Romans 13

Sa Anuttuwaan Taḵu Atta Pangat

1Losane tagu ḵasapuḻane tuttuwaonda da angipangat si gubilnu te naippun ḵaḻabbongandae ampangat nu adin Apudyus iyunud. Ḵad losane ampangat, aḵ Apudyus nangisaad ḵan dida. 2Pun ngaimane sumullagi'tta pangat, sumullagi'tte dinutuḵan Apudyus ḵad siya madusa. 3Ippun maḵimtan da angwa'ḵ ambaḻu'tta pangat yaḵon abus da angwa'ḵ lawweng aḵ maḵimut ḵan dida. Pun nu pionyu we adi maḵimut atta pangat, siya ḵoonyu ustu we sa angidayawanda ḵan diḵayu. 4Te da pangat, dida da anserbi ḵan Apudyus para'tta bumaḻuwanyu ya para'tta madusaan da angwa'ḵ lawweng. Yaḵon nu ḵoonyu lawweng, maḵimut ḵayu oḵyan te anna ḵaḻabbongandae naḻpu ḵan Apudyus we anusa'tta angwa'ḵ lawweng. 5Pun ḵasapuḻane tuttuwaon taḵu dida, daḵampun aḵ abus angiligsiyan taḵu'tta dusan Apudyus mipagapu ḵan dida yaḵon gapu ta igammu taḵu we sanat da ustu we ḵoon taḵu.

6Ḵad sana gapun ni ambayadan taḵu'tta bugis taḵu te da pangat si gubilnu, anserbida ḵan Apudyus si angwaanda'tta ḵewaaḻda. 7Pun ḵasapuḻane bayadan taḵu da bugis taḵu ya bayadan taḵu da utang taḵu ḵan dida. Ḵad ḵasapuḻane patgan taḵu da anna ḵaḻabbonganda'ḵ mapatgan.

Sa An-asiayatan Taḵu

8Bayadan taḵu da utang taḵu. Ḵad an-asiayat taḵu. Te sa angayat si asintataguna, tinuttuwana da Lintog Apudyus. 9Te ḵanan da bilin, “Adiḵa maḵadagdagas, adiḵa pumatoy, adiḵa an-aḵaw ya adim ḵamommodon da ḵuwan da udum”#13:9 Exodus 20:13-15, 17; Deuteronomy 5:17-19, 21. ya da udume bilin sinalimungmung ni ossaane biline ḵanana, “Ayatom da asintatagume isun ni an-aayatnu'tte long-agnu.”#13:9 Leviticus 19:18. 10Te nu ayaton taḵu da asintatagu taḵu, adipun maḵwae ḵoon taḵu lawweng ḵan dida. Pun sa angay-ayatan taḵu'tta asintatagu taḵu, sadi bos anuttuwaan taḵu'tte lintog.

11Ḵasapuḻane ḵoon taḵu losan da anna te igammu taḵu we ampatog timpu we mataguwan taḵu sinsadi. Ḵad sinsadi ye timpu bumangon taḵu we nasuyop te madam-an mataguwan taḵu'ḵ inggana nu sa damu we namatiyan taḵu. 12Te sa ḵatuttuwaan, naḻaḵpus labi ya madam-an mabigat. Pun ḵaanon taḵu da ḵoḵoḵḵon taḵu si giḵbot ta iḵabot taḵu aggom ni padda. 13Sa antatagu we ḵasapuḻane unudon taḵu, sa ampoḻḵas ḵan ambaḻu we mibagay atte tagu we awad si padda. Adi taḵu mabartek, adi taḵu maḵadagdagas ya adi taḵu ḵoon da udume ḵaḵaissawan ya ḵababbain ya adi taḵu ansusubog ḵan an-asiapos. 14Yaḵon sa ḵoon taḵu oḵyan, unudon taḵu ugalin Apu taḵu we Jesu Kristu ya adi taḵu oḵyan iyunud da pion da long-ag taḵu.

Currently Selected:

Romans 13: kml

Highlight

Copy