Lo kila gəl ne 11

Nje pa tar najije gə joo

1D-ar-m tatɔgə kara gə ta naa gə ngəw kagə kɔji ne, ꞌpa nena: Ḭ taar ɓo ɔji kəy lə Luba, ngaɓa no kɔgə, gə dəwje gə ꞌpolo ne kəne. 2Ngaa tabidi kəy lə Luba gə ɗaga le ḭya̰ ar to lo kara ɓo ila ne kɔji ngal ne kəne ɔji ne ang, mba d-ula mə ji dəwje gə ꞌgərə Luba ang gəl kuji dəwje gə, mba kar ɓebo gə to gə losang-ɛ le, d-a lag-e gə gɔl-je nangə lag-lag kəm nay dɔg sɔɔ gə gir-e gə joo 3ɗaa m-pa m-ar njetar najije lə-m gə joo, mba kar d-ila mbərə kəm ndɔ tɔl-tɔl dɔg lo kara gə dɔ-ɛ gə tɔl-tɔl joo gə gir-e gə dɔg misa̰ gə d-ula kubu kuwa ndoo. 4Njetar najije gə joo nee le, ꞌto gə kagə olibiyeje gə joo gə lo kunda lambeje gə joo gə d-ar no Mbayɓe gə dɔ nangə gə nee. 5To gə ɓo dəw gə njigi mba ɗa gə je məyɛr nama, pər ce ta-je gə ɗaa ro njeba̰a̰je lə-je rug-rug. Oyo, to gə ɓo dəw gə njigi mba ɗa-je məyɛr nama, may kar yo gə to gə be ja tɔl-ɛ. 6D-aw gə singamongə mba kudu kəm dara, kɔgə ne nji, mba kar dɔ ndɔje gə pajambərəje ꞌpa ne tar gə ri Luba le, man nji oso nangə cɛ̰ng be ang. D-aw gə singamongə mba təl ne man gə məsə ngaɓa gə mba kar tujije bula oso dɔ nangə gə to gə mə-je ja njigi.

7Ngaɓa lo gə d-a kunda ngangə tar naji lə-je ɗaa, da gə ɔsə lo mə buwa wəl gə ce le, a ɗa gə je ɗɔ, a cɛɗə kinga-je ɗaa tɔl-je. 8Nin-je a to ɗəw boo mə ɓebo gə boy gə d-unda ri-a gə ne kɔji mar-ɛ ɗəw njil gə na Sɔdom gə Ejipətə, lo-e gə ꞌɓərə Mbayɓe kagə dəsə gə kəne. 9D-a kḭ horo dəw mə ɓeje gə, gə gəl kaje, gə ndo̰ tarje gə gəl kujije mba ɗe ko nin-je kəm ndɔ munda gə gɛ̰, lal kar n-ḭya̰ ɗəw n-ar ꞌdubu-je. 10Dəwje gə dɔ nangə gə nee ꞌɗa rɔləl ɔji dɔ-je, d-a ɗa ndam gə d-a kula gə nekura kar naa yo gə nee, mba pajambərəje gə joo le, d-ula kəm nje gə dɔ nangə gə nee ndoo ya̰.

11Go ndɔ gə munda gə gɛ̰-ɛ le ɗaa, njil gə kar kaw kəm baa kara ḭ rɔ Luba gə ɗe uru mə-je gə ɗaa d-ḭ d-ar taar dɔ gɔl-je gə. Be ɓa ɓəəl gə boy ja unda nje gə d-o-je badə gangə-je. 12Pajambərəje gə joo d-o ndu gə boy ḭ mə dara gə pa ar-je na: Awje gə taar nee. Ɗaa d-uba nangə d-ḭ d-aw dara mə kil gə lə nji ta kəm njeba̰a̰je gə lə-je nda̰-nda̰. 13Dɔ kar-ɛ gə əng ja, dɔ nangə yə to gə boy ɗaa ɓebo gə ꞌkay dana lo dɔg le, dəb-e gə be kara unda nangə mburugu ɗaa dəwje tɔl-tɔl dɔg lo siri d-uy dan nangə gə yə gə nee le. Nje gə ꞌce ta yo gə ɗaa ɓəəl unda-je badə gangə-je, ar-je d-ula ne rɔnduba dɔ Luba gə nje kisi dara.

14Tuji gə njekum gə joo nday ngaa. A o, tuji gə njekum gə munda aw ɗe ɓisine.

Kuul gə njekum gə siri

15Anji gə njekum gə siri to Kuul lə-a: ndu dəwje ɓar to gə boy mə dara na: ɓeko̰ gə dɔ nangə gə nee le to kar Mbayɓe lə-si ngaɓa to kar Kirisi lə-a tɔ n-a ko̰ ɓe gə ndɔ gə ndɔ. 16Ɗaa buba ɓeje gə dɔg joo gə gir-je gə sɔɔ gə d-isi dɔ ngəndəng gə lə-je no Luba gə le, d-oso nangə ꞌdəbə kəm-je nangə ɗa ꞌpolo Luba 17na: J-a ɗa-i oyo, Mbayɓe Luba gə njesingamongə gə dum dɔ lo, gə ga̰, gə ga̰ kede ləw baa, mba ꞌtɔji singamongə lə-i gə bo ya̰, ngaɓa o̰ ɓe nəm tɔ. 18Ɗaa, wungu ɗa dəwje gə ꞌgərə Luba ang gəl kuji dəwje gə, ngaa to gə wungu lə-i ɓa ɗe. To dɔ kar gangə tar dɔ nje gə d-uy gə, dɔ kar kuga ne dɔ ji lə ɓərə kulaje gə to gə pajambərəje gə njerɔsangəje gə nje ɓəəl ri-ije, nganje gə naa gə dəwje gə tɔgə, dɔ kar tuji gə ɔji dɔ nje gə ꞌtuji dɔ nangə nee.

19Ɗaa ta kəy gə lə Luba gə mə dara gə cɛ̰, ngaɓa sandubu kone ce to mə kəy gə lə Luba; ɗaa nji təl pa̰y-pa̰y ngaɓa ndu dəwje ɓar gə nji ndangə bangərang-bangərang, nangə kara yə, ngaɓa kɔji nə̰y nangə hadada-hadada tɔ.

Currently Selected:

Lo kila gəl ne 11: lap

Highlight

Copy

Compare