Nje gə Galat 5

Jeju ar dəwje dɔ to doy

1 Kirisi ɔr kula ɓərə lə torondu gɔbə-si gə mba kar dɔ-si to doy. Be ɗaa, ar-je dɔ gɔl si gə jang, ɓo ꞌtəlje ulaje gɔbə-si jugu ɓərə gə gugu ang. 2Oje! ꞌMa Pɔl, m-pa m-ar-si: To gə ɓo ar-je d-unja bərə-si nama Kirisi a to ne kara mba tar lə-si ang. 3M-njigi təl pa gɔl kara ja cibi kar dəw gə ɗa-ɗa gə ar d-unja bər-e le: May kar-e ila kuji dɔ torondu gə tɔ̰y ja ɓa. 4Sisəy gə ꞌsangəje mba kar d-o si gə dəwje gadə-gadə ɗəw torondu gə le, horo-si riya dana gə Kirisi, ngaɓa ꞌlalje mənuji. 5Kar-sijee le, j-a ngina gə takagə ɗəw Njil gə mba kar d-o si gə dəwje gə gadə-gadə, ye ɓa gə ne gə m-ngəɓə. 6Mba dəw gə um naa gə Kirisi Jeju nam le, kunja bərə ose kunja bərə ang ɓa to gə ne ang, ngaa takagə gə tɔji rɔ-ɛ, gə njigi ɓa to gə ne.

7Sisəy unje ɗəw gə maj-ɛ nam: Na ɓa ɔgə-si lo kila kuji dɔ tar gə tɔgərɔ gə wa? 8Kɔgə gə d-ɔgə si le, gəl-e ḭ ɓə lə ye gə nje ɓar-si ang. 9Guway kodo njɛ̰ ja ɓa ꞌmbo̰y ne nduji ɗaa ti ɗusu lo. 10ꞌMa ɗaa, m-unda mə-m dɔ-si gə go ɗəw lə Mbayɓe, to gə kəji lə-si to dang gə kar ꞌma ang. Ngaa ye gə nje tuji kəji lə-si le, to gə na-na ja kara, tar-ɛ a kuwa dɔ-ɛ. 11Ngan ko̰-mje, ye gə ɔji dɔ ꞌma le, to gə ɓo m-to gə njekila mbərə tar kunja bərə nama, mba ɗi cibi ɓa d-ula kəm ndoo wa? Bənəng ɗaa, tar kuy lə Kirisi kagə dəsə to jigi tuga lə dəw kara ang. 12Nje gə aw tuji kəji lə-si le, may kar ꞌtəl rɔ-je gə mbakuduje!

Nja ɗəw Njil gə

Rɔm 8.1-14; 13.12-14

13Sisəy ɗaa, ngan ko̰-mje, ꞌɓar-si kar dɔ-si to doy; ɗaa ne kara ɓa le, may kar unje dɔ to doy nee le ꞌnjaje ne ɗəw darɔ gə ang, ngaa go ɗəw njigi ɗaa, ꞌɗaje kula ar-je naa gə yo gə nee. 14Be ɓa, torondu tɔ̰y le tɔl t-ɛ gə tar gə kara baa nee: ꞋI a njigi njemar-i to gə darɔ-i be. 15Ngaa to gə ɓo ꞌto̰je naa gə usaje naa gə yo gə nee nama, oje gə maj-ɛ ɓa na a tujije naa gə yo gə nee tɔ. 16Tar gə m-pa m-ar-si ɓa nee: Ḭya̰je Njil Njerɔsangə ar-je tɔji-si ɗəw, ɗaa a ɗaje mə njigi lə darɔ ndɔ kara ang. 17Mba neje gə kar darɔ tila kəm kar Njil, ngaɓa kar Njil kara tila kəm kar darɔ; neje lə darɔ gə neje lə Njil, ꞌtɔsə kəm naa ɓa gə mba kar ꞌɗaje neje gə mə-si njigi ang. 18Ngaa to gə ɓo Njil ɔr no-si nama, torondu o̰ dɔ-si ang.

19Neje gə darɔ njigi le to ɗaga ɗang-ɗang. Neje le ɓa nee: Kaya, wə̰rə̰ neɗa gə kṵra̰y, bula jagəda, 20polo magəje, ɓar uma, njigi naa ang gə kɔrɔ, ko ta naa ang, nər mə, wungu mbə, kəji mə bo, tḭ naa, ngaɓa kay naa, 21ɗa kəm kə̰y, to mbə kodo, to ka guru, ngaɓa neje gə ɗangə gə ta gə je naa be. M-təl m-pa m-ar-si to gə m-ndəji-si ne kede le; dəwje gə nje ɗa neje gə to gə be le, d-a kandə ɓeko̰ gə lə Luba ang yom ja.

22Ngaa kandə Njil le ɓa nee: Njigi, rɔləl, ɗɛgɛgɛ, kore ur, məmay, ɗa may, takagə, 23kaw yururu, kuwa mə ngangə; neje gə nee le, torondu ila tar dɔ-ɛ gə ang. 24Ɗaa nje kar Kirisi Jeju-je le ɓərə darɔ gə ɓo neje gə uwa-je ɓərə gə kagə dəsə gə. 25To gə ɓo Njil ɓa ar-si j-isi kəm baa nama, j-a njaje gə go ɗəw lə-a. 26J-undaje kar-si j-a tɔsə ne ta naa gə yo gə nee ang, ngaɓa j-a ꞌɗa kəm kə̰y dɔ naa gə yo gə ne ang tɔ.

Currently Selected:

Nje gə Galat 5: lap

Highlight

Copy

Compare