أيث-روما 13
13
لْوَاجِب نّغ عْلَاحْسَاب ڒْمخْزن
1لَابُد اَذ يطَاع كُڒ يجّن إِ صْحَاب ن ڒْمخْزن لِأَنَّا وَار يدْجِي بُو ڒْمخْزن إِلَّا ونِّي د يكِّين زِي أَربِّـي. أُو يِنِّي يحكّْمن ذ أَربِّـي إِي ثن يݣِّين. 2خ مَانَايَا وِي يتْعَارَّاضن إِ ڒْمخْزن، ئِتْعَارَّاض إِ مِين يݣَّا أَربِّـي. أُو يِنِّي ذَاسن يتْعَارَّاضن اَذ تْوَاعَاقْبن. 3لِأَنَّا لْحُكَّام وَار سِّݣّْوِيذن شَا ونِّي يتݣّن ڒْخِير، سَّݣّْوَاذن ونِّي يتݣّن شَّرّْ. مڒَا ثخْسذ وَار تݣّْوْذذ شَا زِي ڒْمخْزن، تݣّ ڒْخِير اَخَاك يَرْضَا. 4أَقَا نتَّا ذ اَخدَّام ن أَربِّـي اَش ينْفع. وَلَكِن مڒَا تݣّذ شَّرّْ ݣّْوذ زَّايس، وَار ييْسِي شَا سِّيف بْڒَا سَّبَاب. نتَّا ذ اَخدَّام ن أَربِّـي يتخدْجَاس يتْعَاقَاب ونِّي يتݣّن شَّرّْ. 5فَلِهَذَا لَابُد اَذَاس ثْطَاعذ إِ ڒْمخْزن مَاشِي عْلَاحْسَاب لعِقَاب وَاهَا، وَلَكِن عَاوذ عْلَاحْسَاب ضَّمِير نّش إِي ذَاش يتتّن. 6عَاوذ ذ وَانِيتَا ذ سَّبَاب إِي خف تْخدْجَاسم ضَّرِيبَا لِأَنَّا يِنِّي يحكّْمن نِثْنِي ذ يخدَّامن ن أَربِّـي، خدّْمن ذِي مَانَايَا. 7مْكُڒ يجّن ؤُشم-اَس ڒْحَقّ نّس: ضَّرِيبَا إِ بَاب ن ضَّرِيبَا، ڒَعْشُوْر إِ بَاب ن ڒَعْشُوْر، لإِحْتِرَام إِ بَاب ن لإِحْتِرَام، ڒوْقَار إِ بَاب ن ڒوْقَار.
لْوَاجِب نّغ عْلَاحْسَاب ڒُوْصِيَاث
8ئِتْخصَّا وَار يتِيڒِي شَا ومَارْوَاس جَارَاوم؛ لَّا، ئِتْخصَّا اَذ يِيڒِي إِلَّا ومَارْوَاس ن ڒمْحِبّث. أَقَا ونِّي يتخْسن ونّضْنِي يتْوَاحْسَاب يكمّڒ مِين يُوْرِين ذِي شَّرِيعَا. 9لِأَنَّا ڒُوْصِيَاث نِّي إِي يقَّارن وَار زنَّا، وَار نقّ، وَار تَاشَار، وَار عشّق، ذ ڒُوْصِيَاث نّغْنِي، مَارَّا مُوْننْت ذݣ يِجّن ن ڒُوْصِيّث يقَّارن: <أَذ ثخْسذ اَجَّار نّش اَمشْنَاو يخف نّش.> 10ڒمْحِبّث-أَ وَار تْضَارِّي شَا اَجَّار نّس. فَلِهَذَا، ڒمْحِبّث تْكمَّاڒ شَّرِيعَا اَمن-ثكْمَاڒ.
11مَايمِّي مَانَايَا؟ كنِّيو ثسّْنم مَان ڒْوقْث إِي ذِي ندْجَا نشِّين. ثُوْوض-د ثْسَعَّات حمَا اَذ تْفَاقم زݣ يِيضص. لِأَنَّا ثْسَعَّات-أَ إِي ذِي غَا ننْجم ڒخُّو اَقَا ثْقَارّب-د كْتَار زِي ثنِّي إِي ذِي نُوْمن ذ اَمزْوَارُو. 12دْجِيڒث اَقَا ثعْذُو، نْهَار اَقَا يُوْوض-د. خ مَانَايَا لَابُد أَ نكّس ڒحْوَايج ن ثَادْجسْت، أَ نݣّ اَرُّوْض ن نُّور ن ڒحْذِيذ. 13ئِتخصَّا لَابُد أَ نُوْيُوْر س لْإِحْتِرَام اَم ونِّي يݣُّوْرن ذِي ثْفَاوْث ن نْهَار. وَار نْتݣّ شَا لْمَدلَّا ن سّكْرَا ذ وَاطَّاس ن شّْرب ذ لْفَسَاد ذ ڒقْبَاحْث ذ ومنْغِي ذ ڒحْسذ. 14وَلَكِن، ݣّث ڒحْوَايج ن سِيذِيثْنغ عِيْسَى لْمَسِيح. وَار رهَّام شَا اَك طَّبِيعَا ثَعفَّانْت نْوم، وَار تْسعَّافث شَا شّهَاوَاث نّس.
Currently Selected:
أيث-روما 13: ريف
Highlight
Share
Copy
Want to have your highlights saved across all your devices? Sign up or sign in
