Romans 15

Sa Anomsomḵan Taḵu Si Mabadangan Da Udum

1Ditaḵu we ampigsa da pammati taḵu, ḵasapuḻane anusan taḵu da anḵuya da pammatida. Daḵampun aḵ abus bumaḻuwan taḵu'ḵ somsomḵon taḵu. 2Siya oḵyan somsomḵon taḵu mas-oman da sunud taḵu ḵan pumigsaan os da pammatida. 3Te taḵon ay aḵ Jesu Kristu adinapun mas-oman long-agna yaḵon sa ḵanan ni nigili ye Ugud Apudyus, “Da amsew da tagu ḵan siḵa Apudyus, saḵon inamsewda.”#15:3 Psalm 69:9. 4Te ngaimane nigili ye Ugud Apudyus si awe, nigilida'ḵ matuttuduwan taḵu. Ta lamog taḵu attoman da ampaḵaḻaman ya masoḻgag somsomoḵ taḵu ya annamnama taḵu. 5Sa iluwaḻuḵ ḵan Apudyus we anoḻgag atta somsomoḵ taḵu, antitimpuyugona oḵyan ditaḵu ta unudon taḵu ugalin Jesu Kristu, 6ta an-os-ossaan taḵu we andaydayaw ḵan Apudyus we Aman Jesu Kristu we Apu taḵu.

Sa Nidog-an Da Gentil

7Pun awatonyu da buḻunyu we isun ni nan-aawat Kristu ḵan diḵayu ta madayawan Apudyus. 8Te ibagaḵ ḵan diḵayu we nambalin aḵ Kristu aḵ sammilu we anserbi'tta Judyu ta ipailana ḵinatuttuwaan Apudyus ta mapanoḵnoḵan da inkarina'tta danaḵḵoḻda. 9Ḵad idayaw da Gentil gapu'tte ḵadaguna. Te ḵanan ni nigili si Ugud Apudyus,

“Pun dayawoḵ siḵa Apudyus

ya da Gentil andaydayawda ḵan siḵa.

Ḵad iḵanḵantani ye angidayaw si ngadannu.”#15:9 2 Samuel 22:50; Psalm 18:49.

10Ḵad awad os osae nigili ye ḵanana,

“Diḵayu we Gentil, maḵagangganas ḵayu bos

atta pinilin Apudyus aḵ taguna.”#15:10 Deuteronomy 32:43.

11Ḵanana bos,

“Diḵayu losane Gentil, dayawonyu'ḵ Apu.

Dayawon os da losane tagu.”#15:11 Psalm 117:1.

12Ḵad awad os inggilin Profeta Isaiah we ḵanana,

“Awad de ganaḵ Jesse we asi umali ta angipangat atta Gentil.

Siya namnamaonda.”#15:12 Isaiah 11:10.

13Iluwaḻuḵ ḵan Apudyus we maḻpuwan ni namnama taḵu ta ittona ḵan diḵayu amode layad ḵan lin-awan da somsomoḵyu gapu si namatiyanyu ta pumigsa namnamayu mipagapu si ḵabooḻan ni Ispiritu Santu.

Sa Ḵewaaḻe Intaḻgod Apudyus Ḵan Paul

14Susunudḵu ḵan Kristu, mat-opaḵ si mipanggob ḵan diḵayu te ambabaḻu ḵayu, adu da igammuyu ya lamogyu an-asituttudu. 15Yaḵon natuḻodaḵe nangigili'tta annae banag ta awad angiḵagasmoḵanyu gapu'tte ḵinabaḻu we impailan Apudyus ḵan saḵon 16ta anserbiyaḵ ḵan Jesu Kristu si antuttuduwaḵ atta Gentil. Anserbiyaḵe isun di padi atte angiwaḻagawagaḵ si Ambaḻu we Damag we naḻpu ḵan Apudyus ta ambalin da Gentil aḵ datune mas-oman Apudyus te intotoḵḵon ni Ispiritu Santu dida'ḵ taguna. 17Pun gapu ta niyossaanaḵ ḵan Jesu Kristu, maḵwae isḵaḻḵu anserbiyaḵ ḵan Apudyus. 18Te naippun udum aḵ ugudoḵ yaḵon abus da ḵingwan Kristu mipagapu ḵan saḵon aḵ angawis atta Gentil ta tumuttuwada gapu si amatiyanda ḵan Apudyus. Te namatida gapu'tte nantuttuduwaḵ ya da ḵingwaḵ, 19gapu'tta nakaskasdaawe sinyal ya da miraculu ya mipagapu si ḵabooḻan ni Ispiritu Santu. Misaḻad ad Jerusalem inggana'd Illyricum iwwaḻagawagḵu Ambaḻu we Damag mipanggob ḵan Kristu. 20Te siya panggobḵu iyyaḵ iwaḻagawag Ambaḻu we Damag atta ḵinailin di ili ye daampun andongoḻ si mipanggob ḵan Kristu ta adiyaḵ antaḵad si labaw ni insaad da udume tagu. 21Te sa ḵanan ni nigili ye Ugud Apudyus,

“Angil-an da adipun paat nandongoḻ mipanggob ḵan siya

ḵad maawatanda mipanggob ḵan siya.”#15:21 Isaiah 52:15.

Sa Planun Paul

22Sana gapun ni dam-oḵ nataḵtaḵane umali ḵan diḵayu sinat. 23Yaḵon sinsana, gapu ta inabusḵu ḵewaaḻḵu'tta annae ili ya pigan tawone pioḵ umali ḵan diḵayu, 24namnamaoḵe ilaḵ diḵayu nu ansadangaḵe umoy ad Spain ta ampabadangaḵ ḵan diḵayu we umoy sidi nu maabus sin-aḵitane maḵabuḻbuḻunaḵ ḵan diḵayu. 25Yaḵon sinsadi, iyyaḵ umuna'd Jerusalem ta iyoyḵu annae badang atta tagun Apudyus sidi. 26Te da tagun Apudyus si probinsiya'd Macedonia ya Achaia, sillalaylayaddae nangitod aḵ badangda'tta ḵapuse tagun Apudyus ad Jerusalem. 27Simsimmoḵdae bummadang. Sa ḵatuttuwaan, labbongnae badanganda da ḵapus ad Jerusalem ta milaḵ-am da Gentil atta naispirituwane bindisyun da Judyu ḵad labbongna bose anserbi da Gentil atta Judyu. 28Ḵad nu gangputoḵ itton da annae nadagup, iyyaḵ ad Spain ya ansadangaḵ sinat. 29Igammuḵe nu umaliyaḵ sinat, umaliyaḵe ummamdan bindisyune maḻpu ḵan Kristu.

30Susunudḵu ḵan Kristu, anna ud ḵodawoḵ ḵan diḵayu, gapu ḵan Apu taḵu we Jesu Kristu ya gapu si ayate itton ni Ispiritu Santu, losan taḵu pumangoge alluwaḻu para ḵan saḵon ta bumadang aḵ Apudyus. 31Iluwaḻuyu we iligsin Apudyus saḵon atta adipun namati'tte probinsiya'd Judea. Ḵad iluwaḻuyu bos ta awatonaḵ atta tagun Apudyus ad Jerusalem we anserbi ḵan dida sidi. 32Ḵad iluwaḻuyu ta nu pinion Apudyus allaylayadaḵe umali ḵan diḵayu ya malin-awaan somsomoḵḵu we maḵabuḻbuḻun. 33Oḵyan pos ta iinggaw aḵ Apudyus we naḻpuwan ni lin-awa ḵan diḵayu losan. Amen.

Currently Selected:

Romans 15: kml

Highlight

Copy