2 Piyɛr 1
1
Tɔji rɔ gə ko naa
1ꞌMa Simo Piyɛr, njeka̰ykula lə Jeju Kirisi ngaɓa m-to ngon njekula lə-a, m-ɗa mbede nee m-ar nje gə ꞌta kagə gə maj-ɛ to to gə sijee be, ɗəw ne ɗa gə dana gadə-gadə lə Luba lə-si je gə njekaji-si Jeju Kirisi. 2May kar mənuji gə ɗɛgɛgɛ d-ɔsə kudu naa ngug-ngug dɔ-si gə go ɗəw gərə ꞌgərəje Luba gə Mbayɓe lə-si Jeju!
Pa nja lə njetakagə kirisije
Tit 2.11-14
3Ɗəw singamongə gə lə-a ꞌne gə Luba ja ɓa n-ar-si ne ne tɔ̰y gə kar kaw kəm baa ngaɓa kar kila ne kuji dɔ ne gə lə-a, kar j-a gərə ne nje ɓar-si ɗəw rɔnduba gə ɗəw məmay gə lə-a ja. 4Ɗəw gə lə neje gə nee le ɓa, d-uwa ne dɔ gɔl neje gə boy-boy gə may to ɓəəl, mba kar ꞌce ne ta tujije gə, ɗe ɗəw gə lə ɓo neje gə o̰ ɓe dɔ nangə nee, mba kum ne naa gə Luba 5Gəl-e gə nee le ɓa, undaje singa-si dɔ mar-ɛ gə, ar-je neje gə to nee ɔsə kudu naa dɔ takagə lə-si: Pa nja gə may ɔsə kudu takagə lə-si, negərə ɔsə kudu pa nja-si gə may, 6ko̰ dɔ darɔ ɔsə kudu negərə, kuwa gədərə ɔsə kudu ko̰ dɔ darɔ, kila kuji dɔ ne gə lə Luba ɔsə kudu kuwa gədərə, 7nuji gə kuwa gə horo ngan ko̰ naaje gə ɔsə kudu kila kuji dɔ ne gə lə Luba, njigi naa ɔsə kudu nuji gə kuwa horo ngan ko̰ naaje gə. 8Be ɓa ɓo neje gə nee le to mə-si gə ngaɓa ɓo ɔsə dɔ naa gə kede-kede nama, a ɗaje kula kar nduj-e a to mba kar ꞌgərəje ne Mbayɓe Jeju Kirisi; 9ngaa ɓo dəw gə neje nee le godo m-e gə nama to nje kəm tɔ, gə aw mam lo, ɗaa m-e unda pudum dɔ neɗaje gə kṵra̰y gə lə-a gə ləw gə ꞌtogo le. 10Gəl-e gə nee ɓa, ngan ko̰-m, undaje singa-si dɔ mar-ɛ gə ɔji dɔ ɓar gə Luba ɓar-si ngaɓa mbərə-si le, ɓo ꞌɗaje to gə be nama a koso-je dan neɗa gə kṵra̰y gə ang. 11Be ɓa ɓeko̰ lə Mbayɓe lə-si gə Njekaji-si Jeju Kirisi gə to gə ndɔ gə ndɔ le, d-a kɔr t-ɛ kila bəndəng kar-si.
12Gəl-e gə nee ɓa, m-a kole mə-si taar-taar dɔ neje gə nee le, to neje gə ꞌgərəje nam ja ngaa mba kar ꞌɓije ne dɔ tar gə tɔgərɔ gə ɓogəne. 13Ɓo m-aw kəm baa ɓi nama to dɔ gɔl-ɛ ja mba kar m-ole mə-si m-ar-si ꞌcibije ne dɔ rɔ-si gə ang, 14mba to gə Mbayɓe lə-si Jeju Kirisi pa ne kede ar-m le, m-gərə to gə ndɔ gə darɔ-m a kunda nangə nay ba̰y ang baa. 15Ngaa m-ɗa ga kar le m-aw kara ɗəw to ar mə-si ole kəne.
16Logə j-ila mbərə ɗe gə Mbayɓe lə-si Jeju Kirisi a ɗe gə singamongə j-ar-si le, to gə ꞌsu gə dəwje d-ɔr gə kəm karə lə-je ɓa j-ɔr j-ar-si ang, ngaa sijee ja j-o-e lo kunda rɔ-ɛ gə to ɓəəl gə kəm-si nda̰-nda̰; 17mba logə Luba gə Bɔ ɗɔy-e ngaɓa ula rɔnduba dɔ-ɛ gə gə ndu dəw gə ɓar ɓolong dɔ-ɛ gə na: ꞌNe gə nee le, n-to ngon njigi lə-m, n-to ngira rɔləl lə-m. 18Sijee ja j-o ndu dəw gə ḭ dara ɓar nee le gə mbi-si, logə j-ar sə-a dɔ ər gə to losang-ɛ gə. 19Ngaɓa takagə lə-si mongə ne gə kede dɔ tar gə pajambərəje ꞌpa kede le, may kar-sisəy kara oje gə maj-ɛ, to to gə pər gə ndogo lo ndul gə, saar kar lo aw arə, ngaɓa duji lokarə ndogo ne mə-si gə. 20ꞌGərəje kede nam to gə tar gə pajambərəje pa mə mbede gə le, dəw kara ja asə kɔr gəl-e gə kəm karə lə-a ang, 21mba tar gə pajambərəje ꞌpa le, ɗe gə go kəm karə lə dəw kara ang, ngaa Njil Njerɔsangə ɓa ar-je singamongə ꞌpa ne tar gə ndu Luba.
Currently Selected:
2 Piyɛr 1: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
