Ebərəje 12

1Be ɓa sijee kara, bula bo njetar najije gugu dɔ-si, ɗaa ar-si j-a ɗisije nekodo gə neɗa gə kṵra̰y gə dəbə-si guburu le, ɗaa j-uwaje gədərə dan nena gə to no-si gə, 2kəm-si gə dɔ Jeju gə, gə ye ja to ngira takagə lə-si le, mba kar-ɛ gədə-si saar tɔl t-ɛ. N-gərə rɔləl gə to ngina-a ɗaa, n-o ko̰ kagə dəsə gə, n-o rɔ kul gə ne ang, be ɓa n-isi ne dɔ ji kɔl Luba gə.

Kuwa gədərə dan nena gə

3May kar ar-je mə-si ole dɔ-ɛ ꞌne gə njeneɗaje gə kṵra̰y ꞌnjigi-e ang gə kɔrɔ ja ngaa n-uwa gədərə, ɗaa ar-je mə-si ila kasə ang.

4Sisəy le ꞌɗɔje gə neɗa gə kṵra̰y uwaje gədərə saar uy-je ne ang baa ɓi. 5Ngaɓa mə-si uy dɔ tar ndəji gə d-ar-si ɗəw kara baa to gə dəw ndəji ne ngan-ɛ be, gə na:

Ngon-m, o siri lə Mbayɓe gə ne ndam ang,

Ngaɓa logə ꞌndang-i nama ar ɔr singa-i ang.

6 Mba dəw gə Mbayɓe njigi-e ɓa siri-e,

Ngaɓa ngon gə ɗa-ɗa gə ta ta kəm-e ɓa n-unda gə ndəy. # 12.6 Gut 3.11-12

7Ɓo Luba siri-si nama uwaje gədərə, mba n-siri-si gə ngan-ɛ. Ngon gə ɗa ɓa bɔ-ɛje siri-e ang wa? 8Ngaa to gə ɓo ꞌlalje siri gə to ɔji dɔ dəwje tɔ̰y nama, ꞌtoje nganje gə bɔ-sijee godo ɓo nganje bɔ-jeje ga̰ ang. 9Ngaa bɔ-sijee gə ɗəw darɔ gə to dəwje ja baa ꞌsiri-si d-ar j-a ɓəəl, ngaa ɓədə ɓa j-a koso kul no bɔ-sijee gə dara gə nje kar-si təbə gə ang wa? 10Bɔ-sijee-je le ꞌsiri-si kur-e əw ang baa mba d-o gə ne gə may; ngaa Luba siri-si mba may lə-si gə tɔgərɔ, mba kar j-um ne sə-a naa gə ɗəw sangə rɔ gə. 11Siri gə ɗa-ɗa kara dɔngɔr-ɛ le to gə ne wungu ɓo to ne rɔləl ang; ngaa go-e gə, ngaɓa turu nje gə ꞌsiri-je le ar ꞌto nje kunda ɗɛgɛgɛ gə neje dana gadə-gadə.

12Gəl-e gə nee ɓaꞌndujije ji gə unda ndɔlɛ le ngaɓa gɔl gə uy wɔɔ kara ꞌndujije tɔ. 13May kar-si ꞌnjaje ɗəw gə dana njururu mba kar gɔl gə aw məndə jɔgə rɔ-ɛ ang, ngaa kar-ɛ aji.

14May kar-si ꞌsangəje go ɗɛgɛgɛ mba kar to horo-si gə gə dəwje tɔ̰y ngaɓa sangə rɔ godo nama dəw a ko kəm Mbayɓe ang. 15May kar-si oje gə maj-ɛ mba kar mənuji lə Luba lal dəw kara ang, mba kar dəw təl to riya gə adə, mba riya gə adə le oso mə mar-ɛ gə nama a tuji mar-eje tɔ̰y ɗaa dəw a kusa ang.

16Oje gə maj-ɛ mba kar dəw kara ja kara aw gə bula njagəda ang nəm, gə dəw gə njedabə ne lə Luba dasəra to to gə Esaw be ang, mba n-to ngon dəər ngaa n-uwa mbəl ne nekusa. 17ꞌGərəje to gə go-e gə ngaɓa njigi kinga ndu tɔr ɗaa lo-e godo, n-sangə gə man no ja ngaa n-inga ɗəw gə n-a təl ne gə bɔ-ɛje kar turu ne ndu-e ang ngaa.

18Dɔ ər gə dəw a kɔr gə ji-a ang, gə pər uba kəne ngug-ngug le sisəy ꞌmbɔbə-je ang, lo ndul ang nəm, cil ciməri ang nəm, ləl bo ang nəm, 19kuul gə ɓar ang nəm, ndu gɔsə dəw gə ɓar gə nje gə d-o ꞌpa na asə ngaa. 20Mba ndu gə nee gə d-un le al dɔ-je: Le to da ja ɓa ɔr dɔ ər nee le kara d-a tila-a tɔl-ɛ. 21Ngaɓa ne le to ɓəəl ya̰ ɗaa Moyiji pa na: Njil-m ce ngaɓa m-isa ɗɛgə-ɗɛgə. 22Ngaa sisəy le ɗaa ubaje dɔ ər gə Siyo̰ ar-je kəne ngaɓa andəje ɓebo gə lə Luba gə nje kisi kəm baa, Jerujalɛm gə dara, gə anjije bula-bula ꞌmbo̰ naa ꞌɗa nay kəne; 23andəje lo mbo̰ naa gə lə ngan dərje gə d-unda rije mə dara gə, ar-je rɔ Luba gə nje gangə tar dɔ dəwje gə tɔ̰y, gə dɔ njil dəwje gə Luba oje gadə-gadə gə ꞌɗe gə dəwje gə may pɛdə. 24Ar-je rɔ Jeju gə, nje gɔl tar kone gə sigi ngaɓa gə məsə gə ꞌtusu gə may unda kar Abɛl.

25Oje ɓa, dəw gə nje pa tar kar-si le, ɔs-eje ngərəng ang. Mba nje gə d-ɔsə nje ndəjije-je dɔ nangə nee ngərəng le, ꞌlal kuba tuji ang baa, ngaa ɓədə ɓa sijee gə dəw ḭ dara ja ɗe ndəji-si a ɓo j-a mbadə tar t-ɛ gə le se, j-a kuba tuji ang wa? 26Ndu-e yə dɔ nangə yig-yig, ngaɓa ɓogəne n-un ndu-e n-pa na: Gɔl kara ja cibi, m-a kar dɔ nangə baa yə ang ngaa dara kara nəm tɔ. 27Tarje gə nee: Gɔl kara ja cibi tɔji to gə neje gə yə le to nekundaje gə d-a nday mba kḭya̰ lo kar ne gə a yə ang a to gə no. 28Gəl-e gə nee ɓa mba j-ingaje ɓeko̰ gə a yə ang le ɗaa j-a ɗaje Luba oyo, gə ɓəəl gə kila kuji ngaɓa j-a polo-eje ne. 29Mba Luba lə-si kara to pər gə o̰ bilim-bilim.#12.29 Ttt 4.24

Currently Selected:

Ebərəje 12: lap

Highlight

Copy

Compare