Nu Galin 5

Duksay Nanamakamatoan Igiptu at Fun

1Ay sanya ginan, Muisis ay Arun nalao sas Igiptu at fun ay glong te, “Katatuy Yawi, ngay taw Israel at Dius, at longan: ‘Falaoi ku ngay taw laman kanya fagayu mananseg tua angku.’ ”

2Ay Igiptu at fun nalong sas Muisis te, “Sinu nunda Yawi? Ay wain ro ku fagdunguganun anya laman ro ngay taw Israel glao? Kwa toglag Yawi, ay kwa gfalao ngay taw Israel ste ginan.”

3Muisis ay Arun gbalus te, “Ngay taw Israel at Dius ansure sa emi. Nu katanya, aylati nu glao ami kaduge tuluk menit sas talun at yud e taw laman namon ami fanggalangun ay nanseg ami Yawi em Dius, aroro nu dway ro mi nasanya, kanya gfabul emi siginans fakasaitun ay mannga sas awayan.”

4Dewa katanya, Igiptu at fun nalong way te, “Muisis ay Arun, wain ay fagfasalagun kafag ngay taw nu gfakamulun? Afolii wan sa ay fakamulun! 5Damai, ay kaiban ngayu wan, dewa katanya, nafaragang am nu gfakamulun.”

6Ginanya fag menit, Igiptu at fun nasugu at ngay tagfafakamulun ay anggan yangay tagulit fag ngay taw Israel ay nalong te, 7“Lag gfon ya sa sangay taw Israel ngay nagbiluganan fare laman fangawat gang,#5:7 gang: sa tibak longan tisa. Damai 1:14. fabayani wa anya fagayu at nanrvbvy fangawat. 8Dewa katanya, fakayui tua gugat nya ay fagnamawatun ngay gang sas galay at sadi. Kanya fagayu mangaro mamomuy! Kanya wan at fagurunganun get sa angku te, ‘Falfasi wan anya laman namon fanggalangun sat Dius.’ 9Fafakamuluni at mabyat sa anya fagayu laman kaugat yay nu gasalagan ay nu yud gdungugan ngay fakamuaganun.”

10Nu katanya, Igiptu at fun at ngay tagfafakamulun ay tagulit fag ngay taw Israel nananlong sa sangay taw Israel te, “Igiptu at fun nasugu te, wami gfon ya ayu ngay nagbiluganan fare. 11Am wan at nanfanrvbvy dewa nday, dewa katanya, fakayui tua gugat nyak gang ay fagnangawatun.” 12Nu katanya, ngay taw Israel nasaruayan laman nanrvbvy nagbiluganan fare sas fagdaul talun Igiptu. 13At ngay tagfafakamulun gfabanganan anya fagayu ay glong te, “Fakayui tua gugat nyak gang ay fagnangawatun kayu menit, kata ebi gina ami gfon ayu ngay nagbiluganan fare.” 14Ay sanya ginan, taw Igiptu at ngay tagfafakamulun nafalang ngay taw Israel fag ngay tagulit ay ginto te, “Wain egmenit ay katsi at fagyudun kayu ya ebi ginan ay nawat gang?”

15Ay Israel fag ngay tagulit nasas Igiptu at fun ay nananfamayud te, “Wain fakatanyaun ay fakamulun sa emi am ngay fagsuguan? 16Am ngay fagsuguan wa gfon ya emi nagbiluganan fare, ay dewa katanya, gfabulun emi te, ‘Awati ngay gang,’ sarokta gfalang ya emi. Kanya yay fagayu at ke malong!”

17Ay Igiptu at fun nalong te, “At kamomuy am! Kanya wan ay faglongun gugat te, ‘Falaoi wa emi laman manamon ami fanggalangun sas Yawi.’ 18Afolii wan sa ay ngay fakamulun! Wami gfon ya ayu ngay nagbiluganan fare. Dewa katanya, fakayui tua gugat nya ay fagnangawatun gang.”

19Aroro siginan Igiptu at fun at suguan te, “Fakayui tua gugat nyak gang kayu menit,” tagfangguna fag ngay taw Israel namatangan te, at kaidap. 20Kafag ngay tagfangguna gina siginans Igiptu at fun, nalag Muisis ay Arun gfanya anya fagayu. 21Ay kanya fagayu nalong sas duksay te, “Yawi nangus gfaurianan ayu. Aroro siginan ayu Igiptu at fun ay at ngay tiba tungud fag ngay tagfakamulun nu gdama emi kata waymi lang sik nakaurian, ay kanya fagayu e fagmafanlonganun wan laman gfabul emi.”

Dius at Fatuyanan te, Gfalangfe ngay Taw Israel

22Muisis anfoli sas Yawi ay gdarangin te, “Ku Fun, wain am fagfaidapanun am ngay taw? O am fagnasuguun angku laman kanya fagayu gdalan takatanya? 23Siginan nu nansalubang au Igiptu at fun laman nanlong sa anya am ngay longan, kaugat way kanya nu gfaidapan am ngay taw ay wo e nafakamulun laman gfalangfe anya fagayu.”

Currently Selected:

Nu Galin 5: OCCT

Highlight

Copy

Compare