Nu Galin 6
6
1Nu katanya, Yawi nalong sas Muisis te, “Katsi ro, lumag o ku fakamulun sas Igiptu at fun. Aroro siginan ku fagmabalyananun, kanya ro wa gfatawad ku ngay taw nu glao ste ginan, abat ngate, gfabulun gaiyan.”
2Ay Dius nalong yay fia sas Muisis te, “Au Yawi. 3Ansure au sas Abrayam, sas Isak ay sas Akub siginan nu gfatoglag au te, ‘Au Dius at mabalyanan.’ Dewa katanya, kwa nafoyung sa anya fagayu te, ku ngayan Yawi. 4Gina kanya fagayu gbanwan sis talun Kanaan kata sik ngay betaw, nawat au sik nasadian sa anya fagayu te, gfon kban sa anya kafag talun. 5Nadungug au ngay taw Israel nu gidapan gafagsuguanan ngay taw Igiptu ay namatang au ku nasadian sa ay ngay mangaguyang.”
6“Nu katanya, longi sa sangay taw Israel te, ‘Au wan Yawi. Gfalfas kban ayu siginans fagidapun ay siginan nu gafagsuguanan am sa sangay taw Igiptu. Siginan ku fagmabalyananun, maksvn fag faurianan ku fagnamadasugun sa sangay taw Igiptu. Ay gfalangfe kban ayu. 7Ay nafili au ayu laman ku ngay taw, ay au wan ay Dius. Ay sumaful am te, au Yawi at nafalfas ayu siginan nu gafagsuguanan am ngay taw Igiptu. 8Ay namadasug kban ayu sas talun Kanaan, sa ku nafatuyanan sa ay mangaguyang Abrayam, Isak, ay Akub. Gfon kban ayu talun Kanaan laman ay fagbanwanan. Au Yawi.’ ”
9Sanya ginan, Muisis nalong sa sangay taw Israel Yawi at longan, dewa katanya, kanya fagayu wa gdungugan anya aroro at amatanganan anmomuy wan siginan at ngay fagidapun.
10Nu katanya, Yawi nalong sas Muisis te, 11“Loi wan ay nanlong o sas Igiptu at fun te, ‘Aylati wan ngay taw Israel nu glao siginan am talun.’ ”
12Dewa katanya, Muisis nalong sas Yawi te, “Ngay taw Israel wa kaylat ya gdungugan angku, kaugat wa ro Igiptu at fun nu yud gdungugan. Ay sarokta wa masnug nu garingang au!”
13Yawi nalong sas Muisis ay sas Arun te, “Nanlong am sa sangay taw Israel ay sas Igiptu at fun te, nasugu au ayu laman tagfangguna ngay taw Israel glao ste ginans talun Igiptu.”
Muisis ay Arun at ngay Mangaguyang
14Kayu tuy Israel at ngay gaban at ngay mangaguyang:
Israel at baguama tiba kaka Rubin, ay Rubin at ngay baguama: Anuk, Palu, Kesrun, ay Karmi. Kanya fagayu ay at ngay kalongan, Rubin at kasugfunanan.
15Ay Simyun at ngay baguama: Emwel, Amin, Uad, Akin, Sukar, ay Syaul. (Syaul, Simyun at baguama sit mangena tagsiginans Kanaan.) Kanya fagayu at ngay talnayan, Simyun at kasugfunanan.
16Lebi at ngay baguama kata at kasugfunanan nu gdaddaganan: Gersun, Kuat ay Merari. Ay Lebi nu gleleg sadik sandan tuluk safulu e fituk banwa.
17Gersun at ngay baguama: Libni ay Simei.
18Kuat at ngay baguama: Amram, Isar, Kebrun ay Usyel. Kuat nu gleleg sadik sandan tuluk safulu e tuluk banwa.
19Merari at ngay baguama: Makli ay Musi. Katanya Lebi at ngay baguama nu gdaddagan kata at ngay mesa gaban.
20Amram namangena Ukebed at mama at faduksay. Ay at ngay baguama: Muisis ay Arun. Ay Amram nu gleleg sadik sandan limak safulu e fituk banwa.
21Isar at ngay baguama: Kura, Nefeg, ay Sikri.
22Usyel at ngay baguama: Misael, Elsafan, ay Sitri.
23Arun andadwa sas Eliseba, Aminadab at baguina, Naksun at faduksay. Arun at ngay baguama: Nadab, Abyu, Elyasar, ay Itamar.
24Kura at ngay baguama: Asir, Elkana ay Abiasaf. Kafag ngay talanan siginans Kura.
25Arun at baguama Elyasar andadwa sas Putyel at baguina at sadi. Ay at baguama Finekas.
Kayu tuy at ngay talananan at ngay mangaguyang tagsiginans Lebi at ngay gaban.
26Ay duksay Arun ay Muisis, kanya wan Yawi at nasugu te, “Tabani ngay taw Israel siginans talun Igiptu gadgaloan galay at mesa kasugfunanan.” 27Kanya fag dua at nanamakamatoan Igiptu at fun laman gfalfas ngay taw Israel siginans talun Igiptu.
Yawi Nasugu Arun laman Nanlong Muisis at Fagalongunun
28Gina Yawi nafakamatoan Muisis sis talun Igiptu, 29nalong sa anya te, “Au Yawi. Nanlong o sas Faraun, Igiptu at fun, fagayu ku nalong emu.”
30Dewa katanya, Muisis nalong sas Yawi te, “Wa fia masnug nu garingang au, nu katanya, Igiptu ro at fun wa gdungugan angku.”
Currently Selected:
Nu Galin 6: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
