2 Nje gə Kɔrɛnt 4

Riɓar je gə rɔ kul

1Te 2.1-6; 2Kɔ 2.14-17

1Gəl-e gə nee ɓa, kula gə Luba um ji-si gə go məmay gə lə-a le, sijee j-ila ne kasə ang. 2Ngaa, neje tɔ̰y gə to lokiya gə ngaɓa to nerɔkul lə-sijee le, j-ɔsə ngərəng, sijee j-a tula pa nja-si naa gə ang ngaɓa ja buguru dɔ tar lə Luba ang tɔ. Ngaa, ja kila dɔ tar gə tɔgərɔ gə ɗaga, ja ɗa ne tar naji lə-sijee kar kəji lə dəwje to ne dɔ sijee gə ngadə no Luba gə. 3Ngaa, to gə ɓo Tar gə May lə-sijee iya rɔ-ɛ nama, iya rɔ-ɛ ɔji dɔ nje gə d-igi, 4ngaɓa ɔji dɔ nje məkədərəje gə magə gə dɔ nangə nee rɛ̰ kəji negərə lə-je badə mba kar d-o ndogo lə Tar gə May kar riɓar lə Kirisi gə ta naa gə Luba le ang. 5Bənəng ang baa, mbərə tar gə j-ila le ɔji dɔ sijee ang, ngaa Jeju kirisi gə to Mbayɓe ɓa j-ila mbər-e. Ngaɓa sijee j-o rɔ-sijee gə ɓərəje lə-sisəy mba Kirisi. 6Mba Luba gə nje pa na: May kar lokarə ndogo dan cil ciməri gə, ꞌne le ja ɓa ndogo mə-sijee gə mba kar j-inga ne negərə gə unja ngadə ɔji dɔ riɓar lə-a gə ndogo ta kəm Jeju Kirisi gə.

2Kɔ 6.3-10; 1.5-11; 2Tm 2.8-11

7Ngaa nebaw gə nee le, sijee j-odo darɔ-si gə to jo anji gə mba kar singamongə gə asə kuwa kɔji ne mar-ɛ ang nee le to ne kar Luba ɓo to singamongə lə-sijee ang baa. 8Ne singaje dang-dang ce dɔ-si gə ja, ngaa guru singa-si ang. Mə-sijee gangə man ja, ngaa j-ila kasə ang. 9D-ula kəm-si ndoo ja ngaa Luba ḭya̰ si ang. ꞌLagə-si ja, ngaa ꞌbusu-si ang baa. 10J-un yo Kirisi dɔ-si gə gə ndɔje tɔ̰y, mba kar darɔ-si tɔji kisi kəm baa lə Jeju gə ɗaga ngadə. 11Mba sijee gə j-isi kəm baa le, j-a to ta yo gə gə ndɔje tɔ̰y mba Jeju, mba kar kisi kəm baa lə Jeju kila rɔ-ɛ gə ɗaga darɔ-si gə a kuy.

12Be ɓa yo o̰ ne ɓe dɔ sijee gə, ngaa sisəy ɗaa, təbə uru gada mə-si gə. 13Kəji takagə lə-si le to kara baa gə ye gə ꞌɗa mə mbede gə na: M-ta kagə, gəl-e gə ne ɓa m-pa ne tar. Sijee kara, ja takagə, gəl-e gə nee ɓa ja pa ne tar. 14Sijee ja gərə to gə nje kar Mbayɓe Jeju uy ɓa ndol le a kar-sijee j-uy ɓa ja ndol gə Jeju naa gə kara baa, ɗaa n-a kar-si j-ar-je naa gə no-ɛ gə. 15Be ɓa neje tɔ̰y gə ce dɔ sijee gə le, ce mba sisəy, mba kar mənuji ɗa kula mə dəwje gə bula, ngaɓa kar bula bo dəwje ꞌtəl ne gə oyo, gə d-ila ne riɓar dɔ Luba gə.

Kəy kisi gə a to no

1Pi 1.6-9; Rɔm 8.23-25

16Gəl-e nee ɓa, sijee j-ila kasə ang. Ngaa to gə ɓo da kasə rɔ-si gə ɗaga tuji kara, təbə gə to mə-si gə le a təl to sigi gə ndɔ gə ndɔ. 17Mba nekəmandooje gə ɗa si dɔ ndɔ gə ɓisine nee le, kur-e a kəw ang, ngaɓa ɔlɛ pɛl-pɛl baa, gə asə kuwa kɔji ne riɓar gə ndɔ gə ndɔ gə to gə ndər-e baa, gə nekəmandooje nee gɔl ɔji dɔ-si. 18Neje gə kəm dəwje o ɓa sijee ja tɔsə kəm-si kəne ang baa, ngaa neje gə kəm dəwje o ang; neje gə kəm dəwje o le a nday, ngaa neje gə kəm dəwje o ang le to gə ndɔ gə ndɔ.

Currently Selected:

2 Nje gə Kɔrɛnt 4: lap

Highlight

Copy

Compare