
Esra 3: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
