1Ja̰ 3

1Aje oje, pa njigi gə Bɔ dəwje njigi-si le ɓa ꞌɓar-si ne nganje lə Luba! Ɗaa, j-a to ngan-ɛ ja. Gəl ne gə dɔ nangə gərə ne si ang le ɓa nee: ꞌNe kara ꞌgər-eje ang tɔ. 2Sisəy ngan ko̰-mje gə m-njigi-si ya̰, ɓisine j-a toje nganje lə Luba, ɗaa pa kunda rɔ-si gə dɔ ndɔ gə bara le kila rɔ-ɛ gə ɗaga ang ɓi, ngaa j-a gərə lo n-a kila rɔ-ɛ gə ɗaga nama, j-a ta sə-a naa mba j-a ko-e lo kunda rɔ-ɛ gə. 3Dəw gə ɗa-ɗa ɓa unda m-e dɔ-ɛ gə nama a karə ngadə to gə ꞌne n-arə ngadə bənəng tɔ.

4Dəw gə ɗa-ɗa ɓa ɗa neɗa gə kṵra̰y nama, ɗa neɗa gə dɔ buguru ngaɓa neɗa gə kṵra̰y le to kal dɔ torondu. 5Cibi sisəy ꞌgərəje som, dəw gə ɗe tɔji rɔ-ɛ gə ɗaga mba kɔr ne tar neɗa gə kṵra̰y lə dəwje le, neɗa gə kṵra̰y ɔr rɔ-ɛ ang. 6Dəw gə ɗa-ɗa ɓa gə um sə-a naa gə nama, a ɗa neɗa gə kṵra̰y ang, ngaa dəw gə ɗa-ɗa gə ɗa neɗa gə kṵra̰y nama, o-e ang nəm, gər-e ang nəm tɔ.

7Ngan-m gə gɔgɔ, ar-je dəw ərə-si ang, dəw gə to nje ɗa ne gə gadə-gadə le to dəw gə gadə-gadə ja tɔ, to gə ꞌne kara n-to dəw gə gadə-gadə. 8Dəw gə nje ɗa neɗa gə kṵra̰y le to nje kar ꞌSɛ̰ngərɛ̰, mba ꞌSɛ̰ngərɛ̰ ɗa neɗa gə kṵra̰y ləw baa lo kuma kudu neje gə, Ngon lə Luba ɗe mba tuji kula ɗa lə ꞌSɛ̰ngərɛ̰.

9Dəw gə ɗa-ɗa gə Luba uji-e le ɗa neɗa gə kṵra̰y ang, mba ko ne lə Luba to m-e gə, ɗaa n-asə ɗa neɗa gə kṵra̰y ang, mba Luba uji-e. 10Ye ɓa tɔji to gə nganje lə Luba ꞌto dang gə nganje lə ꞌSɛ̰ngərɛ̰. Dəw gə ɗa-ɗa gə ɗa ne gə gadə-gadə ang le, to kar lə Luba ang, ɗəw kara baa to gə dəw gə njigi ngon ko̰-ɛ ang nama to dəw lə Luba ang tɔ.

11Be ɓa, tar gə oje kede ləw baa lo kuma kudu neje gə le ɓa nee: J-a njigije naa gə yo gə nee; 12ɓo j-a ɗaje neɗa lə Ka̰yi gə to nje kar Njeməkṵra̰y gə tɔl ngon ko̰-ɛ ang. Ɗaa n-tɔl-ɛ mba ɗi ɓa wa? N-tɔl-ɛ mba kula ɗaje lə-a ꞌne gə kṵra̰y, ɗaa kar ngon ko̰-ɛ ɓa to gadə-gadə. 13Ngan ko̰-mje, to gə ɓo dɔ nangə nee njigi-si ang gə kɔrɔ nama, oje gə ne gə sigi ang. 14Sijee j-a gərə to gə j-a ce mə ji yo gə j-aw lo təbə gə, mba sijee ja njigi ngan ko̰-sijee. Dəw gə njigi ngon ko̰-ɛ ang le nay mə ji yo gə baa ɓi. 15Dəw gə ɗa-ɗa gə njigi ngon ko̰-ɛ ang gə kɔrɔ to dəw gə nje tɔl dəw, ngaɓa sisəy ꞌgərəje som to gə dəw gə nje tɔl dəw le inga təbə gə, gə ndɔ gə ndɔ ang.

16Ne gə sijee j-a gərə ne njigi lə ɓa nee: ꞌne le, n-un təbə lə-a n-uga nee dɔ-si. Be ɓa, sijee kara, j-un təbə mba ngan ko̰-sijee. 17To gə ɓo dəw inga nekinga gə dɔ nangə nee, o ngon ko̰-ɛ gə njendoo ɗaa un kəm-e dɔ-ɛ gə rəw le se, njigi lə Luba to m-e gə ja wa?

18Ngan-m gə gɔgɔ, j-a njigije naa gə ta-si gə tar gə may baa ang, ngaa ꞌtɔjije njigi lə-si ɗəw kula gə ngaɓa gə tar gə tɔgərɔ. 19Be ɓa, j-a gərə to gə j-ar dɔ tar gə tɔgərɔ, ɗaa j-a kila nee mə-si dɔ mar-ɛ po̰ no-ɛ gə, 20le mə-si ila tar dɔ-si to to gə ban-ban ja kara, Luba to ɓəəl unda mə-si, ɗaa ꞌne n-gərə neje tɔ̰y. 21Ngan ko̰-mje gə m-njigi-si ya̰, to gə ɓo mə-si ila tar dɔ-si gə ang nama, j-a ɓəəl no Luba gə ang. 22Ne gə ɗa-ɗa ɓa gə j-a dəji nama, j-a kinga ji-a gə, mba sijee ja ngom ndu-e ngaɓa j-a ɗa ne gə may ta kəm-e gə. 23Oje ndu-e le ɓa nee: May kar j-a ta kagə gə ri ngon-e Jeju Kirisi, cibi j-a njigije naa gə yo gə nee gə go ndu gə n-un n-ar-si. 24Dəw gə ar dɔ ndu-e gə le, um naa gə gə Luba ngaɓa Luba kara um sə-a naa gə tɔ, ye ɓa sijee ja gərə ne to gə n-um gə si naa gə, ɗəw gə lə Njil gə n-ar-si.

Currently Selected:

1Ja̰ 3: lap

Highlight

Copy

Compare