Nje gə Kɔlɔsə 3

Pa nja gə sigi gə ɗəw gə lə Kirisi

Plp 3.18-21; 1Ja̰ 3.1-3; Epɛ 5.3-20; 4.17-21

1To gə ɓo uyje ɓa ꞌndolje gə Kirisi naa gə nama, may kar ꞌsangəje go neje gə dara, lo gə Kirisi isi kəne dɔ ji kɔl Luba gə.#3.1 Paj 110.1. 2Ar-je kəji neje gə dara ɓa uwa mə-si ɓo neje gə dɔ nangə gə nee ang. 3Mba uyje ɗaa təbə lə-si iya rɔ-ɛ gə Kirisi rɔ Luba gə. 4Logə Kirisi gə to təbə lə-si a kila rɔ-ɛ gə ɗaga ɗaa, təbə lə-sisəy kara a kila sə-a rɔ-ɛ naa gə dan rɔnduba gə. 5Ar-je ɓo neje gə nangə nee uy mə-si gə: ɗa kaya, wə̰rə̰ kaya, ɓo neje gə uwa darɔ ɓərə, ɓo neje gə kṵra̰y ngaɓa ɓo lar gə to polo magəje. 6Gəl-e gə nee ɓa wungu lə Luba ɗe ne dɔ dəwje gə nje dɔ ngangəje gə. 7Sisəy ja kara logə ꞌnayje dan neɗa gə kṵra̰y gə ɓi le, pa nja-si gə ləw to to gə be ja tɔ. 8Ngaa ɓisine ɗaa, sisəy le, may kar ꞌtɔrəje neje tɔ̰y gə to nee le horo-si gə gə ɗangə: wungu, kəji lə daje, məndul, pa gə naa, gə tarje gə ngabula gə aw ce ta-si gə.

9Sisəy le, ꞌpaje tar gə ɗəgərə ar-je naa ang, mba ɔrəje darɔ gə ləw gə kula ɗ-ɛje nam ngaa. 10Be ɓa unje pa nja gə sigi gə aw dɔ-ɛ gə kede-kede mba kun ne ndaji#3.10 Lgn 1.26. njekunda gəl-e mə-si gə mba kar ꞌgər-eje ne ɔr njal. 11ꞌYe gə nee le ɔji dɔ gərɛk ang nəm, Jiibi ang nəm, njekunja bərə ang nəm, njemɔdə ɓɔl ang nəm, mbaa ang nəm, nje kəm karə ang ang nəm, ɓərə ang nəm, nje dɔ to doy ang, ngaa Kirisi ja kara baa to mə-je gə tɔ̰y.

12Be ɓa Luba ja njigi-si, mbərə-si ngaɓa togo-si le ɗaa, may kar ko kəmtondoo gə tɔgərɔ, gə məmay, kula dɔ ngulum, gə kaw yururu gə kila mə dɔ mar-ɛ gə ɓa ar-je uwa mə-si. 13Oreje ur-si dɔ naa gə gə yo gə nee, ngaɓa dəw gə ɓo aw gə njemar-ɛ gə tar nama ɔrəje tar dɔ naa gə gə yo gə nee, to to gə Kirisi kara ɔr ne tar dɔ-si gə le, sisəy kara ꞌɗaje gə naa to gə bənəng tɔ. 14Ngaa ne gə to ɓəəl unda neje gə əng tɔ̰y ja to njigi mba njigi ja ɓa to kula gə a tɔ-si naa gə kar ꞌmayje ne pɛdə. 15May kar ɗɛgɛgɛ lə Kirisi gə ꞌɓar-si kəne d-ar umje ne naa gə gə darɔ gə kara baa le, o̰ ɓe dɔ ɓəngərə si gə. ꞌƊa-eje oyo.

16Ar-je tar lə Kirisi ɗa ɓe mə-si gə gə mong-e, ꞌndoje naa ngaɓa ꞌndəjije ne naa gə yo gə nee gə kəm karə, ɔsəje gaji Luba gə pa kɔsə, paje ɓədə-ɓədə, gə paje gə ɗəw Njil gə, ɔsəje pa, ꞌɗa-eje ne oyo gə dɔ ɓəngərə si tɔ̰y.#3.16 Epɛ 5.19-20. 17May kar tar ɓa a kaw paje ose ne gə ɗa-ɗa ɓa a kaw ɗaje kara, ꞌɗaje ne tɔ̰y gə ri Mbayɓe Jeju, ꞌtəlje ne gə oyo ar-je Luba gə Bɔ dəwje gə ri-a.

Mə kəy lə njetakagəje

Epɛ 5.22-33; 6.1-9; 1Pi 2.18-25; 3.1-7

18Jeneje, na-na kara, oso kul no ngab-ɛje gə, to ne gə may kəm Mbayɓe gə.

19Jingawje, na-na kara njigi jene lə-a ngaɓa ar-je rɔ-si adə-si dɔ-je ang. 20Nganje, dan neje gə tɔ̰y le, ilaje kuji dɔ njekuji-sijee gə, mba ye gə kən ja ɓa may ta ne kəm Mbayɓe gə. 21Bɔ nganje, ꞌtujije mə ngan si ang, na a kḭ kɔr singa-je.

22Ngan njekulaje, dan neje gə tɔ̰y le, ilaje kuji dɔ ꞌɓəə-sijee gə gə go ɗəw gə darɔ gə, ɓo ꞌɗaje mba ta kəm-je ang to to gə aw sangəje mba mayje ne ta kəm dəwje gə, ngaa ꞌɗaje gə mə gə may ꞌɓəəlje ne Mbayɓe. 23Neje tɔ̰y ja gə a kaw ɗaje nama, ꞌɗaje gə dɔ ɓəngərə-si ja tɔ̰y to to gə aw ɗaje mba kar Mbayɓe be, ɓo mba kar dəwje baa ang, 24mba Mbayɓe ja a kar-si nekuga dɔ ji gə nenduba. Ɗaa ꞌɗaje kula lə Kirisi Mbayɓe. 25Mba dəw gə ɗa ne dɔ buguru nama a kinga kuga neɗa gə dɔ buguru tɔ, ngaɓa kɔr kəm dəw godo.#3.25 Ttt 10.17.

Currently Selected:

Nje gə Kɔlɔsə 3: lap

Highlight

Copy

Compare