2 Krunika 8
8
Fun Sulumun at Nafawat Tiba
1Fn 9:10-28
1Kaduge duak safuluk banwa, Sulumun nafawat at bale ay anggan Yawi at bale. Nu ntabu wan, 2kanya nafadog yay nafawat fun Kiram at nafon sa anya fag ngay furuan, ay nafabanwan sanya ngay taw Israel. 3Ay ginanya yangay Sulumun nu namawayan ay gagbilug furuan Kamat-Suba. 4Ay kanya nafadog yay nafawat furuan Tadmur sis talun at yud e taw, ay fagfungsuan ngay gutluan tagsis Amat. 5Kanya nafaogat sit tungud ay sit daga baliwa fag afud furuan Bet-Kurun. Ay kanya nafae alad, ay nafae ngay famatawad sakbawan. 6Katanya yangay at nafakamulun sis furuan Baalat, ay fagayu at furuan fagfungsuan gutluan, ay at fagfasarirungan ngay kabayu ay faguyudan fag sakayan gina namawayan. Sulumun nafawat yangay nusnga setaw at fakaylatun sis Erusalem ay sis Lebanun ay fagdaul at fagfunanan fag talun.
7-8Ay e sawad yay sanya fag talun at yud taw Israel fag ngay gaban, ngay taw Israel at yud nafabul gina gagbilug Kanaan fag talun. Kanya fag ngay taw sik ngay taw Amur, ngay taw Ket, ngay taw Peres, ngay taw Kib ay ngay taw Ebus. Sulumun nafagsuguan anya fagayu ay nafabulun gfafakamulun, ay kanya fagayu sik ngay fagsuguan dasug katsi. 9Ay Sulumun wa nafagsuguan nusnga sinu fag taw Israel. Sarokta, kanya nafili kanya fagayu laman at ngay tagfawayan, tagfangguna at ngay tagfawayan, ay ngay tagfangguna at ngay tagsaful gsakay sis faguyudan, ay sis kabayu. 10Ay fun Sulumun nafili duak sandan limak safuluk taw, laman tagfangguna at ngay tagfakamulun.
11Nu ntabu wan Sulumun at nafawat fag bale laman sat bubay, Igiptu at fun at baguina, kanya nafalin anya sanya fag bale siginans Dabid at furuan. Aroro kanya nalong te, “Ku mangena wa masine gbanwan sis fun Dabid at bale, aroro kanya fag bale we malong, ay ebi ataw sanya Fagsuadan Yawi at Nasadian.”
12Sanya ginan, Sulumun nafon at ngay fagirugun fag fanggalangun sis salubangan Yawi at bale. 13Kanya nafafasludan kata Muisis at suguan: at fagfonun kayu menit, ay galay Famiangalay fag Menit, ay fagmafulun sabaliwa Magdanun nu Bagu Kasure, ay galay banwa fag tuluk fagmafulun: fagmafulun sabaliwa Tinapay at yud e Famabia, fagmafulun sabaliwas Fanggutluan, ay fagmafulun sabaliwa nu Kawat ngay Fayag. 14Ay kata at mama Dabid at fakamulun kanya nafainkafudan ngay tagfon fanggalangun, ay taw Lebi laman gfakamulun at ngay mesa fakamulun. Kanya nafili ngay taw Lebi laman tagfangguna ngay taw gina gfauseganan Dius, ay kanya fagayu ggubuk yangay ngay tagfon fanggalangun nu gfakamulun kayu menit. Ay kanya nafainkafudan yangay ngay tagulit sis Yawi at bale at ngay sakbawan, aroro katanya Dabid, Dius at fagsuguan, at suguan. 15Sulumun ay at ngay fagsuguan nafaning fun Dabid at suguan fagayu, sabaliwa ngay tagfon fanggalangun, ay sa sangay taw Lebi ay sa sangay fagfungsuan ramraman.
16Ay antabu wan Sulumun nu gfawat Yawi at bale siginans fagfatungkudan turuk yakmay antabu.
17Sanya ginan, Sulumun nalao sas Esyun-Geber ay Elat tagsis tigyangan Dagat Maraska, sis talun Edum. 18Ay fun Kiram nafasanya ngay sakayan lino ay at ngay fagsuguan tagsaful gfalao kanya fag ngay sakayan, laman ggubuk Sulumun at ngay taw. Ay kanya fagayu gfalao kafag ngay sakayan lino sas talun Ufir ay nabuba sanya ginan labi ufatk libuk fabudbungguan gintu ay nafadasug sas fun Sulumun.
Currently Selected:
2 Krunika 8: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
