Romans 14

Sa Adi Taḵu Anellawan Atta Buḻun Taḵu

1Awatonyu tagu we anḵuya pammatina yaḵon adi ḵayu maḵasossongbat ḵan siya mipanggob si ḵasomsomḵana. 2Awad da udume namati ye angan atta baḻangnae maḵan. Yaḵon awad da anḵuya pammatida ḵad matipoye abus anidada. 3Diḵayu we angan atta baḻangnae maḵan, adiyu oḵyan dellawon da angidiyan atta udume maḵan. Ḵad diḵayu bose angidiyan atta udume maḵan, adiyu bos dellawon da angan atta baḻangnae maḵan te inawat Apudyus dida'ḵ taguna. 4Te ngaiḵa ḵammane anguwis atta sammilun da udum? Te sa Apuna asi ḵigade angibaga nu ustu ḵoona baḵon nu adipun. Ḵad sa ḵoḵoḵḵona aaddi ye napanoḵnoḵane ustu te aḵ Apu Jesus maḵwae bumadang ḵan siya.

5Awad da udume ibelangda'ḵ amo napatpatog sin-aḻgaw nu da udume aḻgaw yaḵon ḵanan os da udume an-iisu aḻgaw. Pun ḵasapuḻane awad osa mat-op atte somsomoḵna. 6Sa tagu we patgana osae aḻgaw, ḵoona ḵatti aḵ anayawana ḵan Apudyus. Isun os ni osae angan atta baḻangnae maḵan, ḵanona'ḵ anayawana ḵan Apudyus te anggappiyaana ḵan siya. Ḵad isun os ni adi angan atta baḻangnae maḵan, ḵoona ḵatti'ḵ anayawana ḵan Apudyus te anggappiyaana ḵan siya. 7Te losan ḵan ditaḵu we namati, daḵampun atte madayawan taḵu singsington taḵu si mataguwan taḵu ya taḵon ay matoyan taḵu. 8Nu matagu taḵu, matagu taḵu ta madayawan Apu Jesus ḵad nu matoy taḵu, matoy taḵu bos ta madayawan Apu Jesus. Pun taḵon ay matagu taḵu baḵon nu matoy taḵu, ḵuwan Apu Jesu Kristu ditaḵu. 9Te natoy ya ummuli'ḵ Jesu Kristu ta siya an-Apun da matattagu ya da natoy.

10Nu aḵ Jesu Kristu Apu taḵu losan, naippun ḵaḻabbongan taḵu we anguwis ya anellaw atta susunud taḵu ḵan Kristu. Adi taḵu ḵoon ḵatti te nu anungus ni aḻgaw, losan taḵu sumangu maḵuwis ḵan Apudyus. 11Te awad de nigili si Ugud Apudyus we ḵanana,

“Gapu ta matattaguwaḵ: Analluḵu da losane tagu ḵan saḵon

ḵad bigbigondae saḵon Apu.”#14:11 Isaiah 45:23; Philippians 2:10-11.

12Pun losan taḵu sumongbat ḵan Apudyus atta losane ḵingwa taḵu.

Sa Gapun Ni Maḵabasuḻan Da Buḻun Taḵu

13Ḵad siya gapunae adi taḵu ogon ḵuwison da udume namati yaḵon ḵasapuḻane pasig taḵu sosomḵone adi taḵu angwa'ḵ ngaimane gapun ni maḵabasuḻan da susunud taḵu ḵan Kristu. 14Gapu si nidog-aḵ ḵan Apu Jesus, aaddi ye ippun maḵan aḵ ḵaissaw si antotollong Apudyus. Yaḵon nu ibelang ni osan tagu'ḵ ḵaissaw, ḵaissaw ḵan siya. 15Nu sa anganan taḵu gapun ni lumawengan ni somsomoḵ ni sunud taḵu ḵan Kristu, daḵampun aḵ ayat impaila taḵu ḵan siya. Sa anganan taḵu adi taḵu iyunude dadailona pammatin ni sunud taḵu te siya inḵatoy Kristu. 16Ilanyu ta da ibelangyu'ḵ ambaḻu, daḵampun oḵyan aḵ lawweng ḵaugudanda. 17Te sa ampangatan Apudyus atta taguna, daḵampun aḵ ampatog ḵanon taḵu ḵan inumon taḵu. Yaḵon sa ampatog, ḵoona ditaḵu'ḵ maun-unan, sa allin-awaan taḵu'tta sin-ossaossa ya sa laylayad taḵu we maḻpu si Ispiritu Santu. 18Ḵad nu ḵaḵnat inon taḵu we anserbi ḵan Kristu, mas-om aḵ Apudyus ya mapatgan taḵu bos atta asintatagu taḵu. 19Pun ḵasapuḻane igga taḵu ḵabooḻan taḵu ta allin-awa maḵabuḻbuḻunan taḵu'tta udum ya ngaimane amapigsa'tta pammati taḵu. 20Nabaḻbaḻu nu adi taḵu dadailon ḵewaaḻ Apudyus gapu'tte maḵan. Losane maḵan ampoḻḵas yaḵon lawweng nu siya maḵabasuḻan da sunud taḵu gapu'tte anganan taḵu. 21Nabaḻbaḻu nu adi taḵu ḵanon sida baḵon nu uminum si bayas baḵon nu ḵoon da ngaimane siya maḵabasuḻan ni sunud taḵu ḵan Kristu. 22Ngaimane patiyon ni sin-ossaossa mipanggob si anna, ambaḻu nu abusda ḵan Apudyus aḵ angigammu. Pian tagu we adin ni somsomoḵna ḵuwison long-agnae mismu gapu'tte simsimmoḵnae ustu ḵoona. 23Yaḵon sa tagu we anduwaduwa mipanggob atte maḵan, maḵabasuḻ nu ḵanona te sa anganana daḵampun aḵ nibatay si ustu we pinatina. Pun nu ḵoon taḵu da ngaimane patiyon taḵu we daḵampun aḵ ustu, maḵabasuḻ taḵu.

Currently Selected:

Romans 14: kml

Highlight

Copy