Galatians 6

Sa An-asibadanganyu

1Susunudḵu ḵan Kristu, nu awad maigammu'ḵ buḻunyu'ḵ naḵabasuḻ, ilanyu ude idaḻan ni Ispiritu Santu ta badanganyu ya ampauliyonyu ta ḵoona da ustu we banag. Ambaḻuwonyu we bumadang ḵan siya ya ummanyu ta adi ḵayu masulisug os aḵ bumasuḻ. 2An-asibadang ḵayu nu awad andagson aḵ problemayu te nu ḵatti ḵoonyu, tinuttuwayu lintog Kristu.#6:2 Sa mipanggob si bilin Kristu, ilanyu'tte John 13:34; 15:12; Galatians 5:14. 3Nu awad angibelang aḵ awad de ḵabooḻana baḵon nu nangatu ḵasasaadna yaḵon daḵampun aḵ tuttuwa, allelawonae mismu long-agna. 4Pun ḵasapuḻane sa sin-ossaossa usigona nu ustu pagay da ḵoona. Te nu ustu, maḵwae isḵaḻna long-agnae mismu we adinapun iyis-isu'tta ḵoon da buḻunna. 5Te sa sin-ossaossa, ḵasapuḻane ḵoona biyangna.

6Sa matuttuduwan atte Ugud Apudyus, ḵasapuḻan oḵyane ibillayana antuttudu ḵan siya'tta losane ambaḻu we awad ḵan siya.#6:6 Deuteronomy 25:4; Matthew 10:10; Luke 10:7; Romans 5:27; 1 Corinthians 9:9-14; 1 Timothy 5:17-18.

7Adiyu allelawon da long-agyu te aḵ Apudyus adipun maḵwae maang-angyag. Nu ngai imuḻan ni tagu, siya bos apitona. 8Inigammuyu we ngaimane imuḻayu, sanat apitonyu. Pun sa tagu we siya imuḻamuḻana unudon da pipion ni long-agna, apitona madadailana'ḵ ingganae maḻpu'tte pipion ni long-agna. Yaḵon sa angimuḻamuḻa si pinion ni Ispiritu Santu, apitona biyag aḵ ingganae itton ni Ispiritu Santu. 9Pun siya gapunae aditaḵu oḵyan mappoge angwa'tta ambaḻu te dumatong ustu we timpu we angittan Apudyus ḵan ditaḵu'tta gunguna nu adi taḵu mappoge anguuway. 10Pun nu mawayaan taḵu pagatupan taḵu we angwa si ambaḻu'tta losane tagu, amod ay da susunud taḵu we namati.

Sa Anungus Ni Annae Suḻat

11Saḵone mismu nangigili si annae anungus ni suḻat. Ilanyu ḵadanaḵḵoḻ ni giliḵ! 12Da angipatute ampasogyat ḵayu, dida da maḻyad angipaila si ḵinabaḻuda'tte antotollong da tagu. Ipatutda sadi te adidapun pione ampaḵaḻamda. Te igammudae nu ituttududae umanay natoyan Kristu'tte kros, ampaḵaḻamon da buḻunda dida. 13Te taḵon ay didae nasogyatan, adidapun tuttuwaon da lintog Moses yaḵon piondae ampasogyat ḵayu ta awad isḵaḻdae nampasogyat ḵayu'tte gapu ḵan dida. 14Yaḵon ḵan saḵon, ippun udum aḵ isḵaḻḵu, abus natoyan Jesu Kristu we Apu taḵu'tte kros te gapu si sanate natoyana, da patpatgon da tagu we adipun amati ippun patogda ḵan saḵon ya ippun os patogḵu ḵan dida. 15Ippun nansabaliyan ni nampasogyat baḵon nu adipun, sa ampatog ḵad sa ambalin taḵu'ḵ baru we tagu. 16Awad oḵyan atta losane angunud si annae imbagaḵ lin-awa ḵan ḵadagu ya awad os atta losane tuttuwae tagun Apudyus.

17Inggana sinsadi, ippun oḵyan pos ogon amaḵaḻam ḵan saḵon gapu'tte nangituttuduwaḵ si mipanggob atte kros te sa long-agḵu we napillapillatan, sana angipailae tuttuwae nanserbiyaḵ ḵan Jesus.

18Susunudḵu ḵan Kristu, awad oḵyan ḵan diḵayu ḵinabaḻu we maḻpu ḵan Apu taḵu we Jesu Kristu. Amen.

Currently Selected:

Galatians 6: kml

Highlight

Copy