2 Korintenea 11
11
Le apostolea le xoxamne.
1O, te daština te nikrăn xançî dillimos anda mîŕî rig! Ei, aven, nikărăn ma!#Vers. 16. Cap. 5.13.
2Kă sîm jeloso tumendar kha jloziasa pala e voia le Devllesti, anda kă tomnisaisardem tume khă romesa, kaste anau tume angloa Kristoso sar khă šeibari uji.#Lev. 21.13. Osea 2.19, 20. 1Kor. 4.15. Gal. 4.17, 18. Kol. 1.28.
3Ta darau kă, pala sar o sap dileardeas la Eva pehkă xoxaimasa, sa kadea i le gîndurea tumară te na rimon pe katoa ujimos thai o pateaimos kai sî angloa Kristoso.#Gen. 3.4. Ioan 8.44. Efes. 6.24. Kol. 2.4, 6, 8, 18. 1Tim. 1.3; 4.1. Evr. 13.9. 2Pet. 3.17.
4Ande čeačimaste, kana avel varekon te del tumengă duma aver Isus kai ame či phendeam les, or kana sî e orba te len aver duxo kai či lean les, Or LašiVestea, savi či lean la, oh, sar nikrăn les dă mišto!#Gal. 1.7, 8.
5Ta dinau kă či me či sîm khančesa mai telal dă sar le apostolea kadala „butimasa alosarde”!#Cap. 12.11. 1Kor. 15.10. Gal. 2.6.
6Orta kana sîm khă bičioplime ando dimosduma, či sîm kadea i ando prinjeandimos; thai sîkadem e buti kadea maškar tumende, ande sako felo thai ande sal dikhlimata.#Cap. 4.2; 5.11; 10.10; 12.12. 1Kor. 1.17; 2.1, 13. Efes. 3.4.
7Or, kărdem khă bezex, kana meklema telal man, kaste aven tume vazdine, thai vestisardem tumengă bi potindimahko e LašiVestea le Devllesti?#Cap. 10.1. Kărd. 18.8. 1Kor. 9.6, 12.
8Lem pa aver Khăngărea, lindoi lendar vokh potindimos, kaste dašti kandau tumengă.
9Thai kana sîmas tumende, thai sîmas arakhado ando avimos, či sîmas pharimos khanikahkă; kă anda so sasma avimos kandinisaile ăl phral, kana avilesas andai Mačedonia. Ande sa arakhailem, thai arakhaua ma te pharearau tume varesosa.#Cap. 12.13, 14, 16. Kărd. 20.33. Filip. 4.10, 15, 16. 1Tes. 2.9. 2Tes. 3.8, 9.
10Po čeačimos le Kristosohko kai sî ande mande, khonikh na čiorăla mangă kadea buti le lăudimasti andel phuwea la Axaiakă!#Rom. 9.1. 1Kor. 9.15.
11Anda soste?… Anda kă či kamau tume?… Jeanel o Dell!#Cap. 6.11; 7.3; 12.15.
12Ta kărau buti thai butearaua kadea, anda kaste šinau orsao phendimos kolengo kai roden phendimos, kaste dašti aven arakhade orta sar mande ande le butea savença lăudin pe.#1Kor. 9.12.
13Le manuši kadala sî varesar apostolea xoxamne, varesar butearea athaimahkă, kai parugleon andel apostolea le Kristosohkă.#Kărd. 15.24. Rom. 16.18. Gal. 1.7; 6.12. Filip. 1.15. 2Pet. 2.1. 1Ioan 4.1. Sîk. 2.2. Cap. 2.17. Filip. 3.2. Tit 1.10, 11.
14Thai nai mirimahko, kă orta O Beng paŕugleol andekh înjero luminako.#Gal. 1.8.
15Nai bari buti ta, kana i le kanditorea lehkă paŕugleon andel kanditorea le bibezexalimahkă. O isprăvimos lengo avela pala lengă kărdimata.#Cap. 3.9. Filip. 3.19.
Le kăsnimata le apostolohkă.
16Pale phenau: te na pateal ma khonikh dillo. Or avervaresar, răbdin ma barem sar dillo, kaste na lăudi ma i me xançorî.#Vers. 1. Cap. 12.6, 11.
17So phenau ande kadoa bidaraimos, kaste lăudi ma, či phenau pala o Rai, ta sar kana phenaua andoa dillimos.#Cap. 9.4. 1Kor. 7.6, 12.
18Ando čiro so but lăudin pe ando mas o phuwikano, lăudiua ma i me.#Filip. 3.3, 4.
19Ta tume răbdin čeilimasa le dillen, tume, kai san xarane!#1Kor. 4.10.
20Kana robil tume varekon, te xala tume varekon, te thola varekon o vast pe tumende, te dikhăla varekon pe tumende dă opral, te marăla tume varekon poa mui, răbdin!#Gal. 2.4; 4.9.
21Karing o lajau muŕo phenau, kă samas kovle! Kadea darorso dašti varekon te thol anglal-dau duma ando dillimos – dašti thoau i me anglal.#Cap. 10.10. Filip. 3.4.
22Sî on Evreia? I me sîm! – Sî on Israeliça? I me sîm! – Sî on sămînça le Avraamosti? I me sîm! –#Kărd. 22.3. Rom. 1.11. Filip. 3.5.
23Sî on kanditorea le Kristosohkă? – dau duma sar khă ankalado andai godi – me sîm thai i mai but. Andel čiimata thai mai but; andel phandaimata, thai i mai but; andel mardimata, bi dindimahkă; butivar andel dara le mullimahkă!#Cap. 1.9, 10; 4.11; 6.4, 5, 9. Kărd. 9.16; 20.23; 21.11. 1Kor. 15.10, 30-32.
24Panjvar lem katal Iudeia po štarvardeši mardimata bi iekhako;#Deut. 25.3.
25trivarăs sîmas mardo le ŕaiança; ăkh data sîmas dinobaŕănça, trivarăs phaŕadi'lo o bero mança; ăkh des thai ăkh reat sîmas ando fundo la mareako.#Kărd. 14.19; 16.22; 27.41.
26Butivar sîmas andel phirimata, andel mullimata pel paia, andel mullimata andai rig le čiorăndi, andel mullimata andai rig kolendi anda mîŕî viça, andel mullimata andai rig le biboldengo, andel mullimata le četăçengă, andel mullimata la pustiakă, andel mullimata pe marea, andel mullimata maškar le phral xoxamne.#Kărd. 9.23; 13.50; 14.5; 17.5; 19.23; 20.3; 21.31; 23.10, 11; 25.3.
27Andel čiimata thai kăsnimata, andel reatea bisute, butivar, ande bokh thai truši, andel posturi butivar, ando šill thai bixuredimata!#Cap. 6.5. Kărd. 20.31. 1Kor. 4.11.
28Thai, paša le butea dă avreal, ande sako des xals ma e grija anda sal Khăngărea.#Kărd. 20.18, etc. Rom. 1.14.
29Kon sî kovlo, thai te na avau i me kovlo? Kon perăl ande bezex, thai me te na phabuau?#1Kor. 8.13; 9.22.
30Kana sî e orba te lăudi ma, lăudiuas ma numai le buteança dičimasa koa kovlimos muŕo.#Cap. 12.5, 9, 10.
31O Dell thai o Dadd le Raiehko amarăhko le Isus Kristosohko, kai sî dinodumadămišto andel veakurea, jeanel kă či xoxavau! …#Cap. 1.23. Rom. 1.9; 9.1, 5. Gal. 1.20. 1Tes. 2.5.
32Ando Damasko, o šerobaro le thagarehko o Areta arakhălas e četatea le Damasčienendi, kaste astarăl ma.#Kărd. 9.24, 25.
33Ta sîmas dino tele pakh jeamo, andekh košo andoa zîdo, thai skăpisardem anda lengă vast.
Currently Selected:
2 Korintenea 11: KALD2020
Highlight
Share
Copy
Want to have your highlights saved across all your devices? Sign up or sign in
Bible translated into Kalderash Romani by Luminita Cioaba 2020, from the Cornilescu version of the Romanian Bible. Rights are held by the British and Foreign Bible Society and the Interconfessional Bible Society of Romania.
