1 Nje gə Tesaloniki 5
5
Ndɔ təl lə Mbayɓe
Mat 24.36-51; Lug 12.35-40
1Ngan ko̰-mje, tar gə ɔji dɔ dɔ kar gə dɔ ndɔ le, sisəy a njigije kar ꞌɗa ne mbede d-ar-si ang ngaa. 2Mba sisəy ꞌgərəje gə maj-ɛ pɛdə to gə ndɔ lə Mbayɓe le a ɗe to to gə nje ɓogo mə cil gə be. 3Logə dəwje d-a pa na: Lo to ɗɛgɛgɛ ngaɓa nejɔgəje godo ngaa! Be ɓa dɔ kar-ɛ gə əng ja tuji a kuba-je nangə bus to to gə gə ndo gə ɔsə jene be ɗaa dəw kara kara a ce t-ɛ gə ang.
4Ngaa sisəy le ɗaa, ngan ko̰-mje, isije dan londul gə ɓa ndɔ gə nee le a kuba-si nangə bus to to gə nje ɓogo be ang; 5mba sisəy tɔ̰y ꞌtoje ngan lokarəje ngaɓa aw nja-je dan kara tɔ. J-a njaje mə cil gə ang nəm dan cil ciməri gə ang nəm. 6J-a cibi to gə nje gə kɛm ang, ngaa ar-si j-isije kəm baa ngaɓa j-undaje kəm karə dɔ rɔ-si gə. 7Mba ꞌjejee gə ꞌcibi le, ꞌcibi cil gə, ngaɓa nje gə kodo ɗa-je kara ɗa-je cil gə tɔ. 8Ngaa sijee gə ja to nje nja dan kara-je le, j-undaje kəm karə dɔ rɔ-si gə: J-ulaje kubu ɗɔ gə ngira king-king kar takagə, gə kar njigi ngaɓa jɔgə kar kunda mə lə kaji. 9Mba Luba uwa dɔ gɔl sijee mba wungu ang, ngaa mba kaji gə ɗəw gə lə Mbayɓe lə-sijee Jeju Kirisi, 10gə uy mba-si, mba kar le j-ɔsə ne kəm-si kɔrə ose j-a cibi ne kara kar j-isi ne sə-a naa gə kəm baa. 11To gə be ɓa may kar ꞌndəjije naa ngaɓa ulaje jingaw mə naa gə, gə yo gə nee to to gə aw ꞌɗaje ne kede le ja.
Ɗudu tarje
Rɔm 12.17-21
12Ngan ko̰-mje, j-a dəji-si kar ilaje kuji dɔ nje gə d-aw ɗa kula horo-si gə, gə d-ɔr no-si ɗəw gə lə Mbayɓe ngaɓa d-aw ndəji-si. 13May kar uwaje gə je nuji gə al dɔ mar-ɛ ngaɓa ꞌnjigije-je mba kula lə-je nee le.
Ar-je ɗɛgɛgɛ to horo-si gə.
14Ngan ko̰-mje, j-a ndəji-si kar ꞌndangəje njedabəje, ulaje jingaw mə nje gə singaje ɔr gə, ꞌlaje gə nje tɔgə godoje, ilaje mə-si pɔ̰ dɔ dəwje gə tɔ̰y.
15Oje gə maj-ɛ, may kar dəw kara kara ɗa kṵra̰y toro mar-ɛ gə ang; ngaa ꞌsangəje ɗəw ɗa may ja jaga-jaga horo naa gə ngaɓa gə dəwje tɔ̰y.
16Ar-je rɔ-si ləl-si jaga-jaga.
17Əwje rɔ-si dəji Luba ang 18Dan neje gə tɔ̰y le, ꞌɗaje oyo; mba to gə mə njigi lə Luba gə ɔji dɔ-si ɗəw gə lə Kirisi Jeju.
19Ilaje kagə no Njil gə ang; 20ꞌDabəje tar gə ta pajambərəje gə ang; 21ngaa ꞌtənje neje tɔ̰y so-so ɗaa ɔrəje kəm ꞌye gə may; 22Ne ja gə ne gə kṵra̰y nama ɔsəje ngərəng.
23May kar Luba gə nje gəl ɗɛgɛgɛ gə darɔ-ɛ ja unda-si gə losang-ɛ, may kar lo kunda rɔ lə-si tɔ̰y, gə njil-si, kəm gə darɔ le ꞌto gə lo-e mɔgɔgɔ kar tar uwa ne dɔ-je ndɔ ɗe gə lə Mbayɓe lə-si Jeju Kirisi ang! 24Nje ɓar-si le to dəw gə dana gadə ɗaa ꞌne ja ɓa na ɗa ne mba-si.
25Ngan ko̰-mje, ꞌdəjije Luba mba sijee tɔ.
26Oje ngan ko̰-mje tɔ̰y, ꞌtoje ne mbi-je pu-pu gə rɔsangə ar-mje.
27M-dəji-si no-gɔl Luba gə ja mba kar ꞌtura mbede nee le d-ar ngan ko̰-si tɔ̰y ja.
28May kar mənuji lə Mbayɓe lə-si Jeju Kirisi nay gə si!
Currently Selected:
1 Nje gə Tesaloniki 5: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
