1 Piyɛr 5

Tar ndəjije dang-dang

1Tm 3.1-7

1M-ndəji ngatɔgəje gə horo-sisəy gə, ꞌma gə m-to ngatɔgə to to gə ꞌjejee be tɔ, m-to njetar naji ꞌməsərəje lə Kirisi ngaɓa rɔnduba gə a kila rɔ-ɛ gə ɗaga le kara m-a kar dan-ɛ gə tɔ. 2Kuduɓe badəmje gə Luba um-je ji-si gə le, uulje-je gə mə njigi lə-si gə go ndu Luba, ɓo gə singa ang nəm, ɓa mba nekuga gə dɔ buguru ang nəm, ngaa ꞌɗaje gə go njigi. 3Ngaɓa nje gə d-um-je mə ji-si gə le, kar o̰je dɔ-je gə ko̰ ang, ngaa kar ꞌtoje nekɔji mar-ɛ ar-je kuduɓe badəmje; 4be ɓa logə njekuul badəmje gə to dəw dɔ rɔ-ɛ le, a ɗe nama a kingaje dɔ gugu rɔnduba gə a tuji ang.

5Ɗəw kara baa, basa̰je, osoje kul no ngatɔgəje gə. Kula gə aw ɗaje horo naa gə le, ar-je kula dɔ ngulum ɓa o̰ dɔ-si, mba

Luba ɔsə njekunda karje ngərəng,

Ngaa n-ar mənuji lə-a nay gə nje gə d-ula dɔ-je ngulum.

6Ulaje dɔ-si ngulum gəl ji singamongə gə lə Luba, mba kar dɔ kar-ɛ asə nama n-ila ne riɓar dɔ-si gə. 7Ḭya̰je tar kəjije gə dum dɔ-si tɔ̰y mə ji-a gə, mba n-to nje gədə-si.

8Undaje kəm karə dɔ rɔ-si gə, ꞌcibije dɔ rɔ-si gə ang, njeba̰a̰ lə-si, ꞌSɛ̰ngərɛ̰ uwa mii hər-hər gugu ne si kɔrɔrɔ-kɔrɔrɔ to to gə ꞌnam be, sangə ne dəw gə a kore kuwa-a; 9Arje gədərə no-ɛ gə, uwaje takagə gədərə, mba ꞌgərəje to gə ngan ko̰-si gə dɔ nangə nee d-o ꞌməsərə ɗəw kara baa to gə be tɔ.

10Luba gə nje ɗa mayje dang-dang, gə ɓar-si ɗəw gə lə Kirisi, kar-si isije sə-a dan rɔnduba gə a to saar gə no le, logə oje ꞌməsərə kor-e əw ɓəəl nama, ye ja a təl gɔl rɔ-si, a kula jingaw mə-si gə, a kar-si singa, a kar ngira-si uwa nangə baa-baa. 11Singamongə to k-ɛ ja gə ɓal-ɓal! Oyo!

Ndu tɔr

1Te 5.23-28

12Ɗəw gə lə ngon ko̰-si gə to dəw gə gadə-gadə, gə ri-a na Silibɛ̰ ɓa m-ɗa ne mbede nee, m-pa ne gə si tarje ɓəl, mba ndəji-si ne ngaɓa pa ne kar-si to gə mənuji lə Luba gə tɔgərɔ le, to to gə be ja ɗaa, uwaje gədərə kəm-si gə kede.

13Mbo̰ naa lə njetakagə gə Babilon gə Luba mbər-e na m-o-si m-ar-je, ngaɓa ngon-m Marəke kara nəm tɔ. 14ꞌUwaje naa ꞌtoje mbi naa pu-pu ꞌtɔjije ne njigi naa lə-si. May kar ɗɛgɛgɛ nay gə sisəy tɔ̰y gə ꞌtoje njetakagə kirisije!

Currently Selected:

1 Piyɛr 5: lap

Highlight

Copy

Compare