Nje gə Galat 4

1Be ɓa, m-pa na: Dɔ kar tɔ̰y gə njekuwa nenduba nay ne ngon baa ɓi le, n-to gə ꞌɓəə neje tɔ̰y ja ngaa, ne kara gə n-unda ne rɔ-ɛ ɓəɗə gə ɓərə le godo. 2Ngaa n-a kila kuji dɔ dəwje gə njegəm-eje gə nje ka dɔ nekingaje lə-a saar n-ngəbə ne ndɔ gə bɔ-ɛje ɔji. 3Sijee kara, logə j-a nay nganje ɓi le, j-a to ɓərəje lə njilje gə o̰ dɔ nangə nee. 4Ngaa logə dɔ kar gə d-ɔji asə ɗaa, Luba ula ngon-e. Jene ɓa uji-e, ɗaa n-tɔgə gəl torondu gə. 5N-ɗe n-ɔr dəwje gə d-isi gəl torondu mba kar d-a to ngan kodoje. 6Ne gə tɔji to gə ꞌtoje nganje lə Luba le ɓa nee, Luba ula Njil Ngon-e mə-si gə. Njil ɓar ne wəəl na: Aba! Bɔy! 7Be ɓa, ꞌi to ɓərə ang ngaa, ngaa ꞌi to ngon gə kuji kəy ngaa ɓo; to gə ɓo ꞌi to ngon gə kuji kəy nama, ꞌi to nje kuwa nenduba ɗəw gə lə Luba.

Pɔl jɔgə rɔ-ɛ ɔji dɔ njetakagəje gə Galasi

8Kede, logə ꞌgərəje Luba ang ɓi le, ꞌtoje ɓərəje lə njilje gə kṵra̰y gə to magə baa. 9Ngaa ɓisine ɗaa, ꞌgərəje Luba ose, Luba gərə si, ngaa na ban cibi ɓa ꞌtəlje awje rɔ njilje gə tɔgə-je godo, ngaɓa to neje gə baa wa? Se ꞌnjigije mba təl to ɓərəje lə-je cibi wa? 10Ilaje kuji dɔ ndɔje gə, nayje, karje, dɔ kar gə Ɓalje! 11Njil-im ce mba kulaje tɔ̰y gə m-ɗa horo-si gə le təl to ne gə baa.

12Ngan ko̰-mje, kɔgərɔ ja, undaje rɔ-si to gə ꞌma be, mba ꞌma m-təl m-to to gə sisəy be tɔ. M-gərə to gə ꞌtujije mə-m ang baa. 13ꞌGərəje gə maj-ɛ to gə mbɔr dɔ rɔ-m gə to-m ɓa m-ila mbərə Tar gə May m-ar-si dɔngɔr. 14Rɔ-m gə jɔgə-m ya̰ ja le, təl to nena mə-si, ngaa ꞌdabə-mje ang nəm ngaɓa ꞌyiɛm-mje ang nəm tɔ; uwa-mje rɔ-si to gə anji lə Luba, to gə Kirisi Jeju be. 15Se rɔləl lə-si gə kede le aw ɗa ngaa wa? Mba rɔləl lə-si gə m-o dɔ ndɔ-ɛ əng le ɗəw to nama kandə kəm-si ja kara a tɔr-je kar-mje. 16Se tar gə tɔgərɔ gə m-pa m-ar-si le ɓa m-təl to ne njeba̰a̰ lə-si wa? 17Dəwje gə ꞌɗa rɔ-je to gə ta dɔ-si o̰je ya̰ əng le, ɗa gə ne gə tɔgərɔ, ngaa d-aw njigi mba kɔr-si mə ji-m gə, mba kar ꞌɗaje to gə bənəng ɔji dɔ-je tɔ. 18May kun rɔ ɗa ne ne gə may gə dɔ karje tɔ̰y, ɓo gə mba kar-m m-ga̰ horo-si gə ɓa ang. 19Ngan-m, m-təl m-o ko̰ ne mba tar lə-si ja cibi, to gə jene gə ndo to-e be saar gə mba kar Kirisi ula ne ngira-a mə-si gə. 20Ɓogəne gə m-ar nee ja, m-njigi ga̰ horo-si gə mba pa tar gə ndu gɔbə gə ɗangə, mba lo tar igi-m sɛl mba tar lə-si.

21ꞌPaje ar-mje m-o: Sisəy gə ꞌnjigi-je mba kisi gəl torondu gə le, tar gə torondu pa le se mbi-si o ang wa? 22Be ɓa, ꞌɗa mə Mbede gə na: Abəraham uji nganje gə jingaw joo, ye gə kara n-uji-e gə jene gə to ɓərə, ɗaa ye gə kara gə jene gə dɔ-ɛ to doy. 23Ngaa ngon lə jene gə to ɓərə gə n-uji-e ɗəw darɔ gə, ɗaa ngon lə jene gə dɔ-ɛ to doy le n-uji-e gə go ne gə Luba uwa dɔ gɔl-ɛ. 24Tar gə nee le to ndaji ne: Jeneje gə joo nee le tɔji kone gəl joo ja tɔ. ꞌYe gə kara ḭ dɔ ər gə Sinayi gə ri-a na Agar, n-unda gəl ɓərəje, 25Agar le tɔji dɔ ər gə Sinayi le to dɔ nangə gə Arabi ɗaa, ꞌne n-asə naa gə ɓe gə Jerujalɛm gə ɓisine, mba n-to ɓərə gə ngan-ɛje naa gə kara baa. 26Ngaa Jerujalɛm gə taar dɔ-ɛ to doy, ɗaa ꞌne ja to ko̰-sijee. 27ꞌƊa mə Mbede na:

ꞌKaw kadə, ꞌi gə uji ngon ang!

ꞌI ɗa rɔləl, ꞌi gə ndɔ kara kara ꞌgərə ndo ang, ꞌɗa rɔləl gə ꞌkuwi ta-i gə!

Mba ngan lə jene gə ngab-ɛje mbad-ɛ gə d-a bula

Kunda ngan lə jene gə ngab-ɛje ga̰.

28Ɗaa sisəy ngan ko̰-m le, ꞌtoje nganje gə d-uji-si ɗəw ndu kun gə lə Luba to gə Ijagə be. 29Kede ləw le, ngon gə d-uji-e ɗəw darɔ gə ula kəm ngon gə d-uji-e ɗəw gə lə Njil ndoo le, ɓogəne kara to to gə be ja ɓi. 30Ngaa Mbede pa na ban wa? ꞌTɔbə jene gə to ɓərə gə ngon-e mba ngon lə bərə a kuwa nenduba naa gə ngon lə jene gə dɔ-ɛ to doy ang. 31Be ɓa, ngan ko̰-mje, j-a to nganje lə jene gə to ɓərə ang, ngaa j-a toje nganje lə jene gə dɔ-ɛ to doy.

Currently Selected:

Nje gə Galat 4: lap

Highlight

Copy

Compare