Ebərəje 13
13
Tar ndəjije dang-dang
1May kar uwaje gə naa nuji kəm-si gə kede. 2Ar-je mə-si uy dɔ kuwa mbaje ang, mba kuwa mbaje le ɓa nje gə kɛm d-ɔsə ne dɔ-je dɔ anjije gə lal gərə.
3Oleje mə-si dɔ nje gə to kəy kula gə, to to gə sisəy kara ꞌtoje gə je naa gə be, ngaɓa nje gə ꞌɗaje məyɛr nama ꞌgərə to gə darɔ-sisəy kara d-a ɗa məyɛr tɔ.
4May kar-sisəy tɔ̰y ja ꞌɗɔyje ta naa, ngaɓa ɔsəje ɓogo lo to ngərəng. Mba Luba a gangə tar dɔ bula jagədaje gə gə dɔ nje ɓogo lo toje gə.
5Ar-je ɓo lar uwa-si gə ɓərə ang, ɗaa ne gə ingaje mə ji-si gə əng ja undaje mə-si dɔ-ɛ gə, mba Luba pa na: M-a kuba-i kḭya̰-i ang nəm m-a mbadə-i ang nəm.#13.5 Ttt 31.6,8; Jos 1.5. 6Gəl-e gə nee ɓa kəm kar j-a pa gə singa-si ja na: Mbayɓe to nje la sə-m, ɗaa m-a ɓəəl ne kara ang. Ɗi ɓa dəw a ɗa sə-m wa? #13.6 Paj 118.6
7Ar-je mə-si ole dɔ njekɔr no-sijee gə ꞌpa tar lə Luba d-ar-si, ꞌtənje pa nja-je saar ce ne dɔ ndɔ yo-je gə ɗaa ꞌndəjije takagə lə-je.
8Jeju Kirisi gə njekara nee ja ga̰ tagəne, gə ɓogəne ngaɓa gə ɓal gə ɓal. 9May kar ḭya̰je ɗəw ar netɔjije dang-dang gə dəw gərə gəl-e ang baa ja turu dɔ-si ang. Mba may kar mənuji ɓa ula jingaw mə-si gə, ɓo nekusa le asə ɗa ne kara kar njekusa-je ang. 10Sijee le, no kɔgə lə-si ga̰, gə nje gə ꞌɗa kula kəy lə Luba ja kara ɗəw to kar d-usa ne kəne ang. 11Mba daje gə buba njekapolo aw gə məsə-je no kɔgə mba neɗa gə kṵra̰y le, d-odo d-aw ꞌro gir ɓe gə ɗaga.#13.11 Nll 16.27. 12To gə be ɓa Jeju kara ꞌtɔl-ɛ gir ɓe gə ɗaga ɓa togo ne dəwje gə məs-e. 13Be ɓa ar-si j-a ceje j-aw j-inga-aje gir ɓe gə ɗaga, j-ar d-ila rɔ kul dɔ-si gə to to gə ꞌne be tɔ. 14Mba sijee le ɓe kisi-si gə dɔ nangə nee gə dɔbo̰ godo ɗaa j-a sangə ɓe gə dɔ ndɔ gə bara. 15Ɗəw gə lə-a ja j-a pidi ne Luba jaga-jaga gə nepolo, to tarje gə j-a pa gə ri-a. 16Be ɓa ar-je mə-si uy dɔ ɗa may gə gə la gə dəwje ang, mba nepoloje gə to gə be le ɓa ləl Luba.
17Oje tar ta njekɔr no-sijee gə ngaɓa osoje kul no-je gə. Mba ꞌtɔsə kəm-je dɔ təbə gə lə-si gə d-a tura go-e. ꞌƊaje gə maj-ɛ mba kar ꞌɗa gə rɔləl ɓo gə man no ang mba ꞌtura go-e gə man no kara ne may kara gə a kingaje kəne godo.
Ɗudu tarje
18ꞌDəjije Luba mba sijee, mba j-a gərə to gə kəji lə-sijee to gə maj-ɛ, gə mə-si gə njigi mba nja gə maj-ɛ dan neje gə tɔ̰y. 19M-ɗa-si kɔgərɔ ja ꞌdəjije Luba mba kar m-təl gə tɔg-ɛ m-aw ɓə lə-si.
20May kar Luba gə njekunda gəl ɗɛgɛgɛ, gə ar Mbayɓe le-si Jeju ndol horo nje gə d-uy, to ne njekuul badəmje gə boy, ɗəw gə lə məs-e gə riya ne kone gə to gə ɓal-ɓal, 21may kar n-ar-si singa ɗa ne tɔ̰y gə may mba ɗa ne mə njigi lə-a; may kar n-ɗa ne gə ləl-e mə-si gə ɗəw gə lə Jeju Kirisi, gə rɔnduba to k-ɛ gə ɓalje ɓalje! Oyo!
22Ngan ko̰-mje m-dəji-si kar uwa-je tar ndəji gə nee le gədərə, mba m-ɗa mbede gə nee le njɛ̰ baa m-ar-si.
23May kar ꞌgərə to gə ngon ko̰-si Timoce le d-ḭya̰ nam. To gə ɓo n-ɗe gə tɔg-ɛ nama m-a kaw sə-a ɓe le-si kaw ko-si.
24May kar oje njekɔr no-sijee tɔ̰y ar-mje gə njerɔsangəje tɔ̰y tɔ. Nje gə Itali d-o si.
25May kar mənuji nay gə si tɔ̰y!
Currently Selected:
Ebərəje 13: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
