1 Krunika 16
16
1Ay kanya fagayu nafasakbo Fagsuadan Dius at Nasadian sas Dabid at nafawat fag bale ramit, ay nafon sas Dius at fagirugun fag ngay fanggalangun ay anggan ngay fanggalangun laman sas fagmanabayanun. 2Ay Dabid nu ntabu gfon at ngay fanggalangun, kanya nafadante ngay taw sas Yawi at ngayan. 3Ay kanya nafon tinapay, yamas, ay pasas sa sangay taw Israel, mangama man ay mangena.
4Ay Dabid nafili ngay taw Lebi laman tagfakamulun sas Fagsuadan Yawi at Nasadian laman gdarangin, gseg ay gfauseganan Yawi, Israel at Dius. 5Ay Asaf tagfangguna anya fagayu ay kanya yangay tagfawang ngay fagfadkalinganun. Ay at fadogan Sakaryas, Eyel, Semiramut, Eiyel, Matitya, Elyab, Benaya, Ubed-Edum ay Eyel. Kanya fagayu tagfawang fagfawangun ke ngay bakyang. 6Ay Benaya ay Akasyel fag tagfon fanggalangun at namawang gugat ngay budyung sis salubangan Fagsuadan Dius at Nasadian.
Dabid at Famauseganan fag Alubad
Alb 105:1-15, 96:1-13, 106:1,47-48
7Ginanya fag menit, Dabid nafon sas Asaf ay sat ngay ibama fag ngay taw Lebi tuy fag alubad laman famauseganan Yawi:
8Fagayu am, fauseganani Yawi, ay darangini sa anya.
Ay foyungi yangay sa tibak talun at ngay taw at ngay nafakamulun.
9Alubadi fauseganani anya, ay longi at ngay nafakamulun at madulo
10Segi anya, tam Dius at yud e malong.
Fagayu am at kinkakbang sas Yawi, useganani tua.
11Akbangi sas Yawi, ay afanudi te, siginan tua anya fagmabitsugun, ay masadii tua gugat sa anya.
12-13Am, Dius at ngay nafili, ay Akub, Dius at fagsuguan at ngay kasugfunanan, amatangi tua gugat Dius at ngay nafakamulun at madulo, ay at ngay balyawvtan.
14Sia wan Yawi tam Dius.
Ay kanya wan fagdaul daga at fun.
15Kanya di kalyam at nasadian, at nafatuyanan laman sas fagayu kasugfunanan,
16at nasadian sas Abrayam, ay sas Isak.
17Ay nafatuyan yangay sas Akub, ay anggan sat ngay kasugfunanan te, at nasadian ban gfataglayun tua kabavn.
18Kanya nalong sas galay at sadi te, “Gfon kban sa ayu ay sa ay ngay kasugfunanan talun Kanaan.
Kanya ban fag talun ku fagnamagbilugun sa ayu.”
19Dius nalong takatanya sa anya fagayu, gina kanya fagayu yay yud ngayu, ay sik ngay betaw sis talun Kanaan.
20Kanya fagayu gadgalinan sa tiba tibak talun.
21Dewa katanya, Dius di naylat kanya fagayu nu gafagsuguanan.
Nu katanya, kanya nafaurianan ngay fun, laman ngay taw Israel manabayan.
22Kanya nalong sa kafag ngay fun te,
“Lag am gfaurianan ku nafili fag ngay taw ay ku ngay taglong.”
23Ngay taw sas fagdaul daga, alubadi laman sas Yawi.
Ay galay menit, foyungi sabaliwa nu gfalangfe antam.
24Foyungi sas fagayu talun at taw te,
Yawi mabalyanan ay at ngay nafakamulun madulo.
25Yawi mabalyanan, nu katanya, fauseganani anya, ay suyui gtungud yap tua sa tibak fagsegan.
26Ay tibak talun at fagsegan bunwa at matuyan fag dius.
Yawi tua at nawat banwa.
27Siwa anya fagmasuyuun ay fagmatuyanun, ay kalag sit bale at fagusegananun ay at fagmasineun.
28Fagayu gaban taw sas fagdaul daga, toglagi Yawi.
Toglagi anya aroro sat fagmasineun ay sat fagmabalyananun.
29Fauseganani Yawi, at mauseganan ay at matuyan fag famauseganan, ay bubai ngay famonun sat daga salubangan.
Segi Yawi, aroro di e malong.
30Fagdaul daga, suyui tua anya!
Kanya tua at nawat fagdaul daga ay at nafaogat, nu katanya di guigan.
31Banwa ay fagdaul daga, useganani!
Fagayu talun at ngay taw foyungi te, “Yawi tam Fun!”
32Fagdaul dagat ay fagayu tagsanya, fauseganani yangay Yawi!
Ngay gamasun ay anggan ngay tanum, uroi useganani!
33Fagayu fun kayu, fauseganani yangay alubadi sis Yawi at daga salubangan, aroro kanya kadasug wan, laman nanginsaful ngay taw sas fagdaul daga.
34Fauseganani Yawi, aroro kanya matuyan tua, ay nu mafangesug di e fakatabuan.
35Ay darangini te, “Em Dius, falangfei emi!
Ay fafuli emi sa em talun, siginan em fagafagsuguanan fag ngay talun, laman manamauseganan ami emu, aroro matuyan tuo.”
36Kabavn segi Yawi, ngay taw Israel at Dius.
Ay fagayu taw nalong te, “Anud! Segi Yawi!”
37Ay sanya ginan, Dabid nafatigwanan sas Asaf ay sat ngay kalongan fag ngay taw Lebi tagfakamulun sis salubangan Fagsuadan Yawi at Nasadian, laman gfakamulun kayu menit nusnge wain at fagnamakamulunun ginanya. 38Ay at nafili fag ngay taw: Ubed-Edum, Edutun at baguama, ay Kusa ay unum yak safulu e waluk taw Lebi, kanya wan tagulit sakbawan bale ramit.
39Ay Dabid nafili Saduk fag tagfon fanggalangun ay at ngay ibama fag ngay tagfon fanggalangun, laman gulit Yawi at bale Fagnangablanganan si tangabat fag afud furuan Gibyun. 40Kabavn ban kanya fagayu at nangirug ngay fagirugun fag ngay fanggalangun, kayu menit ay yabi, kata at marirukan sis Yawi at faugali at nafon sa sangay taw Israel. 41Ay galo yangay sanya: Eman, Edutun ay tiba ya at nafili fag ngay tagalubad gina gfauseganan Yawi, aroro sat fakesugun at yud e fakatabuan. 42Eman ay Edutun tagfawang ngay budyung, fagfadkalinganun fag fagfawangun, ay tiba yak fagfawangun at fagagbilugun gina galubad sas Yawi. Ay nafili Edutun at ngay baguama laman tagulit sakbawan.
43Sanya ginan, kanya fagayu noli wan sat mesa bale, ay Dabid noli yangay laman namadante at talanan.
Currently Selected:
1 Krunika 16: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
