2 Nje gə Kɔrɛnt 3

1Se sijee ja cibi j-a təl ɗa tar naji lə-sijee to gə ɗangə ɓi wa? Ose sijee ja njinga rɔ-si gə mba kaw ɓe lə-sisəy gə mbede tar naji gə ɔji dɔ sijee to gə nje gə kɛm be, ose gə mba kar-sijee ja ta ji sisəy gə wa? 2Sisəy ja ꞌtoje gə mbede lə-sijee, gə ꞌɗa mə-sijee gə, gə dəwje tɔ̰y ꞌgərə ngaɓa ꞌtura. 3Tɔgərɔ ja, to ɗaga arə ngadə sisəy le ꞌtoje mbede gə Kirisi ɗa gə ɗəw kula ɗa gə lə-sijee, mbede gə ꞌɗa gə man ne gə ndul ang, ngaa gə Njil lə Luba gə nje kisi kəm baa, ngaɓa ꞌɗa mə bəgərəje gə to gə ər ang, ngaa ꞌɗa mə bəgərəje gə to gə darɔ, mə-sisəy gə kəy. 4Ye ɓa gə mə-si gə j-ḭya̰ yag j-ar Luba lə-sijee ɗəw gə lə Kirisi. 5Mba kasə gə sijee j-asə ɗa ne gə dɔ rɔ-si ang, ngaa Luba ɓa ar-sijee singa ɗa neje. 6Luba ja təl sijee gə dəwje gə d-asə to ngan njekulaje lə kone gə sigi, ɗəw torondu gə mə mbede gə ꞌɗa ang, ngaa ɗəw Njil gə; mba torondu gə mə mbede gə le to gə yo, ngaa Njil ɓa ar dəw kisi gə təbə. 7Ngaa, to gə ɓo kula ɗa yo gə d-unja mbed-e mə bəgərə ər baa ɓi ɓa ndogo ar ngan Ijirayɛlje d-asə kun kəm-je ko ne ngo no Moyiji ang, mba ndogo lə-a, gə kur-e əw ang baa nee, 8ɓədə ɓa kula ɗa Njil a ndogo to ɓəəl ya̰ ang wa? 9Mba kula gangə tar ɓa, to gə ɓo inga riɓar nama, kula neɗa gə dana gadə a kinga riɓar gə a to ɓəəl kal dɔ lo ang wa? 10Be ɓa, riɓar gə dɔ ndɔ gə kede le to gə riɓar gə unda nangə ngaa, ɓo mbɔbə mbɔr ye gə ɓisine gə to ɓəəl al dɔ lo nee le ang. 11Mba to gə ɓo ne gə kur-e əw ang ja baa ɓa riɓar to dɔ-ɛ gə le ɗaa, ye gə to gə ndɔ gə ndɔ le riɓar lə-a a to ɓəəl kal dɔ lo.

12Be ɓa, sijee j-inga ne kunda mə gə gar-ɛ godo ɗaa ja ɓəəl ang. 13Sijee j-a ɗa to gə Moyiji gə on kəm-e gə ta kubu mba kɔgə ne ngan Ijirayɛlje lo ko ɗudu ndogo gə kur-e əw ang nee le ang. 14Ngaa kəji negərə lə-je uy mbudugu, mba ꞌturaje mbede kone gə ləw ɗaa d-o to gə saar ɓisine ja kara, ta kubu gə nje kara ne le to baa ja dɔro ɓi, mba ta kubu nee le igi ɗəw kum naa gə lə Kirisi. 15Logə ꞌtura mbede lə Moyiji ɗaa, saar ɓisine ja kara, ta kubu nee udu kəm-je baa ɓi. 16Ngaa logə dəw turu kəm-e gə rɔ Mbayɓe gə ɗaa, ta kubu le godo. 17Mbayɓe to Njil, lo gə Njil lə Mbayɓe to kəne to lo gə dɔ to doy to kəne tɔ. 18Sijee tɔ̰y gə ta kubu nee godo kəm-si gə le, j-a tɔji riɓar lə Mbayɓe gə ɗaga ta kəm-si gə to gə tatara gə dəw o ne rɔ-ɛ be. Mbayɓe gə to Njil mbəl si ar j-a ta sə-a naa dan riɓar gə ɔsə dɔ naa gə kede-kede.

Currently Selected:

2 Nje gə Kɔrɛnt 3: lap

Highlight

Copy

Compare