Nje gə Kɔlɔsə 2

1Be ɓa m-njigi kar-si ꞌgərəje ɗɔ gə to ɓəəl ya̰ gə m-ar t-ɛ gə mba-si, mba nje gə Lawdise ngaɓa mba ꞌjejee tɔ̰y gə d-o-m ang ɓi, 2mba kar d-uba ne singa mə-je gə, kar kəji lə-je to ne kara baa dɔ njigi gə ngaɓa kar negərə ɗusu mə-je ar ꞌgərə ne ne lə Luba gə lo kiya-a gə, gə to Kirisi le, 3ꞌne le ɓa nekingaje tɔ̰y gə to gə kəm karə gə negərə d-iya rɔ-je rɔ-ɛ gə.

Ndəji gə ɔji dɔ netɔjije gə gə mbɔr-ɛ baa

4M-pa bənəng mba kar dəw ɗe ərə si gə tarje gə baa ang. 5Mba, le darɔ-m godo gə si kara m-ga̰ gə si ɗəw njil gə, rɔ-m ləl-m mba m-o to gə isije gə go ɗəb-e ngaɓa takagə lə-si kara to gə mong-e dɔ Kirisi gə tɔ.

6Be ɓa mba ꞌtaje Kirisi Jeju gə Mbayɓe ɗaa may kar-si ꞌnjaje ɗəw gə lə-a, 7ꞌmaaje ngira-si rɔ-ɛ gə ngaɓa ubaje singa, ar-je njang dɔ takagə gə gə go ɗəb-e gə ꞌtɔji-si, cibi ꞌɗaje Luba oyo jaga-jaga ja.

8Oje gə maj-ɛ ɓa, mba kar dəw un kəm karə lə dəwje uba ne si gə kula ngaɓa gə tar kərəje gə baa gə go nejiɓe lə dəwje, gə go neje gə dɔ nangə nee baa ɓo gə go ɗəw lə Kirisi ang. 9Mba ꞌne gə n-un lo kun darɔ Luba ja mɔgɔgɔ. 10Ɗaa təbə lə-sisəy andə mə naa gə gə təbə lə-a, ꞌne gə n-to Mbay gə nje dum dɔ njilje gə njeko̰ dɔ loje tɔ̰y ngaɓa njeko̰ loje tɔ̰y nəm tɔ. 11Mba um-je sə-a naa gə le ɓa d-uja si bərə gə ji dəwje ɓa unja ang, gə to gə d-unja ndaar rɔ-si d-ɔr gə ɗangə le ang; ngaa to kunja bərə gə ḭ rɔ Kirisi gə.#2.11 Rɔm 6.4. 12ꞌDubu-si sə-a ɗəw batɛm gə, d-ar-si ja ꞌce-je sə-a mə buwa yo tɔ ngaɓa gə ɗəw ta kagə singamongə Luba gə ar-ɛ n-ce ne horo nje gə d-uy gə. 13Sisəy le uyje mbudugu ɗəw neɗaje gə gə dɔ gɔl-ɛ ang gə lə-si ngaɓa mba unjaje bərə-si ɗəw darɔ gə ang, n-ar-si ꞌtəl isije sə-a kəm baa, n-ɔr ne tar neɗaje gə kṵra̰y lə-si tɔ̰y dɔ-si gə; 14n-tuji ne tar gə ꞌɗa mbede gə uwa dɔ-si, mbede gə tar gə m-e gə ila tar dɔ-si gə le, n-ɔr dɔ-si gə n-ɓər-e kagə dəsə gə; 15n-ɔr ne mbay dɔ njilje gə njeko̰ dɔ loje gə njeko̰ loje, n-unda-je gə nekogo kəm dəwje gə, n-cɛdə ne ɗɔ dɔ-je gə ɗəw kuy gə kagə dəsə gə.

16Be ɓa, ar-je dəw ila tar dɔ si gə ɔji dɔ nekusa ose nekay, ɔji dɔ tar ɗa nay, gə nay gə sigi, ose ɔji dɔ ndɔ kuwa kɔr ang, 17neje gə əng tɔ̰y le to njil neje gə a kaw ɗe ngaa ne gə tɔgərɔ ɗaa to Kirisi. 18Ar-je dəw unda gusu gə njekula dɔ-ɛ ngulum ila ne tar dɔ-si gə ang ngaɓa lo polo anjije gə nj-ɛ a pa na n-o lokiya gə, n-ɗa gə ne kunda kar baa gə go tar kəjije lə-a gə ɗəw darɔ gə. 19ꞌJejee nee le, d-um naa gə gə Kirisi gə to dɔ dəw le ang. Mba Kirisi le to dɔ dəw gə darɔ gə ngira rɔje tɔ-ɛ ne naa gə lo kuru go̰je naa gə ɗaa Luba ɓa ar dəw tɔgə ne.

20To gə ɓo uyje gə Kirisi naa gə nama ar-je əw gə ndu kar neje gə dɔ nangə nee mba ɗi ɓa ar-je ndu neje gə dɔ nangə nee d-o̰ ɓe dɔ-si gə cibi wa?#2.20 Gal 4.3. 21Nduje nee le na: Un ang, ꞌna ang nəm ɔr gə ji-i ang nəm! 22Neje tɔ̰y nee le to neje gə dəwje d-aw ɗa ɗaa a tuji ang wa? To ndu ko̰ dɔ neje gə netɔjije gə ḭ ta dəwje gə ja baa, 23tɔgərɔ ja, to nduje gə ta naa gə kəm karə be, gə ɗəw polo ne gə ḭ mə dəw gə, gə may lə-a kara kara godo ngaa gə mba tɔl ne ta ɓo gə darɔ gə ja baa.

Currently Selected:

Nje gə Kɔlɔsə 2: lap

Highlight

Copy

Compare