1 Krunika 12
12
Ngay Taw at Nanangalo Dabid ay at ngay Tagfawayan
1Kayu tuy ngay taw at nanangalo Dabid sas Siklag gina gsuksuan Saul, Kis at baguama. Kanya fagayu at nagubuk Dabid gina e awayan. 2Kanya fagayu saful ggodun ay saful yangay gagbilug at ngay aruranggut dewa at siun ay at wala. Kanya fagayu Saul at ngay kalongan siginans Benamin at kasugfunanan. 3Akyeser ay Uas, Semaa at baguama fagdua tagsiginans Gibya, nafangguna anya fagayu. Kanya fagayu at ngay ngayan:
Esyel ay Pelet, Asmabet at ngay baguama,
ay Beraka ay Yeu tagsiginans Anatut,
4ay Ismaya sik taw Gibyun, kanya sik takadungug fag tagfawayan ay sik maseganama yangay fag tagfangguna at kintap sis tuluk safuluk tagfangguna.
Ay Eremyas, Akasyel, Ukanan, ay Usabad tagsiginans Gedera,
5Elusay, Erimut, Bealya, Semarya ay Sefatya tagsiginans Karuf,
6ay Elkana, Isya, Asarel, Ueser ay Asubeam Kura at gaban,
7ay Uela ay Sebadya, Erukam at ngay baguama tagsiginans Gedur.
8Ay e nanangalo yangay siginans Gad at kasugfunanan gina Dabid si sik maksvn fag fagsuksuanan sit yud e taw fag talun. Ay kanya fag ngay tagfawayan maseganama ay saful gagbilug ngay famalabag ay bangko. Kanya fagayu mabitsug kata liun, ay masakit kata arasyo:
9Eser tagfangguna kanya fagayu,
Ubadyas at fadua,
ay Elyab at fatulu,
10Mismana at faufat,
Eremyas at falima,
11Atay at faunum,
Elyel at fafitu,
12Ukanan at fawalu,
Elsabad at fasiam,
13ay Eremyas at fasafulu,
ay Makbanay at falabi-sadi.
14Kanya fagayu tagfangguna ngay tagfawayan ay Gad at kasugfunanan. At mamomuy fag tagfangguna at fagmafanggunaun sadi wayk sandan, ay at maseganama at fagmafanggunaun sadi tuak libuk tagfawayan. 15Ay gina taguna fag magdanun ginanya fag banwa, kanya fagayu nadife Liskung Urdan gina maksvn nu glugwak. Ay kanya fagayu naiyan fagayu tagbanwan sis datag sis fakamenitan, ay sis fakayabian baliwa.
16Ay e ngay taw yangay tagsiginans Benamin ay Uda at kasugfunanan at nanantungul Dabid sat fagsuksuanan. 17Ay Dabid naduksun laman namablang kanya fagayu ay nalong te, “Ay fagnasteun nu nanggubuk tuam angku ay laman ku ngay fagadgalangan am, kaylat kway nu galo am emi. Dewa katanya, ay fagnasteun nu namon wayam angku sa ku ngay fawayan dewa au yud e asalanan, nangus tam ngay mangaguyang at Dius lumag ay algan ay gfaurianan ayu.”
18Nu katanya, at Masine fag Falad antayuk sas Amasay, tagfangguna at maseganama fag tuluk safuluk tagfawayan, ay glong te, “Dabid, Ese at baguama, ami kasadi wami sa emu! Gbabo tua ban am nangus gugat gasfuan am ngay taggubuk, aroro ay Dius ggubuk ayu.”
Nu katanya, Dabid naylat ay nafili anya laman tagfangguna at ngay tagfawayan.
19Ay e ngay taw yangay siginans Manase at kasugfunanan at nanangalo Dabid gina kanya nangalo ngay taw Filistia laman namawayan Saul. Dewa katanya, ngay taw Filistia wa naylat Dabid ay at ngay tagfawayan nu nangalo, aroro kanya fagayu namatangan te, Dabid mafadiuganan Saul. Nu katanya, nu ntabu gkamatoan, kanya fagayu nafauli wan Dabid sas Siklag.
20Kayu tuy ngay taw siginans Manase at kasugfunanan at nanangalo Dabid sas Siklag: Adna, Usabad, Edyael, Mikael, Usabad, Elyu ay Siletay. Kanya fagayu gfangguna mesa tagsadik libuk tagfawayan tagsiginans Manase at kasugfunanan. 21Ay kanya fagayu nagubuk Dabid nu gfawayan, aroro sik ngay maseganama fag ngay tagfawayan. Nu katanya, kanya fagayu ansik ngay tagfangguna yangay Dabid at ngay tagfawayan. 22Kayu menit, ngayuk taw at nangasadi sas Dabid laman nanggubuk, ay ankayu at maseganama fag ngay tagfawayan.
23Kayu tuy at nanangasadi sas Dabid sas Kebrun laman nanggubuk anya nangagbilug Saul at fagfagtainanan, kata Yawi at nafatuyanan.
24Siginan Uda at kasugfunanan: unumk libu waluk sandank tagfawayan at ke ngay bangko ay godun.
25Ay siginan Simyun at kasugfunanan: fituk libu sadik sandank tagfawayan.
26Ay siginans Lebi at kasugfunanan: ufatk libu unumk sandank tagfawayan, 27ay katap yangay sanya Euyada tagfangguna Arun at talananan ay at tagfawayan fag tuluk libu fituk sandan, 28ay Saduk sik baguama ay at maseganama fag tagfawayan ay anggan tagsiginan at talananan fag duak safulu e duak tagfangguna.
29Ay siginan Benamin at kasugfunanan Saul at ngay kalongan tuluk libuk tagfawayan. Ay Benamin at kasugfunanan tangayu masadi yay gugat sas Saul dasug katsi.
30Ay siginans Efraim at kasugfunanan: duak safuluk libu waluk sandank tagfawayan at maseganama ay takadungug sit ngay talanan.
31Ay siginan sik wabilug Manase at kasugfunanan: labi waluk libuk tagfawayan, ay nasugu kafag ngay taw laman nanggubuk nu gfili Dabid laman sik fun.
32Ay siginan Isakar at kasugfunanan: duak sandank tagfangguna galo yangay sanya at ngay kalongan. Kanya fagayu saful nusnga setaw ngay taw Israel at fakamulun, ay nu ginain nu gfakamulun.
33Ay siginan Sebulun at kasugfunanan: limak safuluk libuk tagsaful gfawayan ay kanya fagayu ngayu at famawayan ay at ngay famalabag. Ay mafalganan nanggubuk ay nangabul aroro sat fagmasadiun sas Dabid.
34Ay siginans Naftali at kasugfunanan sadik libuk tagfangguna ay tuluk safulu e fituk libuk tagfawayan; kafag ngay tagfawayan gbuba at ngay famalabag ay at ngay bangko.
35Ay siginans Dan at kasugfunanan: duak safulu e waluk libu unumk sandank tagfawayan at mafalganan sas awayan.
36Ay siginans Aser at kasugfunanan: ufatk safuluk libuk tagfawayan tagsaful ay at mafalganan sas awayan.
37Ay tagsiginans Rubin, Gad, ay Manase fag wabilug kasugfunanan, tagbanwan fakamenitan baliwas Liskung Urdan, sadik sandan duak safuluk libuk tagfawayan at ke ngay buba nusnga setaw fag ngay famawayan.
38Kafag ngay tagfawayan mafalganan gugat sas awayan. Ay kanya fagayu nalao sas Kebrun masadi nanfili Dabid laman sik fun sas fagdaul talun Israel. Arvs fagayu wa taw Israel takaylat Dabid laman sik fun. 39Ay kanya fagayu nu sanya tuluk menit gasfuan Dabid gfangon ay ginum aroro at ngay kaiban nafabuba sa anya fagayu at ngay fakonun. 40Ay anggan at ngay kalongan siginan tangayayu fag talun, Isakar Sebulun ay Naftali at ngay gaban, nabuba yangay at fakonun. Ay nafabuba kafag ngay fakonun sat ngay asnu, kamelyu, mola,#12:40 mola: Fagbaugun takata sik kabayu. At mama sik asnu ay at mina sik kabayu. ay baka. Ngayu at buba fangawat tinapay ay igus ay pasas ay fanlangu ay langis, baka ay tupa laman at filasan ban. Ay fagayu taw Israel maksvn nu guseganan.
Currently Selected:
1 Krunika 12: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
