1 Krunika 19
19
Dabid Nababo ngay Taw Amun ay Taw Aram
2Sa 10:1-19
1Abandi, Nakas, ngay taw Amun at fun, anbul. Ay at baguama Kanun at natubus anya laman at fun. 2Ay Dabid nalong te, “Namakamulun au at masine sas Kanun aroro at mama nafakamulun at masine sa angku.” Nu katanya, Dabid nasugu at ngay fagsuguan laman namasaful sas Kanun te, kanya kabalu yangay sat mama at nabulan. Ay Dabid at ngay fagsuguan nu ndasug sa sangay taw Amun at talun, 3ngay taw Amun at ngay tagfangguna nalong sas fun Kanun te, “O gafanud o te, Dabid nasugu at ngay fagsuguan laman namasun emu sam mama at nabulanan? Duan! Kanya nasugu at ngay fagsuguan laman nanlabgaban ay nanrasras tam talun.”
4Nu katanya, Kanun nasugu sat ngay fagsuguan te, “Gamati Dabid at ngay fagsuguan.” Ay kanya fagayu nagamat ay naufo at ngay umi ay nagirat at ngay lanbung siginan at fagwan sat daga baliwa ay nafauli wan. 5Ay Dabid at ngay fagsuguan kapla guli aroro sat kinfasludan sa anya. Ay Dabid nu nasaful takatanya, kanya nasugu ngay tagfosuk longan laman nanlong sat ngay fagsuguan te, “Banwani yap sis Eriku yakmay nadog natugbung ay ngay umi, ay sanya ginan, ulii wan.”
6Ay ngay taw Amun namatangan te, nafauri Dabid. Nu katanya, kanya fagayu nafon tuluk safulu e limak libuk fabudbungguan salapi laman at famayad ngay faguyudan ay ngay tagsaful gsakay sis faguyudan siginan sangay furuan Aram-Naaraim, Aram-Maaka ay Suba. 7Ay nu fagayu wan at ngay faguyudan ay at ngay tagsaful gfaguyudan, tuluk safulu e duak libu. Ay Maaka at fun anggan at ngay tagfawayan nanangalo yangay anya fagayu. Ay kanya fagayu namaful munakbang sis Medeba. Ay anggan ngay taw Amun nafalganan yangay ay naduksun siginan at furuan laman namawayan. 8Ay Dabid nu nasaful ngay taw Amun at algan, kanya nasugu Uab ay fagayu at ngay tagfawayan laman namawayan. 9Ay ngay taw Amun anful sit day furuan at sakbawan laman namawayan, ay at nanangalo anya fag ngay fun anful sis datag.
10Ay Uab nu nalag te, e ngay fawayan sit salubangan ay sit faguyanan, kanya nafili sik ngay tagfawayan tagsaful fia, ay nafangguna anya fagayu laman namawayan ngay taw Aram. 11Ay kanya nafili yangay at faduksay Abisay laman gfangguna namawayan ngay taw Amun. 12Ay Uab nalong sas Abisay te, “Nu nalag ro wo ngay taw Aram nu gababoun way emi, gubuki emi, ay ngay taw Amun ro nu gbabo way ayu, nanggubuk yay ro ami ayu. 13Fabitsugi ay amatanganan! Ay namawayan tam sas fagdaul tam fagmabitsugun laman sa tam ngay taw ay sa tam Dius at ngay furuan. Ay Yawi namakamulun nusnge wain at algan te, masine.”
14Nu katanya, Uab ay at ngay tagfawayan nanamawayan, ay ngay taw Aram nalagyu. 15Ay ngay taw Amun nu nalag te, ngay taw Aram glagyu wan, kanya fagayu nalagyu yangay siginans Abisay, Uab at faduksay, ay nasakbo sat furuan. Ay Uab ay at ngay tagfawayan noli wan sas Erusalem.
16Ngay taw Aram nu nalag te, ngay taw Israel nababo anya fagayu, kanya nafauro tibama fag ngay tagfawayan tagsis dife Liskung Eufrates laman ggubuk anya, ay tagfangguna kanya fagayu Sufak, fun Adadeser at fun tagfawayan.
17Ay Dabid nu nasaful fun Adadeser at algan, nafaful Israel at ngay tagfawayan fagayu laman namawayan, ay nadife Liskung Urdan ay nafalganan laman nansalubang ngay taw Aram. Ay kanya fagayu nawayan. 18Ay ngay taw Aram nalagyu ngay taw Israel. Ay Dabid ay at ngay tagfawayan nafabul fituk libuk tagsaful gsakay sis faguyudan ay ufatk safuluk libuk tagfawayan. Ay nafabul yangay Sufak fag fun tagfawayan. 19Ay Adadeser at ngay fagsuguan nu nalag te, ngay taw Israel nababo wan, kanya fagayu nanangasadi sas Dabid ay ansik ngay fagsuguan. Ay sanya ginan, ngay taw Aram wa kaylat ya ggubuk ngay taw Amun.
Currently Selected:
1 Krunika 19: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
