Lo kila gəl ne 2
2
Mbede lə mbo̰ naa lə njetakagəje gə Epɛs
Kɗn 20.28-31
1ꞌƊa mbede ula ne ar anji lə mbo̰ naa lə njetakagəje gə Epɛs: O tar gə nje kuwa ndɛ̰ndərɛ̰ndɛ̰je gə siri ji-a gə kɔl gə nja ne horo lambe maa̰je gə siri pa: 2M-gərə kula ɗa-ije gə kula lə-i, gə kuwa gədərə lə-i, ngaɓa asə kɔsə kudu njeməyɛrje ang tɔ. ꞌI ꞌna mə dəwje gə d-uwa rɔ-je gə ngan njekulaje ɗaa ꞌto gə njeka̰ykulaje ang baa, ɗaa ꞌgərə to gə ꞌto gə njetar gə ɗəgərəje. 3ꞌI uwa gədərə ngaɓa o ꞌməsərə mba ri-m ɗaa mə-i ila kasə ang. 4Ngaa, m-ila tar dɔ-i gə, mba njigi lə-i gə dɔngɔr gə uba ḭya̰. 5Be ɓa ar mə-i ole dɔ lo gə ꞌce oso kəne: ꞌTuru kəji lə-i, ɓo un kula ɗa-ije gə may gə kede ləw. Be ang nama m-aw gə ɓə lə-i əng, a to gə ɓo, ꞌturu kəji lə-i ang nama, m-a kɔr dɔ ne kunda lambe lə-i lo to-e gə gə ɗangə. 6Ngaa, ne gə to may ɔji dɔ-i ɓa nee: Rɔ-i ad-i dɔ kula ɗa gə lə dəwje lə Nikola to gə ꞌma be tɔ.
7Dəw gə mbi-a ga̰ nama, may kar-ɛ o ne tar gə Njil pa ar mbo̰ naaje lə njetakagəje nee.
Dəw gə cɛdə ɗɔ nama, m-a kar-ɛ kandə kagə kaw kəm baa gə to mə ɓe rɔləl gə lə Luba gə dara usa.
8ꞌƊa mbede ar Anji lə Mbo̰ naa lə njetakagəje gə Isimirənə:
A o tar gə dəw gə dɔngɔr gə dəw gə njekudu bo̰ pa, ye gə uy ɓa təl ndol aw kəm baa:
9M-gərə ne ur ti lə-i gə ndoo lə-i, ngaa ꞌto njenekinga, ɗaa tar paje gə kṵra̰y lə nje gə ꞌɗa rɔ-je gə Jiibije ngaa ꞌto Jiibije ang baa, ꞌto kəy nendo lə ꞌSu. 10ꞌƁəəl mba ꞌməsərə gə a ko ang. O, ꞌSɛ̰ngərɛ̰ a kum nje gə kɛm horo-si gə kəy kula gə, mba na ne mə-si ko, ɗaa nenaje d-a na mə-si kəm ndɔ dɔg. Uwa ar-ɛ ngəng saar uy ne, ɗaa m-a kar-i jɔgə təbə.
11May kar, dəw gə ɓo mbi-a ga̰ nama, o ne tar gə Njil pa ar mbo̰ naaje lə njetakagəje.
Dəw gə cɛdə ɗɔ nama a ko ꞌməsərə gə yo gə gɔl joo ang ja saar.
12ꞌƊa mbede ar anji lə mbo̰ naa lə njetakagəje gə Pɛrəgam: O tar gə dəw gə ndo̰ kiya bayi lə-a adə ngɛl-ngɛl ngaɓa t-ɛ adə pəm-pəm ɓe joo pa: 13M-gərə lo gə isi kəne: lo-e nee le to dɔ ngəndəng mbay lə ꞌSu. Ngaa ꞌi le um mə-i dɔ ri-m gə jəb-jəb ngaɓa kagə-m gə ꞌta le uba ḭya̰ ang, dɔ ndɔje gə lə A̰tipas gə nje pa tar naji lə-m gə ngon kuji ja kara, ꞌtɔl-ɛ ɓe lə-si, lo gə ꞌSu isi kəne. 14Ngaa, neje gə kɛm ɗaa, m-ila ne tar dɔ-i gə. Nje gə naaje ꞌga̰ mə kəy gə lə-i nee, gə cḭya̰ dɔ netɔji gə lə Balam gə ɔsə kudu Balak ar-ɛ iya kula uba ne ngan Ijirayɛlje mba kar-je d-usa da gə ꞌpolo ne d-ar magəje ꞌto ne njekayaje. 15Ɗəw kara baa, ɓə lə-i kara, nje gə naaje ꞌcḭya̰ dɔ netɔji gə lə dəwje lə Nikola tɔ. 16Be ɗa ꞌturu kəji lə-i. Be ang nama m-a ɗe ɓə lə-i ɓisine baa, ɗaa m-a ɗɔ gə je gə tar gə ta-m gə gə to gə kiya bayi.
17Dəw gə mbi-a ga̰ nama may kar-ɛ o ne tar gə Njil pa ar mbo̰ naaje lə njetakagəje. Dəw gə cɛdə ɗɔ nama m-a kar-ɛ muru misi gə to nekusa gə ḭ dara gə to lo kiya gə, m-a kar-ɛ kɔr ər gə nda; ɗaa kɔr ər gə nee le, ꞌɗa ri gə sigi kəne kara, gə dəw kara kara gərə ang, ngaa nj-ɛ gə ta ja baa ɓa.
18ꞌƊa mbede ar Anji lə Mbo̰ naa lə njetakagəje gə Tiyatir:
A o, tar gə Ngon lə Luba, ye gə kəm-e ta naa gə ndo̰ pər gə o̰ bilim-bilim, gə gɔl-ɛ ta naa gə lar kasə pa le ɓa na nee: 19M-gərə kula ɗa-ije, njigi lə-i, takagə lə-i, kula lə-i, kuwa gədərə lə-i. Ngaɓa m-gərə kula ɗa-ije gə ɗudu gə bula unda yeje gə dɔngɔr. 20Ngaa, m-ila tar kara dɔ-i gə, mba ḭya̰ ɗəw ar Jejabɛl, jene gə nee gə ɗaa rɔ-ɛ gə pajambərə, ərə ngan njekulaje lə-m ɔsə kudu-je ar-je ꞌndəm ngaɓa ꞌɗa kaya d-usa ne da gə ꞌpolo ne magəje gə baa. 21M-ḭya̰ dɔ kar m-ar-ɛ mba kar n-mbəl kəji lə-a dɔ kaya gə lə-a, ɗaa n-njigi mba mbəl kəji lə-a dɔ kaya gə lə-a ang. 22O, m-unda-a m-ila-a dɔ cira məsərə gə bo, naa gə kara baa gə nje baa ɓogo lo to-je lə-a, be ang nama may kar ꞌturu kəji lə-je dɔ kula ɗaje gə ja ɓa. 23Ngan-ɛ le, m-a kar-je d-uy, ɗaa mbo̰ naa lə njetakagəje tɔ̰y d-a gərə to gə ꞌma m-to gə dəw gə nje gərə mə dəwje gə dɔ ɓəngərə-je, ɗa m-a kuga dɔ ji si, na-na nama ɔji dɔ kula ɗ-ɛje. 24Kar-sisəy ɗaa, m-pa m-ar nje gə kɛm gə d-isi Tiyatir. Nje gə tɔ̰y gə ꞌta tar sula lə-a ꞌne gə Jejabɛl nee ang nəm, ngaɓa d-ula rɔ-je bababa dan negərə gə lə ꞌSu ang, to gə ꞌpa ne tar-ɛ le: ꞌMa m-unda nekodo gə uway gə ɗangə dɔ-si gə ang. 25Ne kara baa le, ne gə sisəy ingaje le, uwaje ngangə saar mba kar-m m-ɗe.
26Dəw gə cɛɗə ɗɔ, ye gə ngom kula ɗaje lə-m saar ɔr sṵra̰ nama, m-a kar-ɛ singamongə ko̰ dɔ gəl kuji dəwje. 27Ɗaa n-a kul-je gə kagə ngaw lar, rundu neje to gə joo ə̰nji be. 28Ɗəw kara baa to gə ꞌma kara m-inga singamongə ji bɔy gə le, m-a kar-ɛ duji lokarə tɔ.
29Dəw gə mbi-a ga̰ nama, o ne tar gə Njil pa ar Mbo̰ naaje lə njetakagəje.
Currently Selected:
Lo kila gəl ne 2: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
