Lo kila gəl ne 4

Polo Luba gə mə dara gə

1Go-e gə gugu ɗaa m-o ta ɗəw cɛ̰ mə dara gə, ɗaa ndu gə dɔngɔr gə pa sə-m tar gə ur mbi-m gə le ɓar to gə kuul be, pa na: Ɔdə gə nee, ɗa m-a tɔji ne gə a nday mə ndɔ gə aw ɗe gə kede əng.

2Gə ngɔdə baa, Njil uba-m pɛ uwa-m. Ɗaa m-o ngəndəng mbay kara mə dara gə, ɗaa dəw kara isi dɔ ngəndəng mbay gə nee le. 3Dəw gə isi kəne nee le unda rɔ ər gə ꞌɓar-ɛ jasəpə gə sarədowan nəm tɔ. Ngaɓa ngaw bura nji gə ta naa gə ər gə ꞌɓar-ɛ emerɔdə gugu dɔ ngəndəng mbay le.

4Ngəndəng mbayje dɔg joo gə gir-e gə sɔɔ ꞌgugu dɔ ngəndəng mbay le d-ila-a dana, ɗa bubaje dɔg joo gə gir-je gə sɔɔ, gə d-ula kubu gə nda, gə tuga jɔgə gə to gə maa dɔ-je gə d-isi kəne.

5Ngəndəng mbay le təl lə nji gə ndu dəwje, gə ndangə lə nji ꞌce kəne. Lambe siri gə o̰ pər bilim-bilim gə to gə njilje lə Luba gə siri to no ngəndəng mbay gə le. 6No ngəndəng mbay gə le, ne to kəne ta naa gə babo gə arə kə̰rə̰rə̰ to gə ər gə ɓar-ɛ kirisital be.

Dan ngəndəng mbay gə dana, gə gir-e gə kɔr-kɔr le, daje sɔɔ gə d-uba kəm-je no-je gə kede nəm gugu nəm njḭ d-isi kəne. 7Da gə dɔngɔr ta naa gə ꞌnam, njekum gə joo ta naa gə ngon bɔ mangə, njekum gə munda le ta kəm-e ta naa gə kəm dəw ngaɓa njekum gə sɔɔ ta naa gə gera gə ɔr bagə tɔ. 8Nekundaje gə sɔɔ gə d-aw kəm baa nee le, na-na kara baag-ɛ misa̰-misa̰. Kəm-je ɗusu rɔ-je njḭ gugu bagir-je ula naa gə mbugu saar ce mə-je gə kəy kɔrɔgə. Kar gə cil le, d-uwa kɔr-je ang, ɗaa ꞌpa na: Njerɔsangə, njerɔsangə, njerɔsangə, Mbayɓe, Luba gə njesingamongə, dəw gə nje ga̰, gə ga̰ kede ləw baa, dəw gə a ɗe, njesingamongə gə dum dɔ lo. 9Ngaɓa taar-taar lo gə nekundaje gə sɔɔ gə d-aw kəm baa d-ɔsə gaji nje kisi dɔ ngəndəng mbay gə, ꞌne gə nje kisi gə ɓal-ɓal, ngaɓa ꞌɗɔy-ɛ gə ꞌɗ-ɛ oyo ɗaa, 10ɓugaje gə dɔg joo gə gir-je gə sɔɔ le d-unda ꞌburamba no nje kisi dɔ ngəndəng mbay gə, ꞌpolo Nje kisi gə ɓal-ɓal ɗaa d-um jɔgəje lə-je nangə no ngəndəng mbay gə ɗaa ꞌpa na: 11Mbayɓe Luba lə-si, kəm kar-i inga rɔnduba, kəm ɗɔy-i gə kəm kar-i inga singamongə mba ꞌi ja unda neje tɔ̰y, gə go mə njigi lə-i, ɗaa neje nee le ꞌga̰ ngaɓa ꞌi ja unda-je.

Currently Selected:

Lo kila gəl ne 4: lap

Highlight

Copy

Compare