1 Krunika 13
13
Nu Namul Fagsuadan Nasadian
2Sa 6:1-11
1Dabid nafakamatoan at ngay tagfangguna, ay at ngay fun tagfawayan, ay ngay tagfangguna ngay tagfawayan. 2Ay kanya nalong sas fagayu taw Israel tagsanya te, “Nu kaylat tuam, ay Yawi tam Dius nu kaylat, namasaful tam sa tam ngay kalongan sas fagdaul talun Israel, anggan sa sangay tagfon fanggalangun ay sa sangay taw Lebi tagbanwan sit ngay furuan ay anggan sat ngay tagalaga fagbaugun sit fagnamafangonan. Ay namauro tam anya fagayu laman ggubuk antam. 3Katsi wan at buknga laman gfafoli tam sa antam Fagsuadan tam Dius at Nasadian, aroro ebi gina yay Saul tam fun wa tam batang ya ginto sabaliwas Dius at fakaylatun.” 4Ay fagayu taw naylat aroro nasaful te, katanya tua at masine.
5Nu katanya, Dabid nafaful fagayu taw Israel siginans Liskung Sikur sis Igiptu sitsigons Lebu-Kamat laman namul Fagsuadan Nasadian sas Kiryat-Earim. 6Sanya ginan, Dabid ay ngay taw Israel nalao sas Baala (at ngayan yangay te, Kiryat-Earim) tagsis talun Uda laman namul Fagsuadan Dius at Nasadian; Yawi gbanwan sanya sis wabilug duak awatan ke fakfak. 7Ay kanya fagayu nabul Fagsuadan Nasadian siginans Abinadab at bale ay nafabuba sa sik faguyudan bagu. Ay Usa ay Akyu tagulit kafag faguyudan kaduge glao. 8Ay Dabid ay fagayu taw Israel maksvn nu guseganan sis Yawi at daga salubangan. Ay kanya fagayu galubad ay gfawang ngay fagfawangun ke ngay bakyang, fagfadkalinganun, fagfadkatukanun ay budyung.
9Ay kanya fagayu gina andasug sas Kidun at fagruyusan, ngay baka antaid, ay Usa nabakvd Fagsuadan Nasadian. 10Ay Yawi maksvn nu kadotama Usa aroro nated Fagsuadan Nasadian. Nu katanya, Usa anbul sis Dius at daga salubangan. 11Ay Dabid andotama aroro Yawi nafabul Usa, ay dasug katsi, nafangayan kafag talun te, Peres-Usa. 12Ay ginanya fag menit, Dabid anlimu Yawi, ay nalong te, “Tain ro nu mafadasug au Fagsuadan Dius at Nasadian sa ku furuan?” 13Ay Dabid wa naylat gbuba Fagsuadan Nasadian sat furuan, abat ngate, nafamato way sis Ubed-Edum fag taw Gat at bale. 14Ay kaduge tuluk magdanun, Fagsuadan Nasadian si yays Ubed-Edum at bale ay Yawi nafayu Ubed-Edum fag talanan at ramraman.
Currently Selected:
1 Krunika 13: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
