Romans 16

Sa Ampakumustaan Paul Atta Udum

1Ipaigammuḵ ḵan diḵayu mipanggob ḵan Phoebe we sunud taḵu ḵan Kristu. Siya anserbi'tta namati ye magimugimung ad Cenchreae. 2Nu dumatong sinat, mangiliyonyu gapu'tte pammatiyu ḵan Apu Jesus te labbongnae ḵatti ḵoon da tagun Apudyus. Ḵad ngaimane ḵasapuḻana, badanganyu oḵyan te adu da tagu we binadangana taḵon ay saḵon.

3Pakumustaonyu da Priscilla we an-asawa ḵan Aquila, dida buḻunḵu we anserbi ḵan Jesu Kristu. 4Impustada da biyagda para ḵan saḵon ḵad daḵampun aḵ abusaḵ aḵ anggappiya ḵan dida yaḵon da losane gimung da namati ye Gentil. 5Pakumustaonyu bos da namati ye magimugimung si boḻoydae andayaw ḵan Apudyus. Pakumustaonyu'ḵ Epaenetus we ay-ayatoḵe siya ḵaunaane namati ḵan Kristu atte probinsiya'd Asia. 6Ḵad idogayu'ḵ Mary ye pummangoge nanḵewaaḻ para ḵan diḵayu. 7Isuna bos ḵan da Andronicus ḵan Junia we dogaḵe Judyu we nabaḻud si awe. Iniiggammun da apostol dida ya ummunada namati ḵan Kristu nu saḵon. 8Pakumustaonyu'ḵ Ampliatus we ay-ayatoḵ gapu ḵan Apu. 9Isuna bos ḵan Urbanus we buḻunḵu we nanserbi ḵan Kristu. Ḵad aḵ Stachys we ay-ayatoḵ. 10Idogayu'ḵ Apelles we napanoḵnoḵane tuttuwa pammatina ḵan Kristu. Idogayu da ḵabaḻyan Aristobulus. 11Pakumustaonyu'ḵ Herodion we dogaḵe Judyu ya da namati ḵan Apu we ḵabaḻyan Narcissus. 12Pakumustaonyu da Tryphaena ḵan Tryphosa we anserbi ḵan Apu Jesus, isuna bos ḵan Persis we ay-ayatoḵe pummangog nanserbi ḵan Apu. 13Pakumustaonyu'ḵ Rufus we iniiggammudae nanserbiyana'ḵ Apu, isun inanae imbelangḵu bos aḵ inaḵ. 14Ḵad idogayu pakumustaon da Asyncritus, Phlegon, Hermes, Patrobas, Hermas ya da susunud taḵu ḵan Kristu we awad ḵan dida. 15Pakumustaonyu bos da Philologus, Julia, Nereus ya sa sunudnae bubai ya aḵ Olympas ya da losane tagun Apudyus we awad ḵan dida. 16An-asipakumusta ḵayu ta angipaila si an-asiayatanyu. Da losane gimung da namati ḵan Kristu pakumustaonda bos diḵayu.

Sa Anungus Ni Tuttudun Paul

17Susunudḵu ḵan Kristu, ḵodawoḵe ummanyu'tta tagu we anadail si nan-os-ossaananyu ya angulu'tta pammatiyu. Te sullagiyonda ḵatuttuwaane nituttudu ḵan diḵayu si awe ḵad maḵḵon ituttududa. Ḵasapuḻane umadayu ḵayu ḵan dida. 18Te da ḵassadi ye tagu, daḵampun ḵan Apu taḵu we Kristu anserbiyanda yaḵon da long-agda ya da pipionda. Ḵad mipagapu'tte allin-awae an-uugudda ya ḵinasiḵapda, allelawonda da tagu we ippun ḵon igammuda. 19Allaylayadaḵ gapu ḵan diḵayu te nan-asidongoḻ atta ḵinailin di ili tummuttuwaanyu gapu si namatiyanyu. Ḵad pioḵ ose lumaing ḵayu mipanggob si ambaḻu yaḵon ippun oḵyan igammuyu si mipanggob atta lawweng. 20Adipun manunnuwan ya aḵ Apudyus we maḻpuwan ni lin-awa oḻgona'ḵ Satan we isun di gusgusdan taḵu. Awad oḵyan ḵan diḵayu ḵinabaḻu we maḻpu ḵan Apu Jesu Kristu.

21Aḵ Timothy ye buḻunḵu we nanḵewaaḻ, pakumustaona diḵayu, isuna bos atta dogaḵe Judyu we da Lucius ḵan Jason ya aḵ Sosipater.

22Saḵon aḵ Tertius we nangigili si annae suḻat, pakumustaoḵ diḵayu we amati ḵan Apu Jesus.

23Aḵ Gaius we niḵamboḻoyaḵ, pakumustaona diḵayu. Sa boḻoyna dam-on da namati ye magimugimung andaydayawan. Ḵad aḵ Erastus we treasurer ni annae siyudad ya aḵ Quartus we sunud taḵu pakumustaonda diḵayu.

24Oḵyan ta ḵadaguwan Jesu Kristu we Apu taḵu diḵayu losan. Amen.#16:24 16:24 Sa annae verse ippun si ḵaaduwane manuscript atte Greek.

Sa Madayawan Oḵyan Apudyus

25Madayaw oḵyan aḵ Apudyus! Te anna ḵabooḻanae amapigsa'tta pammatiyu we nibatay si Ambaḻu we Damag mipanggob ḵan Jesu Kristu we iwaḻagawagḵu. Sa annae Ambaḻu we Damag nitataḻu we adipun nipaigammu si awe. 26Yaḵon sinsana, annae nipaigammu ya mipagapu'tta inggilin da profetan Apudyus nipaigammu'tta losane tagu we mibatay atte bilin Apudyus aḵ inggana ta tumuttuwada gapu si amatiyanda ḵan siya.

27Madaydayaw aḵ Apudyus aḵ ingganae abus aḵ tuttuwae ḵalaingan mipagapu ḵan Jesu Kristu! Amen.

Currently Selected:

Romans 16: kml

Highlight

Copy