2 Krunika 9
9
Talun Syeba at Fun fag Mangena Nanansibo fun Sulumun
1Fn 10:1-13
1Talun Syeba at fun fag mangena nu nadungug sabaliwas fun Sulumun, kanya andasug sas Erusalem laman namaskud Sulumun siginan at maidap fag ngay fagintoun. Kafag mangena andasug gadgaloan at ngay fagsuguan ngayu, ay e tabanan yangay ngay kamelyu gbuba ngay famaenamnam fakonun, ay ngayuk gintu, ay at mafanud fag ngay gang. Ay kanya nu ndasug sas Sulumun, nainto fagayu at fagyaintoun sa anya. 2Ay Sulumun nabalus fagayu at fagintoun, ay we yud nafafayamag fagayu nusnge wain at fagintoun sa anya. 3Ay talun Syeba at fun fag mangena andulo maksvn nu nadungug Sulumun at fagsafulun, ay nu nalag at nafawat fag bale, 4ay at ngay fakonun tagsit fagfangonan, ay at ngay fagsuguan ay at ngay tagfangguna at ke ngay lanbung masine, ay at ngay tagtalin fanginum, ay at fagirugun fag ngay fanggalangun sis Yawi at bale.
5Ay kanya nalong sas fun Sulumun te, “Matuyan tua ngaro ku nadungug fag barita gina au si ku talun sabaliwa am ngay fakamulun ay am fagsafulun. 6Aro taw kwa gafanud yakmay au nalag fia. Anud, ku nadungug bunya sik wabilug ku nalag katsi, ay am fagsafulun gtungud tua ku nadungug ebi. 7Mauseganan tua am ngay fagsuguan taggubuk gugat emu, ay gdungugan am ngay longan at mamatanganan. 8Segi Yawi am Dius aroro nafili emu laman sik fun laman sa anya. Aroro am Dius kesug ngay taw Israel, ay kaylat nu gbanwan kabavn, kanya nafasik fun emu sa anya fagayu, laman namakamulun tuo at masine ay at matuyan.”
9Ay kanya nafon sas fun Sulumun ufatk libuk fabudbungguan gintu, ngayuk famaenamnam fakonun, ay at mafanud fag ngay gang. We mafasud at kayuan at nafon anya fag ngay famaenamnam fakonun.
10Fun Kiram ay fun Sulumun at ngay fagsuguan e buba gintu siginans Ufir, magamut ngayuk kayu at masine, ay at mafanud ayu daul fag ngay gang. 11Kafag ngay kayu at masine Sulumun at fangawat at bale ay Yawi at bale at agdan, ay fangawat ngay fagfawangun ke ngay bakyang laman ngay tagfawang at fagfawangun. Ay siginan ginanya dasug katsi wa batang ya e kayu takatanya sis Uda.
12Ay fun Sulumun nafon sas talun Syeba at fun fag mangena fagayu at fagetun. Ay at nafon ayu yap tua at nafon anya. Sanya ginan kafag mangena ay at ngay fagsuguan noli wan sat talun.
Sulumun at ngay Ramraman
1Fn 10:14-29
13Galay banwa e gfon sas Sulumun duak safulu e tuluk libuk fabudbungguan gintu, 14saman ya ngay tagfabangsi at famayad. Ay talun Arabya at ngay fun, ay ngay afud talun Israel at ngay fun gfon yangay anya ngay gintu ay sanbung salapi.
15Ay fun Sulumun nafawat duak sandank tagbiak famalabag gina gawayan, at masifigan at mabebean fag gintu. Galay sik famalabag masifigan fituk fabudbungguan gintu. 16Ay nafawat yangay tuluk sandank talay fag famalabag, ay galay at sadi masifigan tuluk fabudbungguan gwabilug gintu. Ay Fun Sulumun nafasakbo kafag ngay famalabag sat bale at ngayan te, Araw Lebanun.
17Ay kanya nafawat yangay at fanfunan fag faglunggungan at mawatan elipanti at bagang, ay nasifig gintu at yud e suglat. 18Ay kafag faglunggungan at kabatan unumk fagsiadan gtudtungudan, ay e fagfatungkudan darafa mawatan siginans gintu. Ay sis dua tigyangan ke fagfafatungkudan take, e duak liun gsumbalian malindug. 19Ay e labi dua yangayk liun sis dua fungfung galay fagsiadan. Ya batang e takatanya nusnga nday fag fagfagtainanan. 20Fun Sulumun at taya fagayu mawatan siginans gintu ay fagayu fagagbilugun tagsit bale at nafangayan te, Araw Lebanun, mawatan yangay siginans gintu. Fagayu we mawatan siginans sanbung salapi, aroro salapi wa bangan mafanud gina fun Sulumun gfunan. 21Ay fun Sulumun e ngay sakayan lino yangay tagbuba at ngay famaloun, ay tagfakamulun sanya Kiram at ngay fagsuguan. Ay kafag ngay sakayan lino nu kafoli sadi ginan way galay tuluk banwa, ay e buba: gintu, salapi, elipanti at bagang, ay ngay amayan talay ay tagbia.
22Ay fagayu fun sas fagdaul daga we mafasud fun Sulumun at fagsafulun ay at fagmaramramanun. 23Ay kanya fag ngay fun gyalagun Sulumun laman nandungugan sabaliwa at fagsafulun Dius at nafon anya. 24Galay banwa at nansibo anya e buba famonun at mawatan salapi, ay gintu, ay ngay lanbung, ngay fagagbilugun sas awayan, ngay famaenamnam fakonun, ngay kabayu ay ngay mola.#9:24 mola: Fagbaugun takata sik kabayu. At mama sik asnu ay at mina sik kabayu.
25Sulumun e ufatk libuk fagfasakboan at ngay kabayu ay at ngay faguyudan fangawayan. Ay kanya e labi duak libuk tagsaful gsakay sis kabayu, tiba si sangay furuan ay nafasakbo sat nafawat fag fasakboan ngay faguyudan ay tiba si ways Erusalem. 26Kanya nagbilug fagayu fun siginans Liskung Eufrates, sitsigon ngay taw Filistia at talun, ay sitsigons fungfung talun Igiptu. 27Ay gina Sulumun gfunan, ngay salapi sis Erusalem at kamafanudan kata way lang ngay gang, ay ngay kayu sidru ngayu kata ngay almuyu tagsis fun buksul. 28Sulumun at ngay kabayu siginans talun Igiptu, ay siginan yangay tibak talun.
Sulumun nu Kabul
1Fn 11:41-43
29Ay tiba at kinfasludan gina Sulumun gfunan, siginan nu gfasigad gfunan sitsigons fakatabuan, marirukan sis taglong Natan at fagrirukan, ay sis Akya fag taw Silu at foyungan, ay si yangay taglong Iddu at foyungan, tagfoyung yangay sabaliwa Erubuam, Nebat at baguama, nu gfunan. 30Ay Sulumun gfunan Israel sis Erusalem kaduge ufatk safuluk banwa. 31Ay kanya nu nbul, nanamoli anya sat mama Dabid at furuan. Ay at baguama Reubuam at natubus anya laman sik fun.
Currently Selected:
2 Krunika 9: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
