1Ja̰ 2

1Ngan-m gə gɔ-gɔ, m-ɗa mbede nee m-ar-si mba kar ꞌɗaje neɗa gə kṵra̰y ang. Ngaa to gə ɓo dəw oso dan neɗa gə kṵra̰y gə nama, njetadɔ-si ga̰ no Bɔ dəwje gə, Dəw nee le to Jeju Kirisi, n-to dəw gə gadə-gadə. 2Ɗaa ꞌne n-un rɔ-ɛ gə nepolo n-uga nee dɔ neɗa gə kṵra̰y dɔ-si gə, dɔ-sijee gə ɓa gə kar-si baa ang, ngaa dɔ dəwje tɔ̰y gə dɔ nangə nee.

Njigi naa lə ngan ko̰ naaje

Mat 7.21-23; Ja̰ 13.34-35; 14.21-24

3Be ɓa, to gə ɓo j-a ngom nduje lə-a gə maj-ɛ nama, ye ɓa a tɔji to gə j-a gər-e tɔ. 4Dəw pa na: M-gər-e, ngaɓa ngom ndu-e ang nama, dəb-e nee le to nje ɗəgərə, cibi tar gə tɔgərɔ godo m-e gə. 5Ngaa dəw gə ngom tar lə-a nama, nj-ɛ nee le njigi Luba to gə tɔgərɔ gə mə gə kara baa. Ye ɓa ar j-a gərə to gə j-a ga̰ sə-a kara baa. 6Dəw gə pa na n-um sə-a naa gə le, a kasə nja to gə ꞌne nja be.

7Ngan ko̰-mje gə m-njigi-si ya̰, to ndu gə sigi ɓa m-ɗa mbede gə m-ar-si ang baa, ngaa to ndu gə ləw gə ga̰ ji-si gə lo kuma kudu neje gə kede ləw baa. Ndu gə ləw gə to tar gə oje le. 8Cibi, m-ɗa ndu gə sigi mə mbede gə m-ar-si, ndu nee le to ndu gə tɔgərɔ ɔji dɔ-ɛ nəm ngaɓa ɔji dɔ sisəy tɔ; mba cil ciməri nday ar lokarə gə tɔgərɔ arə nam ngaa. 9Dəw gə pa na n-isi dan lokarə gə, ɓa njigi ngon ko̰-ɛ ang gə kɔrɔ le, nj-ɛ to dəw gə nay cil ciməri baa ɓi. 10Dəw gə njigi ngon ko̰-ɛ le, to dəw gə isi dan lokarə gə, n-a to jigi tunga lə-a ang. 11Ngaa dəw gə njigi ngon ko̰-ɛ ang gə kɔrɔ le to dəw gə isi cil ciməri gə, dəb-e nee le nja dan cil ciməri gə ngaɓa gərə logə aw gə kəne ang, mba cil ciməri təl-e gə dəw gə kəm-e tɔ.

12M-ɗa mbede m-ar-sisəy, ngan-m, mba tar neɗaje gə kṵra̰y ɔr dɔ-si gə gə ri Jeju. 13M-ɗa mbede m-ar-si, bɔ nganje, mba ꞌgərəje dəw gə isi lo kuma kudu neje gə kede ləw baa. M-ɗa mbede m-ar-sisəy, basa̰je, mba ꞌcɛdəje ɗɔ njeməndul nam.

M-ɗa mbede m-ar-si, ngan-m, mba ꞌgərəje Bɔ dəwje. 14M-ɗa mbede m-ar-si, bɔ nganje, mba ꞌgərəje dəw gə isi lo kuma kudu neje gə ləw baa. M-ɗa mbede m-ar-si, basa̰je, mba uba-je singa ya̰, tar lə Luba uwa mə-si ar ꞌcɛdəje ne ɗɔ njeməndul.

15ꞌNjigije dɔ nangə nee ang gə neje gə to kəne ang nəm. To gə ɓo dəw gə njigi nemay gə dɔ nangə nee nama njigi le Bɔ-sijee godo m-e gə; 16mba ne tɔ̰y gə to dɔ nangə nee: ɓo gə darɔ gə, kəm kə̰y gə kunda kar mba nekinga gə, neje nee le ḭ rɔ Bɔ-sijee Luba gə ang, ngaa neje le ɗe gə ɗew nemayje gə dɔ nangə nee. 17Ɗaa neje gə dɔ nangə nee a nday gə ɓo-e tɔ̰y; ngaa dəw gə nje ɗa mə njigi lə Luba a kisi kəm baa gə ndɔ gə ndɔ.

Nje kəm tarje lə Kirisi

Ja̰ 16.13-15

18Ngan-m gə gɔgɔ, oje, j-isi dɔbo̰ ndɔ gə, to gə sisəy oje tar-ɛ na nje kəm tar lə Kirisi aw ɗe; ngaɓa ɓogəne ne kara nje kəm tarje lə Kirisi bula ꞌga̰ nee, gəl-e gə nee ɓa sijee ja gərə ne to gə dɔbo̰ ndɔ ɗe nam. 19Nje kəm tarje lə Kirisi le ꞌce horo-sijee gə ja ɓa d-aw, ngaa ꞌto kar-sijee ang ngaa; mba to gə ɓo ꞌto dəwje lə-si nama d-a kisi gə si; ngaa, to arə ngadə to gə ꞌjejee tɔ̰y ja ꞌto dəwje lə-si ang.

20Kar-sisəy le ɗaa, Njerɔsangə uwa dɔ-si gə ubu, ngaɓa ingaje ne negərə. 21M-ɗa mbede m-ar-si mba sisəy ꞌlalje tar gə tɔgərɔ ang baa, ngaa mba sisəy gərə tar gə tɔgərɔ, ngaɓa tar gə ɗəgərə ce mə tar gə tɔgərɔ gə ang. 22Na ɓa to nje ɗəgərə wa? Dəw gə nje ma̰y to gə Jeju to Kirisi ang. Dəb-e nee le to nje kəm tar lə Kirisi, ꞌne gə n-ma̰y to gə n-gərə Luba gə Bɔ gə Ngon. 23Dəw gə ɗa-ɗa ɓa mbadə Ngon nama mbadə Bɔ dəwje, dəw gə gərə Ngon nama gərə Bɔ dəwje tɔ.

24Gəl-e gə nee ɓa, tar gə sisəy oje kede dɔngɔr le, may kar uwaje Ngon gə Bɔ dəwje mə-si gə tɔ. 25Ye ɓa to ne gə ɔji dɔ təbə gə ndɔ gə ndɔ gə n-uwa dɔ gɔl-ɛ n-ar-si.

26M-ɗa mbede nee m-pa ne tar lə dəwje gə njigi kuru-si muu. 27Sisəy le ɗaa, Njerɔsangə uwa dɔ-si gə ubu le nam, ɓo dəw a tɔji-si ne ang ngaa; ngaa mba ubu gə n-uwa ne dɔ-si le tɔji neje tɔ̰y, to gə n-to ne tar gə tɔgərɔ ja ɓo tar gə ɗəgərə ang, ɗaa umje sə-a naa gə to gə n-tɔji le.

Kum naa gə Kirisi

Rɔm 8.14-19

28Ɗaa nganje, ɓisine ɗaa, umje naa gə sə-a, mba kar dɔ ndɔ gə n-a tɔji rɔ-ɛ gə ɗaga ɗaa j-a ɓəəl ang, ngaɓa rɔ kul a kuwa-si ndɔ təl gə lə-a ang. 29To gə ɓo sisəy ꞌgər-eje gə dəw gə gadə-gadə nam, to gə ɓo dəw ɗa-ɗa ɓa ɗa ne gə gadə-gadə nama may kar ꞌgərəje to gə ꞌne ja n-uji-e.

Currently Selected:

1Ja̰ 2: lap

Highlight

Copy

Compare