Ephesians 1

Sa Laplapun Ni Suḻat

1Saḵon aḵ Paul we apostol Jesu Kristu mipagapu'tte pinion Apudyus. Annaya suḻatḵu ḵan diḵayu we tagun Apudyus ad Ephesus we ipapatidae amati ḵan Jesu Kristu.#1:1 Maḵwae basaonyu mipanggob si nambisitaan Paul ad Ephesus atte Acts 18:19-21; 19:1-41.

2Awad oḵyan ḵan diḵayu ḵinabaḻu ḵan lin-awae maḻpu ḵan Apudyus we Ama taḵu ya aḵ Apu Jesu Kristu.

Sa Nakaskasdaawe Planun Apudyus

3Dayawon taḵu'ḵ Apudyus we Aman Jesu Kristu we Apu taḵu we siya bos de Apudyusna te gapu si niyossaanan taḵu ḵan siya, innatodna ḵan ditaḵu da losane naispirituwane bindisyune naḻpu'd langit. 4Sa daan ni lubung maḵwaan, pinilin Apudyus ditaḵu'ḵ miyossaan ḵan Kristu ta ambaḻu ugali taḵu ya ippun ḵadellawan taḵu si antotollongna. Gapu si ayatna, 5inggallapuna simsimmoḵe ambalinon ditaḵu'ḵ abengna mipagapu ḵan Jesu Kristu te siya piniona ya panggobna'tte amalayad ḵan siya. 6Pun dayawon taḵu'ḵ Apudyus gapu si nakaskasdaawe ḵinabaḻu we pasigna impaila ḵan ditaḵu we niyossaan ḵan Kristu we ay-ayatonae abengna. 7Te gapu si pummoy-asan ni daḻan Jesu Kristu si natoyana, nasubut taḵu we piona ḵanan napakawan da basuḻ taḵu.#1:7 Colossians 1:14; Hebrews 9:11-22. Sana nail-an ni ummamdane ḵinabaḻun Apudyus 8ḵan ditaḵu we ippun miyisuwana. Innatodna bos ḵan ditaḵu ḵinalaing ḵan pannakaawat. 9Ḵad allaylayade nangipaigammu ḵan ditaḵu si pinionae adipun nipaigammu si awe ye asi mituttuwa ḵan Kristu. 10Annaya planuna: Nu magangput losan da ḵasapuḻane maḵwa ya dumatong ustu we timpu, uḻnusona da losane anna'd langit ya sina'd luta ya paipangatna dida ḵan Kristu.

11Losane maḵwa, mibatay atte gagangaye planun Apudyus. Pinilina diḵani ye Judyu aḵ ambaline taguna gapu si niyossaananni ḵan Kristu. Te siya gagangaye planuna inggan ni lapuna, 12ta mipagapu ḵan diḵani ye ummun-una nannamnama ḵan Kristu, madaydayaw ḵinaapudyusna. 13Ḵad diḵayu bose niyossaan ḵan Kristu, dingngoḻyu ḵad ḵatuttuwaane Ugudna we sa Ambaḻu we Damag mipanggob atte mataguwanyu, namati ḵayu ḵan Kristu woḵ namaḻḵaan ḵayu si Ispiritu Santu we inkarina. 14Ḵad sa annaan ni Ispiritu Santu ḵan ditaḵu, ippun duwaduwanae awaton taḵu si umali ye aḻgaw da losane inkarina ḵan ditaḵu we napuḵayan ta madaydayaw nakaskasdaawe ḵinaapudyusna.

Sa Luwaḻun Paul

15Gapu'tte sadi, inggan ni dingngoḻḵu pammatiyu ḵan Apu Jesus ya sa ayatyu'tta losane dogayu we tagun Apudyus, 16adiḵpun iginoḵe anggappiya ḵan Apudyus gapu ḵan diḵayu ya patilayune idogaḵ diḵayu'tta luwaḻuḵ. 17Ḵad ḵodaḵodawoḵ si madaydayawe Ama taḵu we Apudyus ḵan aman Apu taḵu we Jesu Kristu mipagapu si Ispiritu Santu we ittona oḵyan ḵan diḵayu ḵinalaing ḵan ipaigammuna mipanggob ḵan siya. 18Ḵodawoḵ ose silawan Apudyus da somsomoḵyu ta igammuwonyu namnamaon taḵu gapu si namiliyana ḵan ditaḵu ya maawatanyu ḵaadu ḵan ḵinabaḻun ni bindisyune inkarina'tta tagun Apudyus. 19Ḵad giḵnaonyu oḵyan ḵinapigsan ni ḵabooḻanae bumadabadang ḵan ditaḵu we namati. Sana nakaskasdaawe ḵabooḻane 20impailana si nanaguwana ḵasin ḵan Kristu ya sa nangipangatuwana ḵan siya'd langit woḵ pinatuḵduna si madawinannae maḵapangat ḵan siya. 21Sidi ampangatana sinsana ḵad nangatngatu'ḵ adayu ḵabooḻana nu da anna ḵaḻabbonganda ḵan ḵabooḻanda ya da ngadan da ngaimane pangat si annae lubung ya da losane adipun maila'd langite awad de ampangatanda. Naippun paat nangatngatu nu siya sinsana ya sa umali ye timpu. 22Impangatun Apudyus aḵ Kristu ta siya angipangat atta losane banag ya siya bos dinutuḵan Apudyus we pangat da losane namati. 23Te ditaḵu isun di long-agna ya siya isun di uḻu taḵu. Ḵad ditaḵu we namati isun di wadawadan Kristu ya siya ḵad os, awad atta losane lugar ta siya anḵawadawadan da losane banag.

Currently Selected:

Ephesians 1: kml

Highlight

Copy