1Ja̰ 1

Tar gə dɔngɔr

Ja̰ 1.1-14

1Ne gə ga̰ kede lo kun kudu neje gə le, ne gə nee gə j-o tar-ɛ gə mbi-si, ne gə j-o gə kəm-si, ne gə j-a tən so-so ngaɓa ne gə ji-si uwa pɛb le to tar təbə, 2Təbə le tɔji rɔ-ɛ ar j-o, ngaɓa sijee j-a to njetar naj-ɛje, ɗaa j-ila mbərə təbə gə to ndɔ gə ndɔ j-ar-si, ngaɓa təbə nee le ga̰ naa gə kara baa gə Bɔ dəwje, ꞌne gə tɔji rɔ-ɛ gə ɗaga kəm sijee gə. 3Ne gə j-o gə kəm-si ngaɓa ne gə j-o tar-ɛ gə mbi-si le, j-ila mbər-e j-ar-si mba kar-sisəy kara ore-je gə si naa gə dɔ mə kara tɔ-si naa gə. Ngaa mə kara lə-sijee le ga̰ rɔ Bɔ dəwje gə je gə Ngon-e Jeju Kirisi. 4Ɗaa neje nee le, sijee j-a ɗa mə mbede gə mba kar rɔləl lə-sijee ɔr sṵra̰-a gə maj-ɛ.

Luba to lokarə

5Tar gə j-o t-ɛ gə ɓa j-ila mbər-e j-ar-si le ɓa nee: Luba to lokarə, cil ciməri godo rɔ-ɛ gə. 6To gə ɓo j-a paje na j-a ɗa sə-a mə kara, ngaɓa j-a nja dan cil ciməri gə nama, j-a toje njeɗəgərəje cibi ɓa j-a njaje mə tar gə tɔgərɔ gə ang baa. 7Ngaa to gə ɓo j-a njaje dan lokarə gə, to gə ꞌne kara n-to lokarə, nama j-a ɗa mə kara gə naa gə yo gə nee, ngaɓa məsə Jeju togo neɗa gə kṵra̰y lə-si tɔ̰y.

8To gə ɓo j-a pa na neɗa gə kṵra̰y lə-si godo nama, j-ərə rɔ-si baa ngaɓa tar gə tɔgərɔ godo mə-si gə. 9To gə ɓo j-a ce gə gəl rɔ-si dɔ neɗaje gə kṵra̰y gə lə-si nama, n-to njekila kuji dɔ ndu-e gə nəm ngaɓa n-to dəw gə gadə-gadə, n-a kɔr tar neɗa gə kṵra̰y dɔ-si gə ngaɓa n-a togo neje gə may ang gə to mə-sijee gə. 10To gə ɓo j-a paje na j-a ɗa neɗa gə kṵra̰y ang nama, j-o-e gə nje ɗəgərə, ngaɓa tar lə-a godo mə-si gə.

Currently Selected:

1Ja̰ 1: lap

Highlight

Copy

Compare