2 Nje gə Tesaloniki 1
1
Pɔl tɔji rɔ-ɛ gə o njetakagəje gə Tesaloniki
1ꞌMa Pɔl, gə Silibɛ̰ je gə Timoce ja ɗa mbede nee j-ar Mbo̰ naa lə njetakagəje to Tesaloniki to kar lə Luba Bɔ-sijee gə Mbayɓe Jeju Kirisi. 2May kar Luba gə Bɔ-sijee-je gə Mbayɓe Jeju Kirisi d-ar-si mənuji gə ɗɛgɛgɛ.
Pɔl ar oyo Luba ɔji dɔ kuwa gədərə lə njetakagəje gə Tesaloniki
1Te 1.2-7; Plp 1.3-6
3Ngan ko̰-mje, j-ar oyo Luba jaga-jaga ɔji dɔ-si. To lo-e ja kar j-a ɗa be, mba takagə le sisəy ɔsə dɔ mar-ɛ gə kede-kede, njigi naa gə horo-si gə yo gə ne kara uru dɔ mar-ɛ gə ya̰ tɔ. 4Be ɓa, rɔ-si ləl-si dɔ sisəy gə horo Mbo̰ naaje lə njetakagəje le Luba, mba uwaje gədərə gə takagə lə-si dan nekəmandooje gə, gə dan ꞌməsərəje gə ce dɔ-si gə.
5Ne gə tɔji gangə tar gə gadə-gadə lə Luba le, ne nee le to mba sisəy a kasəje mba kandə-je Ɓeko̰ gə lə Luba gə oje ko̰ ne ɔji dɔ-ɛ. 6Be ɓa, Luba gə nje ɗa ne gadə-gadə a kar nje gə d-ula kəm-sisəy ndoo le, d-o ꞌməsərə tɔ. 7Ngaɓa sisəy nje ko ꞌməsərəje, n-a kar-si lo kuwa kɔr naa gə kara baa gə sijee, logə Mbayɓe Jeju a kḭ dara gə anjije lə-a gə to njesingaje, 8n-a ɗe mə pər gə a ko̰ bilim-bilim, mba bɛ̰ ta dəwje gə gərə Luba ang, gə dəwje gə d-ila kuji dɔ Tar gə May gə lə Mbayɓe lə-si Jeju ang. 9Ngaɓa, dəwje gə nee le, d-a ko ko̰, ɗaa d-a tuji gə dɔbo̰, d-a ko kəm Mbayɓe ang nəm, cibi d-a ko riɓar singamongə lə-a ang nəm tɔ, 10logə n-a ɗe dɔ ndɔ-ɛ əng mba kar ꞌɗɔy-ɛ, ngaɓa njeka-ɛje gə nje ta kag-ɛje d-a ko-e ɗaa lo tar a kigi-je sɛl, sisəy kara a ga̰ horo-je gə tɔ mba ꞌtaje kagə tar naji gə j-ila mbər-e j-ar-si le.
11Gəl-e gə nee ɓa, ja dəji ne Luba taar-taar gə mba sisəy, mba kar Luba turu-si kar asə njaje gə go ɓar lə-a, ngaɓa gə go singamongə lə-a ɗaa, n-ar-si ꞌɗaje ne ne gə may tɔ̰y gə ꞌgɔlje mə-si gə mba ɗa nəm gə kula gə ɗəw takagə gə tɔ. 12Be ɓa, mba kar ri Mbayɓe lə-si Jeju ɓar ne ɗəw gə lə-si, ngaɓa mba kar-sisəy kara ingaje ne riɓar ɗəw gə lə-a gə go mənuji lə Luba lə-sijee gə Mbayɓe Jeju Kirisi.
Currently Selected:
2 Nje gə Tesaloniki 1: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved