इफीसियन 3

गैरयहूदी लोगन के बीच माहीं पवलुस के सेबा

1तूँ पंचे जउन गैरयहूदी आह्या, तोंहरे बीच माहीं हम मसीह यीसु के सेबा करित हएन, एसे हमहीं जेल माहीं डार दीन ग हय। 2परमातिमा हमरे ऊपर बड़ी दया कइके हमहीं नियुक्त किहिन हीं, कि तूँ पंचे जउन गैरयहूदी आह्या, हम आइके परमातिमा के खुसी के खबर सुनाई। एखे बारे माहीं तूँ पंचे जरूर सुने होइहा। 3अरथात इआ भेद हमहीं दरसन के द्वारा मिला हय, जइसन कि एखे बारे माहीं हम पहिलेन संछेप माहीं लिख चुके हएन। 4अगर तूँ पंचे एही पढ़िहा, त इआ जान सकते हया, कि मसीह के बारे माहीं जउन सँदेस पहिले कोऊ नहीं जानत रहा आय, ओखे बारे माहीं हम समझ गएन हय। 5इआ भेद पुरान पीढ़ी के मनइन काहीं इआमेर नहीं बताबा ग रहा आय, जइसन कि अब परमातिमा अपने पबित्र खास चेलन अउर नबिअन काहीं पबित्र आत्मा के द्वारा बताइन हीं। 6उआ भेद इआ आय, कि खुसी के खबर के द्वारा गैरयहूदी यीसु मसीह के ऊपर बिसुआस किहिन हीं, इआ कारन से यहूदी लोगन के साथ एकय देंह कि नाईं एक होइगे हँय, अउर बारिसदार बनँइ माहीं साझीदार होइगे हँय, अउर परमातिमा के वादा के भागीदार घलाय होइगे हँय।

7अउर परमातिमा बड़ी दया कइके जउन बरदान हमहीं दिहिन हीं, ओहिन के सामर्थ के प्रभाव के मुताबिक, हम खुसी के खबर काहीं सुनामँइ के सेबक बने हएन। 8अउर हम जउन सगले पबित्र मनइन म से सगलेन से छोट आहेन, तऊ हमरे ऊपर बड़ी दया भे ही, कि गैरयहूदी लोगन काहीं मसीह के अपार दया के खुसी के खबर सुनाई, जउने ऊँ पंचे घलाय खुब आत्मिक आसीस पामँय। 9अउर सगले मनइन काहीं इआ बात बताई, कि उआ भेद के योजना का ही, जउने काहीं सगले संसार काहीं बनामँइ बाले परमातिमा, खुब बरिस पहिले से छिपाइके रक्खिन रहा हय। 10अउर परमातिमा के उद्देस्य अब इआ हय, कि मसीही मन्डली के द्वारा परमातिमा के अनेकव प्रकार के ग्यान, स्वरग के जघन माहीं रहँइ बाले प्रधानन अउर अधिकारिन काहीं बताबा जाय। 11परमातिमा अनन्तकाल से जउन इच्छा अपने मन माहीं कए रहे हँय, ओही ऊँ हमरे पंचन के प्रभू यीसु मसीह के द्वारा पूर किहिन हीं। 12हम पंचे यीसु मसीह के ऊपर बिसुआस करित हएन, इआ कारन से हमहीं पंचन काहीं, पूरे बिसुआस के साथ निधड़क होइके परमातिमा के लघे आमँइ के अधिकार हय। 13एसे हम तोंहसे इआ बिनती करित हएन, कि जउन दुख-मुसीबत तोंहरे खातिर हम उठाय रहेन हय, उनखे कारन हिम्मत न हारा, काहेकि उनहिन माहीं तोंहार पंचन के भलाई हय।

इफिसुस के बिसुआसी लोगन के खातिर पवलुस के प्राथना

14इहय कारन से हम परमपिता के आँगे गोड़न गिरित हएन, 15काहेकि उनहिन के द्वारा स्वरग अउर धरती के ऊपर, हरेक घरानन के मनइन के नाम धराबा जात हय। 16हम प्राथना करित हएन, कि परमातिमा अपने महिमा के धन के मुताबिक, तोंहईं पंचन काहीं इआ बरदान देंय, कि तूँ पंचे उनखे पबित्र आत्मा से सामर्थ पाइके, अपने अन्दर के सुभाव माहीं मजबूत होत जा। 17अउर बिसुआस के द्वारा मसीह तोंहरे हिरदँय माहीं निबास करँय, जउने तूँ पंचे मसीह के प्रेम माहीं नेव के समान सुरुआत कइके, जड़ कि नाईं प्रेम माहीं मजबूत होइजा। 18जउने तूँ पंचे सगले पबित्र मनइन के साथ निकहा से इआ समझँइ के सक्ती पाबा; कि मसीह के प्रेम के लम्बाई, चउँड़ाई, उँचाई, अउर गहराई केतनी हय। 19अउर मसीह के उआ प्रेम काहीं जान सका, जउन मनइन के हरेकमेर के ग्यान से नहीं जाना जाय सकय, जउने तूँ पंचे परमातिमा के सगली भरपूरी से भरपूर होइजा।

20अब परमातिमा जउन सर्बसक्तिमान हें, उनसे जेतना हम पंचे माँग सकित हएन, इआ कि जहाँ तक सोच सकित हएन, ओहू से जादा ऊँ काम कइ सकत हें, अउर उहय सामर्थ से हमरे जीबन माहीं काम करत हें। 21परमातिमा के बड़ाई मसीही मन्डली माहीं, अउर मसीह यीसु माहीं, अनन्त पीढ़िन तक जुग-जुग होत रहय। आमीन।

Currently Selected:

इफीसियन 3: bag

Highlight

Copy

Compare