Lo kila gəl ne 3
3
1ꞌƊa mbede ula ne ar anji lə mbo̰ naa lə njetakagəje gə Sarədə:
A o, tar gə dəw gə uwa njilje gə siri lə Luba gə ndɛ̰ndərɛ̰ndɛ̰je gə siri ji-a gə pa le ɓa nee: M-gərə kula ɗa-ije; m-gərə gə maj-ɛ to gə ꞌpa tar lə-i gə lo-lo na aw kəm baa, ngaa uy. 2Unda kəm karə dɔ rɔ-i gə ɓo ula jingaw mə kɛsə nje gə ꞌnay ta yo gə dəb gə mba kuy, mba m-o kula ɗa-ije arə ngadə ta kəm Luba gə lə-m ang. 3Ar mə-i ole dɔ ɗəw gə ꞌta ne tar ta-je gə ose dɔ ɗəw gə ꞌtuga mbi-i o ne. ꞌNgom tar gə nee ɓo ꞌturu tar kəji lə-i; to gə ɓo unda kəm karə dɔ rɔ-i gə ang nama, m-a ɗe to gə nje ɓogo be, lal kar ꞌgərə kar gə m-a ɗe kuba-i ne nangə bus. 4Ngaa, Sarədə gə le, dəwje lə-i gə kɛm, gə kubu lə-je uwa yoro ang ꞌga̰ kəne əng. D-a dan-m, gə kubu lə-je gə nda mba ꞌje d-asə ja.
5Be ɓa, dəw gə cɛdə ɗɔ nama, d-a kula-a kubu gə nda; m-a tuji ri-a mə mbede təbə gə ang, ngaɓa m-a pa tar lə-a gə ɗaga no gɔl Bɔy gə, gə no gɔl anjije gə lə-a.
6Dəw gə mbi-a ga̰ nama, may kar-ɛ o ne tar gə Njil pa ar mbo̰ naaje lə njetakagəje.
7ꞌƊa mbede ar anji lə mbo̰ naa lə njetakagəje gə Piladɛləpi ꞌpa na:
A o, tar gə njerɔsangə, dəw gə gadə-gadə,
Gə uwa ngon lakɛrɛ lə Dabidi ji-a gə,
Gə ɔr ta ɗəw nama dəw a kudu ang,
Gə udu ta ɗəw nama dəw kɔr ang pa le ɓa nee.
8M-gərə kula ɗa-ije. A o, m-ɔr ta ɗəw m-ila tagə no-i gə, dəw kara kara a kasə kudu ang. Singa-i njɛ̰ ja baa ngaa, ꞌngom tar lə-m ngaɓa ꞌma̰y tar dɔ ri-m gə ang tɔ. 9A o, m-ar-i dəwje gə kəy nendo gə lə ꞌSu, dəwje gə ꞌɗa rɔ-je gə Jiibije, ngaa ꞌto Jiibije ang baa, ꞌto nje pa tar gə ɗəgərəje. O, m-a kar-je ꞌɗe d-um məkəji-je nangə no gɔl-i gə, ngaɓa d-a gərə to gə m-ɓol-i. 10Mba ꞌngom tar lə-m uwa gədərə ɗaa, ꞌma kara m-a ngom-i dɔ kar nena gə a ɗe dɔ dəwje gə tɔ̰y, gə a kum dəwje gə dɔ nangə gə nee dan nena gə. 11M-a ɗe ɓisine. Uwa ne gə inga le gaa mba kar dəw kara kara ta dɔ gugu lə-i ang.
12Dəw gə cɛdə ɗɔ nama, m-a kar-ɛ to gə dubu mə kəy gə lə Luba, a kila gɔl-ɛ ɗangə ang car, ngaɓa m-a kunda ri Luba lə-m, gə ri ɓebo lə Luba lə-m gə to Jerujalɛm gə sigi gə ḭ dara rɔ Luba gə lə-m dɔ-ɛ gə, ngaɓa ri-m ꞌma gə sigi nəm tɔ.
13Dəw gə mbi-a ga̰ nama may kar-ɛ o ne tar gə Njil pa ar mbo̰ naaje lə njetakagəje.
14Ɗa mbede ar anji lə Mbo̰ naa lə njetakagəje gə Lawdise: Be ɓa n-ne gə Oyo, njetar naji gə njetakagə gə tɔgərɔ, Ngira nekundaje lə Luba pa na: 15M-gərə kula ɗa-ije: ꞌkul gə kul ang nəm ꞌləgə gə ləgə ang nəm. Ngaa to gə ɓo ꞌkul gə kul ose ꞌləgə gə ləgə je əng bənəng kara ne! 16Ngaa mba ꞌn-unga gə purapo baa ngaɓa ꞌkul ang nəm, ꞌləgə ang nəm, ɗaa m-a tɔm-i gə ta-m. 17Mba ꞌpa na: M-to njenekinga, m-isi dan nekinga gə dana badagə ɗaa m-aw ndoo ne kara ang, cibi ngaɓa ꞌgərə to gə ꞌto gə njendoo ang nəm, gə njekəmtondoo ang nəm, gə nje ko məsərə ang nəm, gə njekəmandoo ang nəm, gə nje kəm tɔ ang nəm, gə nje kaw kudu dum ang nəm tɔ. 18M-ndəj-i mba kar-i ꞌndogo sə-m maa gə d-ula-a ndubu pədə d-ar ar yororo mba kar-i ꞌtəl ꞌto ne njenekinga, gə kubuje gə nda mba kar-i ula rɔ-i gə on ne lo rɔ kul lə-i, gə kam ngogula ila kəm-i gə mba kar-i o ne lo. 19Dəwje tɔ̰y gə ꞌma m-njigi-je le, m-ndangə-je gə m-siri-je. Ḭ nja̰y ɓo ꞌturu kəji lə-i. 20A o, m-ar ta kəy gə, m-unda ta kəy, dəw gə o ndu-m ɓa ɔr ta kəy ɗaa, m-a kandə kəy lə-a, m-a kusa sə-a ne ngaɓa ye a kusa sə-m ne tɔ.
21Dəw gə cɛdə ɗɔ nama m-a kar-ɛ isi sə-m dɔ ngəndəng mbay gə lə-m to gə ꞌma kara m-cɛdə ɗɔ ɗaa m-isi gə Bɔy dɔ ngəndəng mbay gə lə-a.
22Dəw gə mbi-a ga̰ nama may kar-ɛ o ne tar gə Njil pa ar mbo̰ naaje lə njetakagəje.
Currently Selected:
Lo kila gəl ne 3: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
